حداثي نعرف حدود ديني ! لا رجعي متخلف و لا حداثجي منحل !

حداثي نعرف حدود ديني !
لا رجعي متخلف و لا حداثجي منحل !
إفهموها براس أمكم !!! موش كل من يعادي الرجعية تحت أي غطاء ، دينيا كان أو فكريا ، راهو يعادي الدين و موش كل من يعادي الإنحلال الأخلاقي و الفكري و الإنبطاح راهو يعادي الحداثة !!
علاش ؟ الدين متاعنا موش حداثي ؟ و كيف نقول الدين متاعنا ، نقصد النص القرآني إلي هبطو جبرائيل عليه السلام على سيدنا محمد صلّى الله عليه و سلم و السنة النبوية الشريفة إلي من واجبنا الإقتداء بيها و إلي جات من عند سيدنا محمد صلى الله عليه و سلم ! موش هاكا الدين الجديد الخارج من عند مشيخة فتاوي الـXXL !! ياخي الدين متاعنا يتعارض مع الحداثة ؟ 
مالا كيفاش نجمت الدعوة الدينية إلي جاء بيها الرسول صلى الله عليه و سلم تصنع من قوم بدو يعيشوا في الصحراء على التجارة و على رعي الغنم ، ـ تصنع ـ دولة قوية وصلت لمشارف الصين شرقا و حاصرت أوروبا و بدات تزحف عليها غربا ؟ موش بالحرب كهو كيف الدول و الإمبراطوريات الكبيرة إلى عرفها التاريخ ! لكن بالفكر و العلم متاعها !! كيفاش نجمت هالدعوة هاذي تخرج الناس من عبادة الأصنام ( المادة ) إلى التفكير في وجود خالق و التصديق بالغيب دون رؤيته و نجمت تقنعهم ؟ و تأصل للفكر هذا و تبني بيه هو مجتمع متماسك موش متكون من أفراد برك بل و علاقات و أخلاقيات !!!
أعطيوني دولة على مر العصور نجمت توصل تأصل لفكرة مجتمع فاضل و توصل تحقق الفكرة هاذي ؟ 
هاتو أعطيوني مفكر واحد نجم يحقق فكرة المدينة الفاضلة متاعو ؟ أفلاطون ؟ ماركس ؟ ...
ياخي ما نجموش نكونوا حداثيين في المعنى الصحيح للكلمة يعني التقدم و الإنفتاح على الآخر و قبوله في إطار الندية دون المساس بثوابتنا و من غير ما نعاديو الدين ؟ علاش كل ما هو خارج عن الدين متاعنا نعتبروه حداثي ؟ و من الجهة الأخري علاش كل ما نشوفو حاجة خارجة علي المألوف و علي العرف و في نفس الوقت ما تتعارضش مع الدين نهربوا منها مرتكزين علي سكيزوفريني عقائدية و فكرية ! بين إدراكنا في وعينا أنها لا تمس الدين و بين تسليمنا في وعينا أنها قد تكون شبهة تمس الدين ! ياخي إل ها درجة ما عندناش ثقة في تأصل الدين متاعنا في قلوبنا و خايفين لا نقدموا القدام ؟ 
أسباب تخلف المسلمين ( أي نعم متخلفين : سميلي دولة وحدة مسلمة قادرة تفرض روحها على الساحة الدولية و كان باش تقلي إيران نقلك الله عندك ألف حق و آنا البهيم إلي نحكي معاك ) واضحة ! 
الخوف المفرط على الدين و التعصب في هذا الخوف ! إلي ممكن يكون من خطر حقيقي و ممكن يكون من وهم !

أعتقونا !!!!

الحرية الملبس تدخل في إطار الحريات الشخصية متفاهمين فيها هاذي الناس الكل !
المشكل : هل يجب تقنين الحرية هاذي باش ما يصيرش تطرف من الجانبين و لا لا ؟
كان باش نمشيو في طرح إنو لا يجب تقنين الحرية هاذي و الحد منها :
كيف ما المتنقبة عندها الحق تدخل لابسة نقاب للمؤسسات التربوية و الجامعية و الإدارية تحت غطاء حرية الملبس ، كيف ما الموش متدينة أصلا تنجم تدخل لابسة "دو بياس" و لا "لابسة من غير هدوم" للمؤسسات التربوية و الجامعية و الإدارية تحت نفس الغطاء !
هنا يولي مشكل !! و ما عندوش حل !!
باهي ! نمشيو توة في طرح إنه يجب تقنين الحرية الحرية هاذي و ضبطها و الحد منها !
هنا تطرح زوز وضعيات :
إما أن تمنع مثلا النقاب دون منع أي لباس غير محتشم أو العكس باش أي تمنع اللباس الغير محتشم دون منع النقاب ( هنا فمة مشكل باش نحكي عليه بعد ) تكون عملت قانون للحد من حرية فئة معينة دون الأخرى و باش يولي قانون جائر و هنا مشكل جديد و مشكل أكبر مالأول !!!
و إما أن تمنع النقاب مثلا و اللباس الغير محتشم مع بعضهم و هنا فمة مشكل جديد : شنوة المعيار إلي باش تحدد بيه اللباس المحتشم ماللباس الموش محتشم ؟؟؟ و
العقليات متغيرة من بلاصة لبلاصة ، كيف ما نقولوا كل بلاد و أرطالها !!!
ثم بأي حق تعتبر النقاب إعتبار مبدئي النقاب لباس غير قانوني في حين تجتهد في محاولة تعريف اللباس و الموش محتشم ؟؟
يعني ديما باش نقعدوا في نفس البعبوكة متاع القانون إلي يستهدف فئة معينة دون الأخرى!
باهي تقول إنت شنوة الحل ؟؟؟
بون فمة حل أول بانال و تافه على الأخر : نعملوا زي موحد لكل جامعة ! هههه بالطبيعة ضحكت إنت توة هههه نعرف !! آنا بيدي كان يحكيهالي واحد نسخطو على راسو !! و بالطبيعة الحل هذا كيف ما آنا نقترح فيه و نضحك و كيف ما إنت تقرى فيه و تضحك كيف ما الطلبة موش باش يقبلوه جملة !! شنوة وحدة معرسة داخلة بطبلية للفاك !! و زيد هالحل هذا ديجا فيه مشكل : كيفاش شكل الزي إلي باش تفرضوا الإدارة : ديما باش يكون يا "لباس غير محتشم " عند البعض و لباس رجعي متخلف عند البعض الآخر !!
أيوه ؟؟ شنوة الحل مالا ؟؟؟
الحل في كلمتين : كل واحد يلبس كيف ما يحب و فكوا على والدينا من هالنقاش الفارغ إلي عمرنا ما باش نخرجوا منه بحل !! و باش نقعدوا قرون لقدام ناقشو فيه !! ناس تتقدم و أحنا نقعدوا نحكيو في اللبسة !! زايد عقلية تقطيع و ترييش ! ياخي باش تمنع المتنقبة من الدخول للكلية تي ماو باش تعرضك في الشارع و باش سوا ديزان تخوفك و باش تقعد تعدي عمرك كامل تتسائل زعمة مرا و لا راجل ! هي هي الحكاية !!!
و لا كيف تمنع اللي لابسة دجين من الدخول للكلية ! تي ماو باش تعرضك في الشارع هذا كان موش في البحر في "دو بياس" و باش تقعد سوا ديزان الغرائز متاعك تتحرك !!
تي إفهموا هاكي الدنيا !!!! و هاكي هي العيشة !! و هاكي هي تونس !!! مانا قلناها ألف مرة !!
خوانجية و زبراطة و عياشة !!!
كان تحبوا الناس الكل تخرجوها "سيري كاسارونا" ( تخونيجا أو تزبريطا ) راكم غالطين ، و عمركم ما باش توصلولها !!!
أيا قصو على والدين هالنقاشات الفارغة و ركزولنا على القضايا الأهم !!

كرهت التدوين

أحاول منذ مدة أن أكتب ولكن ... في أي موضوع أكتب ؟ لمن أكتب ؟
أصبح الكتابة مملة و أصبحت قراءة النصوص مملة !
الكل أصبح يكتب ... و لا أحد يقرأ لأحد ...
النقاش أصبح مملا ... و الحديث أصبح أمل...
أصبح التدوين كالحرث في البحر ... لا أحد يستفيد و لا أحد يناقش
الكل يكتب ليدافع عن فلان، عن توجهاته و خياراته حتى و إن كان مقتنعا بخطئها
الكل يكتب ليهاجم فلانا و خياراته و توجهاته حتى و إن كان مقتنعا بصحتها

لا يدافع و لا يهاجم إلا من منطلق واحد : تبعيته للطرف الآخر ...
التدوين أصبح عملا مقرفا ... لم تعد فيه لا إفادة و لا متعة ...
كم كرهت التدوين !!!

العلاقات التونسية الصهيونية ... إلى أين ؟

في غرة أكتوبر من سنة 1985 ، تعرضت مدينة حمام الشط لقصف جوي مباغت من الطيران الحربي الصهيوني في إطار ما بات يعرف بعد ذلك بعملية الساق الخشبية ، سقط على إثر هذا العدوان 68 شهيدا فلسطينيا و تونسيا ، العملية جائت مباغتة أو هكذا قيل ، لأن بعض المعلومات التي صدرت بعد ذلك أدانت مسؤولين تونسيين و على رأسهم الرئيس التونسي المخلوع زين العابدين بن علي الذي كان يشغل حينها منصب وزير الداخلية لعلمهم السابق بالعملية و تواطئهم فيها و لكن لم تؤكد هذه المعلومات إلى اليوم ، إستهدفت هذه العملية قادة منظمة التحرير الفلسطينية "فتح" الذين رُحّلوا من لبنان إثر إجتياح القوات الصهيونية لبيروت و ترحيل قوات الحركة منها إلىتونس التي إستقبلتهم بمدينة حمام الشط سنة 1982 .

في هذه الملحمة ، إختلطت دماء الفلسطينين بالتونسيين و أصبحت بذلك تونس إحدى دول المواجهة و إن لم تقم بالرد العسكري حينها و أكتفت بتحرك ديبلوماسي أفضى إلى إستصدار  قرار مجلس الأمن الدولي رقم 573 الذي "أدان فيه العدوان الإسرائيلي على تونس" و "حث الدول الأعضاء في الأمم المتحدة على أن تتخذ تدابير لثني إسرائيل عن أعمال عدوانية مماثلة" كما طالب الكيان الصهيوني بدفع تعويضات للضحايا التونسيين دون الإشارة إلى الضحايا الفلسطينيين و لو حتى رمزيا .


يومها ، دخلت تونس مجبرة لا باغية صف دول المواجهة مع الكيان الصهيوني ، دخلت صف هذه الدول نظريا و في قرارات الجامعة العربية و لكن الواقع كان يقول غير ذلك ، بعد الإنقلاب الأبيض الذي قاده سنة 1987 الرئيس التونسي المخلوع زين العابدين بن علي على الرئيس الراحل الحبيب بورڨيبة و الذي تولى على إثره رئاسة البلاد ، بادرت تونس لاهثة وراء التطبيع مع الكيان الصهيوني سرا ، فتكثفت المبادلات التجارية و الثقافية و الأمنية والسياحية بينهما ، أو بالأحرى تكثفت في اتجاه واحد كانت تونس هي القبلة فيها ، ففتحت الأسواق أمام المنتجات الصهيونية وأستقبلت الوفود الشبابية و الثقافية الإسرائيلية ( الكشافة و الفنانين ) و طورت العلاقات الأمنية و الإستخباراتية بينهما ــ كان الهدف الرئيسي منه إجتثاث المد الإسلامي و رموز المقاومة الفلسطينية المقيمين بتونس ـــ و الذي أثمر تسهيل تونس عملية إغتيال القيادي البارز في حركة فتح خليل إبراهيم محمود الوزير ، المشهور بـ"أبو جهاد" الذي كان يقيم في تونس آن ذاك في عملية لا تقل أهمية على عملية الساق الخشبية شارك فيها 20 عنصراً مدرباً من الموساد من أربع سفن وغواصتين وزوارق مطاطية وطائرتين عموديتين للمساندة على شاطئ الرواد و أصبحت هذه العلاقات تسير للعلن حتى توجت سنة 1995 بفتح مكاتب تبادل تجاري بينهما بشكل علني .


وأصبحت هذه العلاقات تشهد تطورا سريعا و أصبحت تشهد أوجها في شهر ماي من كل سنة بزيارة آلاف اليهود الحاملين لجوازات سفر إسرائيلية لكنيس الغريبة بجربة و أصبح المراقب للأحداث حينها يعتبر العلاقات الصهيونية التونسية في مستوى العلاقات الأمريكية الصهيونية و رغم أن هذه العلاقات شهدت جزرا في بعض الأحيان ، كغلق المكاتب التجارية بينهما سنة 2000 إثر إندلاع الإنتفاضة الفلسطينية الثانية و تراجع الإقبال على "كنيس الغريبة" إثر التفجير الذي تعرض له سنة 2003 إلا أنها كانت تسير بخطى ثابتة نحو التطبيع المعلن بين البلدين و قد لعب " اللوبي التونسي " القوي نسبيا بوزارة الخارجية الصهيونية ممثلا بـوزير الخارجية الصهيوني السابق سفيان شالوم المولود بمدينة ڨابس و وسفير الكيان الصهيوني بالقاهرة  شالوم كوهين المولود بمدينة نابل و نظيره بباريس نسيم الزفيلي أصيل مدينة حلق الواد ــ لعب ــ دورا كبيرا في دعم تلك المساعي .


في سنة 2005 أختيرت تونس للإستقبال القمة العالمية حول و مجتمع المعلومات ، و كما فاجئ هذا الإختيار العالم لأن تونس تعتبر من أسوأ الدول في مجال حرية المعلومة ، فقد فاجئ بن علي حينها العالم بتوجيهه دعوة رسمية لرئيس الوزراء الصهيوني حينها "أرئييل شارون" الذي لم يلبي الدعوة و أكتفى بإرسال وفد ديبلوماسي ثقيل نسبيا يرأسه وزير خارجيته ذو الأصل التونسي حينها "سلفيان شالوم" و تمت الزيارة وسط معارضة شعبية واسعة أدت إلى تفادي إستقبال الوفد إسقبالا رسميا و إقتصر الإستقبال على إرسال رئيس الجالية اليهودية في تونس و عضو مجلس المستشارين رجل الأعمال "روجي بيسموث" .


تواصلت المساعي نحو التطبيع العلني بين تونس و الكيان الصهيوني إثر تلك الزيارة التي أعادت و لو نسبيا المياه إلى مجاريها بين البلدين أكسبت مشروع التطبيع أشواطا كبيرة و أصبحت مدعومة بأصوات كبيرة في الداخل التونسي و في خارجه ، وأصبح الملاحظ يرى أن وسائل الإعلام التونسية المكتوبة و التي كانت خاضعة للنظام باتت تهيئ و تبارك مشروع التطبيع و بدأت موجة كبيرة من المطالبة بالتطبيع كان جل من سايروها من الجالية اليهودية بتونس و بعض رجال الأعمال و أبواق النظام أُرِيدَ منها تهيئة الرأي العام لإعلان رسمي عن تطبيع العلاقات مع الكيان الصهيوني .


في 17 ديسمبر 2010 ، إندلعت بتونس ثورة شاملة أطاحت بالنظام في 14 جانفي 2011 ، إستغل حينها الكيان الصهيونية قضية الجالية اليهودية بتونس للدفع الرأي العام للتدخل و حماية مصالحه بتونس و أعلن أن الجالية اليهودية تتعرض لمضايقات و تهديدات أمنية سرعان ما ردت عليه الجالية بالرفض و الإنكار.


إثر الثورة و بداية الحراك السياسي في تونس و ظهور تعددية حزبية بدأت بعض الأصوات تتعالى و تطالب بالتطبيع مع الكيان الصهيوني. هذه الأصوات ممثلة في أحزاب و جمعيات و منظمات و شخصيات مستقلة لوحظ أنها تحصلت على تمويلات صخمة من أطراف أجنبية و داخلية مشبوهة و تحت مسميات مختلفة ــ منها محاربة المد الإسلامي و مقاومة الرجعية و التطرف و الإرهاب ـــ


نعود لمنطلق المقال ، تونس تعرضت لتعد صارخ على حرمة أرضها و سيادتها ، سقط على إثره ضحايا ، بالتالي فهي معنية بالمواجهة و الممانعة ، ليس فقط نصرة للقضية الفلسطينية بل لأنها إثر ذاك العدوان أصبحت معنية بالصراع ، لم يتم لحين اللحظة تطبيق قرار مجلس الأمن بخصوص التعويضات ، نظام بن علي سعى إلى تطبيع العلاقات مع الكيان على مدة 23 سنة من حكمه و سعى من قبلة الرئيس الحبيب بورڨيبة حسب وثيقة سربت مؤخرا و لم ينجحوا في إقامة علاقات ديبلوماسية معلنة معه خشية ردة فعل الرأي العام الرافض لهذه الفكرة قطعا !
فهل يقبل شعب تونس ما بعد الثورة بالتطبيع ؟ هل سينسى دماء شهدائه ؟ هل سيخون وفائه التاريخي للقضية الفلسطينية ؟ هل سيتصدى للقوى الداعمة لفكرة التطبيع ؟
ـــــــــــــــــــــــــــــ

الجزء الثاني من رواية : المغبونة

الجزء الثاني من رواية : المغبونة
تأليف : دجو
ــــــــــــــــــــــــــــــ
.... قعدت وحدها ، السبحة في يديها ، ظهرها على الحيط ، ظهرها مقوس من آثار الزمان ، قعدت تسبح و سرحت بخيالها ، حتى لين طاحت السبحة من يديها ، سرحت في تصويرة المرحوم ، تفكرت وقت كان يمشي يخرج يسقي الزيتون ، يهز معاه " العايش " فوق كرايمو ، وقتها كان شاريلو ، مضلة و دنڨري صغير و قفة صغيرة يحط فيها الڨاميلة متاعو ، كان يطلع بيه للزيتون و بعد يمشيو زوز للڨرعة و يقعد يحفظ فيه في القرآن ، يروحولها كان عقاب العشية ، يلقاو الفطور حاضر فيه كل خير ! هوما يبداو باش ياكلو و هو يسألها :
بعثت فطور حمد خويا ؟
وقتها كان خوه حمد عازب يعيش معاه في الدار لكبيرة ، عاطينو بيت وحدوا ! تفكرت وقت كان المرحوم يكمل عشاه ، يمشي يصلي العشاء و يبدى يغمز فيها و ينهز فيها قدام " العايش " و يقلها :
هاني ماشي نرڨد ها بنت عمي
و هي تجبد عليه بالمرتاح و تقلوا :
برة مازال ما عنديش نوم ، نكمل المسلسل و نمشي نغسل الماعون و بعد تو نرڨد !!

و هي سارحة في خيالها ، فوق الكليم متاع العادة ، في الحوش متاع العادة ، حذا قلة الماء متاع العادة !
بدات تجي على وجها بسمة و عينيها مازلت بالدموع . تفكرت زادة المرحوم كيفاش كان يعاملها ، من دون رجال الهنشير الكل ، كان هو الراجل الوحيد لي يقدر مرتو ، عمروا ما جرحها بكلمة و عمروا ما هز يدوا عليها، تفكرت كيفاش نساء الدوار الكل كانو يغاروا منها و يحسدوا فيها ، تفكرت كيفاش كانوا يقطعوا و يريشو فيها في غيابها و كيف تحظر كانوا يجيو بالوحدة بالوحدة يصبوا ببعضهم ، تفكرت كيفاش كانت تنحي من عندها و تودهم و قداش هوما كانو يبغضوها !!!
تفكرت برشة حاجات ، تفكرت كيفاش كان المرحوم يهزها كولموسم للسوق و يمدلها لفة أوراق و يقلها :

ها بنت سعيد ، بري أقضي شانك مالسوق ، بري إشري قطعتين مالجديد ، ما نحبش يڨولو " خميّس ولد بن عياد " يلبس في مرتو مالفريب ، نحبك تاخذي آش تحبي و كان نقصك فلوس ، نا هاني ڨاعد في قهوة الإستقلال نستنى فيك أبعثيلي طفل تو نجي نزيدك !!
تفكرت برشة حاجات باهية ، تفكرت أيام العيشة المرتاحة و أيام كان الذل و الجوع و الميزيريا تسمع بيهم سمع من بعيد لبعيد ، تفكرت و هي سارحة هكاك دموعها زادت هبطت آما بسكات و هي تدوح في راسها ...

قامت من بلاصتها هي متركزة على عكازها ، قامت و مشات جابت البابور و شعلتو و حطت تطيب في براد تاي ، عمرت البراد و مشات تعكز ، خطوة خطوة للباب ، طلت تلقاش العايش مروح و لا تلقاش واحد مالحومة تسألو عليه ، طلت و حد ما وفى نظرها الشارع فارغ و البطحة فارغة !!
رجعت تمشي بالخطوة الرصينة ، و رجعت لتركينتها متاع العادة ، فوق الجلد و الكليم متاع العادة حذا قلة الماء متاع العادة و قدامها البابور و البراد متاع التاي متاع العادة ....

رجعت قعدت ، ستوات البراد و سرحت في النار متاع البابور ، و عاود هزها خيالها ....

هزها خيالها المرة هاذي ، لأيام الي كانت فيها صغيرة ، وقتها كانوا زواولة في دارهم ، على قدهم ، كانت أمها تشري ب 20 فرنك قهوة و تنفخها في الماء و ياكلو منها الأخوة الكل باش يمشيو يقراو ، و هي سارحة سألت روحها علاش وقتها الميزيريا ما كانتش تتحس ؟ علاش وقتها كانت عايشة و راسها ما فيهش هموم ، علاش وقتها كانت ما تخممش في الفقرو الجوع ، تفكرتو قت كان عمرها 5 سنين ، وقتها كان بوها الله يرحموا يهزها يعمل بيها دورة على البهيم و تعمللها كسكروت بالتاي و هي ، شعرها مطعطش و لبستها مسخة و كانت فرحانة ! وقتها دورة على البهيم مع بوها بالدنية و ما فيها .

و هي سارحة في النار ، مدت يدها بالشوية بالشوية للبراد و هي موش مركزة و دموعها بدات تشىح على خدها ، و هي هكاك حست بسخانة !! حرقت يدها !! جبدتها بنطرة ياخي تكب براد التاي و طفى البابور !!
سكرت البابور و قامت تلوج على حاجة تمسح بيها ، دخلت للخربة إلداخل وين الخزانة ، عرضتها تصويرة قديمة معلقة على الحيط ، تصويرة حتى لو دار الزمان ما عادش باش تتعاود ،
تصويرة عايلتها ، هي و أمها و بوها و أخوتها وقت كان عمرها 7 سنين ، وقتها الفرانسيس إلي كانت أمها تخدم عنهم صوروهم ، و التصويرة قعدت عندهم ! تصويرة بالألوان في وقت ماكانش فمة تصاور أصلا في الدوار ! سرحت فيها و تفكرت هاكا النهار متاع التصويرة وقتها ، بوها الله يرحمو قبلوه في الجيش ، يعني ماعادش باش يخدم عند العباد وقتها تونس مازالت كيف إستقلت و الجيش مازالوا يشكلو فيه و بورڨيبة خرج في الراديو قبل بجمعة و قال إلي الجيش التونسي باش يقبل المطالب الكل خاطر بنزرت مازال فيها جنود فرنسيس و لازم تتحرر !! وقتها بوها فرحان شرالهم ڨازوزة و بسكويت و عملو حفلة صغيرة في الدار و حظروا معاهم العايلة متاع الفرنسيس إلي كانت تخدم عنهم أمها . تفكرت كيفاش وقتها أول مرة تشوف بوها يشطح و كيفاش أول مرة تاكل صحن كامل بسكويت و كيفاش نهارتها خرجت قدام الدار هي و بوها و هزها للحانوت و شرالها زوز كعبات حلوى و قلها ما تقولش لأخوتك ...
تفكرت برشه حاجات ، و هي سارحة كيف العادة ... سمعت صوت تدقديق على الباب ، تدقديق موش عادي ، بالقوي و متاع واحد يزرب ، مشات دوڨة دوڨة للباب و التدقديق مازال و ماشي و يزيد ، تسمع في صياح ، يا خالتي " رابحة " حل !! حل !!
قلبها سخف ، و يديها ولاو يرعشوا ، حست حاجة غريبة عمرها ما حستها ! حست بحاجة ما فهمتهاش آما حست إلي هي حاجة موش باهية ، زربت خطوتها شوية بالي تقدر عليه و هي تعكز بالعكاز ، وصلت للباب و الصياح مازال ، حلت الباب .... و قلبها صدق !!!!

يتبع إن شاء الله 

الجزء الأول من رواية : المغبونة

الجزء الأول من رواية : المغبونة
تأليف :  دجو
______________________________
... جرات وراه لفم الباب ، الفولارة متاعها على أكتافها و شعرها هايج ، وجها أحمر و عينيها الكلها دموع ، جرات وراه و هي تتطايح ، الكبر عامل فيها و هو ماشي مخيلها وراه ، يمشي بخطوات رصينة مقدم صدروا و هاز راسو ، كيف تشوفو تحسوا عارف روحو فين ماشي ، عارف ثنيتو ، عارف طريقو ، عارف آش إختار .

طاحت و هي تجري و صاحت تبكي :
ـ ياوليدي !! علاش خارج !! الدنيا شاعلة لبرة !! الكرطوش ما يفرقش بين أنثى و لا ذكر !! بين كبير و صغير !! ماني ميمتك !! علاش تشويلي كبدتي هكة !! راك مازلت صغير !! الكلاب ربي يهدهم، شكون باش ينجمهم ، الكرطوش في يديهم يقتلوك و ما يرحموش !! علاش تكويني فيك ، راك إنت الي خرجت بيه مالدنية !!
سمعها ، عينيه رغرغت بالدموع ، وقف ، تلفتلها شاف حالتها ، قلبو سخف ، رجعلها ، عينيه بكلها دموع ، آما فمة حاجة غريبة فيهم ، دموع متاع إنسان ضعيف صحيح لكن فمة حاجة من داخل كانت تقول إلي فمة قوة جبارة فيهم !! كب عليها و هو يبكي باسها من راسها و و كب على يديها يبوس فيهم و يبكي ، هز راسو ، عينيه في عينها ، تبسم و عينه كلها دموع و قالها :

ـ يامي !! كيف إنت تشدني و تقلي ما تخرجش ، و كيف زهرة أختك تشد محمد علي ولدها و كيف مبروكة جارتك تشد لسعد و حمة و خميس ولادها !! هالبلاد !! شكون باش ياقفلها !! و هالكلاب شكون باش ياقفلهم !! هالفقر و الميزيريا الي عايشين فيها كيفاش باش نخرجوا منهم !! الدار الي يحبوا يفكوهالنا !! شكون باش يوقفهم ؟؟ ماو لازم نخرجولهم !! يامي راك جبت راجل وربيت راجل و كبرت راجل !! كيفاش تحبني اليوم نشد الدار و آنا نشوف فيهم يقتلوا فينا على بعضنا عامل ولا موش عامل !! يامي ربيتني و قتلي الظلم كفر !! يامي راك تعرف ربي !! رآك ربيتني ما نظلمش غيري و ما نخليش شكون يتظلم قدامي !! يامي ؟

هزت راسها و بدات تهدى شوية ، هو كيف شافها هكاك زاد تبسم ، و قلها :

ــ تتفكر وقت جاك عم حمد و آنا صغير يشكي بيا على خاطر شدني متشعبط على الحيط و نسرق في البوصاع من الشجرة متاعوا !! تتفكر آش عمتلي يامي وقتها ؟؟؟ عطيتني زوز كفوف قداموا يامي !! و كملت قتلي كلمة عمري ما ننساها !! قتلي... متاع الناس للناس و كان ما قدرتش باش تعمل كيفوا أرضي بالي كتبلك ربي ... وقتها يامي ما عندكش فلوس !! وقتها كنت إنت تخدم في الديار باش تكبرني !! نتفكر وقتها مشيت للخضار متاع الحومة و كرديت زوز كيلو بوصاع و قسمتو كيلو كيلو ! كيلو قتلي هذا ليك برد فيه قلبك وحدك ! و كيلو عبيتهولي في ساشي و بعثتني لدار عم حمد و قتلي مدهولوا و أطلب السماح !!
تتفكر يامي ؟ كان نسيت آنا مازلت نتفكر !!

هزت عينيها ، غزرتلو غزرة غيبة و زادت تطرشقت بالبكاء !! هي تعنق فيه و تبوس !

كمل كلامو و هو يهز فيها مالقاع :

يامي !! كان تتفكر بعدها بنهارين !! آنا قاعد معاك في الدار ، راسي على حجرك و إنت تلعبلي على شعري تحكيلي على بابا الله يرحموا كيفاش كان راجل و الناس الكل تقدروا و تشهد بيه ، وقداش كان عامل مليح في حياتو و كيفاش كان على نياتو ، حكيتلي وقتها و قتلي الزيتون و الفيرما و الغنم متاع عمك حمد !! هذاكا رزق بوك الله يرحموا ، بعد ما مات هو لم الملمة و إلي فمة و عطانا هالخربة هاذي و قلنا إحمدوا ربي !!!
حكيتلي وقتها و قتلي مشيت للمحكمة و رفعت قضية ، خسرتها ، و كيف سألت علاش قالولك :
يا مدام سي حمد نسيبك ، ما ينجموا حد !!! راهو عندو الأكتاف !! راك ما تنجموش !! راهو العمدة هنا !!
عم حمد الي جاي يعارك فينا و يسب فينا على كعبتين بوصاع نحيتهم آنا من شجرتو باش نجيبلك كعبة و ناكل كعبة !! الشجرة إلي جاي يعارك عليها ، زارعها على رزقنا يامي !!
وقتها قمت و قتلك !! يجي نهار يامي !! و رزقنا يرجعلنا !! يجي نهار و نرجع رزق بابا !! يجي نهار و نخرج الظالم منها ، يجي نهار نكبر و نولي قد عمي و نولي قوي و نجم نغلبو !!
وقتها يامي ما فهمتش حكاية القانون و المعارف و المحاكم ، في بالي ما نجمتش ترجع حقك خاطر هو راجل و قوي و إنت مرا و ضعيفة ، في بالي على خاطر هو يغلبك و ينجم يضربك !!
هكة مشى في بالي !!
آما اليوم يامي !! كبرت ، و فهمت ، يامي راني كل ما نتذكر قداش تشحطط عليا من خدمة لخدمة في الديار و في الذل و قداش من مرة روحت تبكي و آنا مش فاهم علاش ، بعد نسمعك تحكي مع أختك تقلها راو مول الدار حب يتعدى عليا ، إنت وقتها كنت نوارة في عز شبابك ، راجلك يرحمو و ينعمو خلالك رزق آما الظالم هز الرزق و خلاك تكبر في صغير وحدك ، ساكنة في خربة ، في العيد يامي ! كنت نحسها و ما نقولش باش ما نبكيكش !
ولاد عمي في العيد الصغير يجيو يتفوخروا بآش شرالهم عمي ، لبسة و لعب و فلوس متاع مهبى ، وآنا لابس هاكا الكبوط المقطع و السروال المرقع و الصندال في عز الشتاء ! وقتها كنت نموت بالحمصة !!
على خاطر هوما يتفوخروا قدامي برزقي و رزقك و رزق بابا يرحموا !! وقتها يامي ، كنت نمشي للسطح و نقعد نبكي وحدي ، ما نحبش نبكي قدامك ، خاطر ما كنتش نجم نشوف دموعك !
في العيد الكبير يامي ؟ كنت كيف نشوف أولاد عمي يدورو بزوز علالش ، كبش للعرك و كبش للذبيحة ، يدوروا و يتفوخروا بيهم قدامي ، أولاد الحومة الكل يامي ، كانوا بعلالشهم و كباشهم كان آنا يامي !!
وقتها كنت نهرب نمشي لحضنك ، تقعد تلعبلي على شعري ! و تحكيلي على بابا يامي ، تحكي و إنت تبكي و آنا نبوس و نسكت فيك يامي ! نهار العيد كنت نشم في اللحم المشوي من دار عمي و ديار الجيران ، و كنت نراك كيفاش تلوم في وجهك قدامي و آنا كنت نقلك : ما نعرفش كيفاش ينجموا ياكلو اللحم يامي ! إخخ نعافو آنا !! كنت يامي نتشهى في لحمة آما كنت نحشم باش نتكلم باش ما نشوفش دموعك يامي ! نتفكر وقتها ! كنت تمشي تكردي فخذ دجاج و تعطيبهولي كاملو تقلي : آيا آش كون كيفك يا حلوف هوكا فخذ كامل ليك إنت !! و آنا نبدى فرحان ، صحيح حاسس على خاطر أيام اللعب مع العلوش ما كانش عندي علوش ، نسرح بيه و نعرك بيه مع أولاد الحومة ، آما وقت تحطلي إنت الصحن ! كنت نطير بالفرحة ، المشكل إنو فخذ واحد !! إنت تقلي ما عينيش باش ناكل لكن آنا كنت نفهم إلي إنت ما عندكش فلوس باش تاخو واحد آخر ، ناديلك باش تاكل معايا ، تقلي لا ما نحبش هذاكا ليك إنت ، نشد فيك صحيح و نحلف ، تاخو شوية و تقلي هاو على والله !! تتفكر يامي؟؟ وقتها صحيح كنت صغير و ما في مخي شئ آما وقتها كنت كل ما نجي باش نرقد ، نقرى شوية قرآن نقول نكبر و نولي راجل و نولي قوي ، نغلب عمي و نرجع رزقنا !! صغير وقتها يامي !! آما هاكا وعد قطعتو على روحي يامي !!
اليوم كبرت !!! و عرفت إلي المشكلة موش مع عمي !! المشكلة مع الكلاب الي متحنش بيهم عمي !!
المشكلة موش في عمي و لا في ولادو ، المشكلة في الكلاب إلي يخدم عندهم عمي ، عمي مالو إلا بعبوص كبار في شكارة كبيرة !! اليوم يامي ، هالشكارة باش تتفلق ! الرجال و النساء المغبونين كيفي و كيفك ، خرجوا اليوم للشارع ، خرجوا باش يقصوا يد السارق باش يرجعوا أرزاقهم و أرزاق المغبونين الي كيفهم ، اليوم خرجوا و قدام عينهم كان قصان يدين السارق و الظالم !!

كمل آخر كلمة هو يهز في أمو مالقاع ، وقفت على ساقيها و عينيها كلها دموع ، باستو من راسو و قتلو برة ! برة ربي ينصرك على مين يعاديك !! ما نرضى عليك كان ما تقصلهم يديهم !
باسها من راسها ، تلفت و نحى مريولو ، لف بيه على وجهوا هز حجرتين و مشى بخطوات رصينة حتى وصل حذى صاحبو أيمن إلي كان يستنى فيه و كملو ثنيتهم ماشين في ثنية مركز الحرس ...
هو مشى و هي وقفت في فم الباب ، قعدت تبع فيه بعينيها حتى لين غاب و هو و صاحبو ، قلبها عصر عليها آما تقوات باش ما تناديلوش ، دخلت ، جبدت السبحة و رجعت لتركينها متاع العادة ، تحت الشباك متاع الحوش ، على الكليم و الجلد متاع العادة و قدام القلة متاع الماء متاع العادة ....


يتبع إن شاء الله

لماذا إنحدر مستوى الإعلام الموازي في الفترة الأخيرة ؟

لماذا إنحدر مستوى الإعلام الموازي في الفترة الأخيرة ؟
ـــــــــــــــــــــــــــــــــــــــــــــــــــــــــــــــــــــــــ

يعيب البعض على صفحات الفايسبوك الملتزمة و المدونات السياسية إنحدار مستواها و تحزبها و تغليبها لولائها الأيديولوجي المطلقعلى حساب مصلحة الوطن العليا ، هذه الصفحات و المدونات التي لطالما كانت شوكة في حلق النظام النوفمبري و التي لطالما جوبهت بالحجب و واجه أصحابها و مشرفوها كافة أنواع التنكيل الفكري و الجسدي ، هذه الصفحات و المدونات التي كانت الذراع الإعلامي للمناهضي ذاك النظام حتى قبل ثورة 17 ديسمبر .
لست بصدد تبرير هذا الإنحدار و لست في محاولة لخلق الأعذار له ، و لكني فقط سأحاول في ما يلي وضع النقاط على الحروف و تأطير الإشكال حتى لا نخطأ الحكم :
ـــــــــــــــــــــــــــــ
تنقسم الصفحات الفايسبوكية الملتزمة و المدونات السياسية إلي نوعان حسب رأيي :
الأولى ناشطة قبل الثورة و الثانية بدأت نشاطها أو حولت خطها التحريري بعد الثورة !
لن أتناول بالذكر النوع الثاني ، لا تحقيرا لها بل في إنتظار إكتمال نضجها إلا من رحم ربي !
سأخص بالتحليل ، الصفحات و المدونات المتلزمة الناشطة قبل الثورة دون ذكر أسمائها !

لتناول الموضوع لا بد من توضيح عدة نقاط هامة ، حتى يسهل فهم موضوع هذا المقال :

أولا ماهو التدوين :
التدوين في السياسة و في معناه الأصلي : هو عبارة عن نشاط فكري حر لا يخضع لأي شكل من أشكال الرقابة حتى الرقابة الذاتية و هو عبارة عن تدوين للأحداث قصد توثيقها ، أو للأفكار الحينية قصد حفظها ، أو للتحليلات الخاصة قصد نشرها ، أو للتنظير لرأي ما عبر البحث و المجابهة بالحجة و البرهان ، و التدوين عادة لا يشابه العمل الصحفي لأن العمل الصحفي يكون مؤطرا بالخط التحريري للمؤسسة الناشرة ، أما التدوين فهو عمل فردي لا يخضع إلا للخط التحريري الذ يضبطه المدون و الذي ترجع له الحرية المطلقة في تجاوزه أو تغييره . كما أن الهدف من العمل الصحفي المحترف هو المال ، أي تجارة المعلومة أما التدوين فهو في مفهومه الأصلي نشاط فكري مجاني ، إذن فالتدوين هو بإختصار : ممارسة حرية فكر و تعبير مطلقتين في مجال إفتراضي دون أي شكل من أشكال الرقابة و دون أي سعي لربح مادي .

ثانيا ما الفرق بين المدونة و صفحة الفايسبوك :
يتفرع هذا السؤال إلى ثلاثة أسئلة :
ما الفرق بين المدون و الفايسبوكر ؟
ما الفرق بين التدوينة و المقال المنشور على الفايسبوك ؟
ما الفرق بين متتبعي المدونة و متتبعي صفحة الفايسبوك ؟

في ما يلي سأحاول الإجابة عن هذه الأسئلة الثلاث مجتمعة :

الفرق بين المدون و الفايسبوكر آخذ في التلاشي لأن الصفحات الفايسبوكية بدأت منذ مدة في إرتداء عبائة المدونة ،
إذ حين كان الفايسبوك مجرد شبكة تواصل إجتماعي قل ما يعنى بالسياسة ، كانت الصفحات تنشأ كصفحات حينية ينشؤها عادة مستعمل عادي للفايسبوك كمواكبة منه لحدث ما ، حينها كانت جل أسماء الفايسبوك كالآتي :
كلنا مع فلان ضد فلان، ضد نزول الفريق الرياضي X إلى الدرجة الثانية، مساندوا .... ،الفاعلون لكذا ...، معا لـــعمل كذا ...
و الصفة التي تختص بها هذه الصفحات أن عدد متتبعيها يتضاعف بسرعة هائلة في دقائق لمدة معينة ثم يقل بل ينعدم عدد منخرطيها الجدد بعد أيام ، فيجد منشؤ تلك الصفحة نفسه مشرفا على صفحة تضم الآلاف فقط لأن عنوانها إستمالهم لا جودة و لا مضمون نشرياتها ! فيستغلها فيما بعد ، بعد أن تمر عاصفة ذاك الحدث ، في غير محلها ، فإما أنها تصبح منبرا للتشهير بفنان أو لدعم فريق رياضي أو صفحة للمرح و نشر النكت إلخ ... بذلك يصبح لدى الفايسبوكر متتبعون لنشرياته ، مهما كان مضمونها بالآلاف دون أن يكون له مستوى ثقافي يذكر . آما الآن فقط لبست الصفحات الفايسبوكية عبائة المدونات و أصبحت تنشؤ ذات صبغة دائمة فنجد أن أسمائها أصبحت من النوع التالي :
المنبر، إذاعة قرطاج، الحقائق الخفية، تونس، كشف المستور
أي أنها أصبحت بمثابة مجلة إلكترونية تنشر فيها تحقيقات شبه صحفية و تحليلات سياسية منقولة عن محللين مشهود لهم أو لأصحاب الصفحة و يبقى معيار إختيار المقالات المنقولة أو المحررة ( إن صح تسميتها مقالات ) حكرا على ما يستميل المشرف ، الذي يكون عادة مستواه الثقافي أرفع و لو بقليل من مستوى صاحب الصفحات الحينية ، و تبقى مسألة تزايد عدد أعضاء الصفحة مرتبطا بجودة نشرياتها
و هذه الجودة مرتبطة بكفية الطرح الذي يكون عادة جادا و ملتزما بالخط التحريري كما يكون جادا و متعمقا في البحث حيث أنه يكون عادة نتاجا لبحث معمق مدعم بدلائل ( تكون عادة في شكل روابط)
و هذا الأمر سيان بالنسبة للتدوينة .
أما أهم نقطة فهي الفرق بين متتبعي المدونة و صفحة الفايسبوك ، وهذا أمر نجيب عنه إذا طرحنا السؤال الأول : كيف أصبح العضو متابعا للمدونة أو الفايسبوك !
فبالنسبة للمدونة يكون عادة متتبعوها ما يسمى بـ" جماهير واب " و هم نوع من مستخدمي الأنترنات الذين لا يكونون سجيني موقع واحد و يبحثون عن المعلومة و يسعون إليها و بذلك فهؤلاء المستخدمين لا يلجون صدفة للمدونة بل بإرادتهم التامة و ذلك عبر إستخدام محركات البحث مثل " غوغل " أو عبر كتابة عنوان المدونة يدويا ! أي أن هذا المستخدم يكون عادة متتبعا وفيا لتلك المدونة دون سواها أو يكون ولوجه إليها باحثا عن معلومة معينة فيكون مستعدا لقراءة تدوينة طويلة أو مقال مفصل حول موضوع معين ، و يمتاز هذا النوع من المستخدمين برقي تعليقاته و مداخلاته التي تعبر عن رقي مستواه الثقافي فحتى لو إختلف معك في طرحك يقوم بعرض طرحه مدعما بحجج ، أما في ما يخص متتبعي صفحات الفايسبوك فيكون ولوجهم عادة للصفحة للمرة الأولى صدفة ، أي نتيجة لإشهار ، أو إعجابه بإسم الصفحة أو لإعجابه بنشرية صادرة عن الصفحة ( كفيديو ، أو صورة أو مقال ) قام بنشرها صديق له ! و بالتالي إنضمامه للصفحة لم يكن بحض إرادة كاملة منه بل تأثرا برأي أو مضمون معين قد لا يكون ملتزما بالخط التحريري للصفحة !
و يكون عادة هذا النوع من المستخدمين سريع الملل باحثا عن المعلومة السريعة و بإقتضاب ، فنجده رافضا لأي تحليل أو طرح و بصفة عامة أي مضمون يختلف مع رأيه دون الإستشهاد بالحجج يكون عادة منعدم الإلمام بآداب الحوار و النقاش لأن الخط التحريري و مواضيع الصفحة التي إنضم إليها لا تدخل في محاور إهتمامه ! وهنا نجد أن التعليقات في صفحات الفايسبوك و النقاشات التي تدور فيها تكون عادة سطحية الطرح و عامة و شعبوية .
و هنا يكمن الإختلاف الجلي بين المدونة و الصفحة الفايسبوكية فجودة النشريات و و عمق الطرح و نوعية المتتبع تختلف بين الإثنين !
وإنطلاقا من هذا الطرح نجد أن المدونة هي بحق تمثل إعلاما موازيا أما صفحات الفايسبوك فهي مجرد وسائل دعاية ( بروباڨاندا )!

ثالثا : مالفرق بين الإعلام الإلكتروني الموازي ( ما يسمى بإعلام المواطن ) و الإعلام الرسمي الملتزم ؟

الفرق شاسع بين الإثنين !
فمن الناحية الإقتصادية : لا يسعى الأول للربح المادي من وراه نشاطه بل يسعى فقط لنشر مجموعة آراء تخص صاحبه أو تخص من يتفق مع صاحبه في الرأي بينما يسعى الثاني للربح المادي من وراء ما يسمى تجارة المعلومة و تجارة الآراء !
كما تقتصر التجهيزات و الأدواة المستعملة في الإعلام الموازي على تجيهزات غير باهضة : حاسوب ، ربط أنترنات و كامرا بي بعض الحالات و يعتمد في إستقاء المعلومة على شبكة من الأفراد متوزعين في كافة جهات القطر، و غير محترفين و لا يتقاضون أجرا على ما يقدمونه من خدمات في حين يكون الإعلام الموازي مجهزا بتجهيزات متطورة و باهضة الثمن و يكون مدعما بأسطول كامل من الصحفيين المحترفين المجندين فقط لنقل المعلومة .
و من الناحية المهنية : يكون عادة الإعلام الموازي غير مطلع على طريقة نقل المعلومة و قدسية الخبر ، أي نقله دون إبداء لرأي خاص ، فتنقل المعلومة التي تخدم آراء ناقلها و يتم تجاهل المعلومات الأخرى كما تنقل فقط المعلومة التي يراها ناقلها مهمة و يتم تجاهل ما لا يراه مهما و عادة ما يكون تقييمه لمدى أهمية المعلومة غير خاضع لمعايير علمية في حين يكون الإعلام الرسمي ( في صورته المثالية ) ناقلا لكل المعلومات مستقلا عنها أيما إستقلال كما يكون متأهبا لإكتشاف المعلومة بسرعة ( لا أتحدث عن نقلها فالإعلام الموازي يفوق الرسمي في هذه النقطة بأشواط ) .
و من هنا يمكننا أن ندرك أن المعلومة تساوي المال ، أي أنها مكلفة و هنا ندخل في مفهوم تجارة المعلومة أي أن المعلومة المقدمة لها تكلفة مادية معينة تسعى وسائل الإعلام الرسمية لبيعها و ذلك عبر تغطية كلفتها و ربح المال منها !
و إذا تحدثنا عن المال تحدثنا عن الفساد ، فهناك معلومة قد يسعى البعض لطمسها و ذلك عبر السيطرة على وسائل الإعلام الرسمية أو عبر رشوتها كي لا تفشيها ( الرشوة لا تكون فقط عبر المال ) و هذا ما يفسر تجاوز بعض القنواة الفضائية لبعض الأحداث حتى المهمة منها :
مثلا :
زيارة العاهل القطري لإسرائيل و عدم تترق الجزيرة لها
أحداث البحرين و تجاوز القنواة الخليجية لها
أحداث الثورة التونسية و تعتيم الإعلام الرسمي عليها

تكبيل الإعلام الرسمي و التحكم فيه من قبل جهات نافذة هو ما تسبب في نشأة الإعلام الموازي كمحاولة لنشر ما يتجاوزه و اعادة طرح ما يتتجاوزه الأول و أو يحرف حقيقته !

و بناء ا على هذا الطرح ، بقى الإعلام الموازي محاولة جريئة لخلق إعلام حر قد ينجح أحيانا و قد يفشل أحيانا و لكنه لا يرقى لطرحه كإعلام يعوض الإعلاما لرسمي ، بل هو فقط مجرد مراقب له و منبر لنشر الأفكار !

إذن لو تعمقنا في التحليل ، سنجد أن الإعلام الموازي ، أو إعلام المواطن كمصطلح أصح هو محاولة غير محترفة و غير ناضجة تمام النضج لخلق إعلام رسمي يمكننا إعتماده كمصدر صحيح للمعلومة أو للتحليل السياسي المنطقي الخاضع لمعايير علمية ، كما أنه غير قادر على إستقاء المعلومة و نقلها بشكل صحيح نظرا لعدم قدرته على منافسة الإعلام الرسمي المدجن بقدرات مادية ضخمة !
قد نلجأ إليه كمصدر غير رسمي لإستقاء المعلومة أو لتبادل الأفكار أو للدخول في صراع الفكري مع الآخر أو للتعبئة لقضية ما و لكن حتما لا يجب إعتباره مصدرا صحيحا !
قد تنجح بعض المدونات أو بعض الصفحات في تطوير مستواها و لكن تبقى نسبة الخطأ فيها واردة أكثر منه في الإعلام الرسمي و طبعا الشاذ يحفظ و لا يقاس عليه ، كما تبقى هذه المدونات أو الصفحات منبرا لتمرير فكر معين ( فكر صاحب المدونة أو الصفحة ) و هذا سبب آخر يمنعنا من عتاب إنحراف الإعلام الموازي عن خطه فصاحب المدونة أو الصفحة لم ينشأ هذا المنبر إلا لتمرير فكر معين يؤمن به .
إبان الثورة توحدت الصفوف لأن العدو كان واحدا و لأن الجبهة كانت واحدة و لأن المسعى كان واحدا : إسقاط نظام نوفبر ، و بعد فرار بن علي إختلفت هذه الصفحات و المدونات ( أصحابها و مشرفوها ) حول مدى نجاح الثورة ، فمنها من إعتبر أن النظام لم يسقط و واصل نضاله و طرح رأيه و التعبئة له لإستكمال الإحتجاجات و ذلك إيمانا منه بأن المرحلة الحالية هي مرحلة تطهير و منهم من إعتبر النظام سقط بفرار بن علي و أن المرحلة هي مرحلة إصلاح هيكلة الدولة و إرساء ركائزها و منهم من إعتبر أن فترة التطهير و فترة الإصلاح قد تمت و آن أوان بناء الدولة الجديدة !
و طبعا كما إختلفت المدونات و الصفحات ( طبعا هي حاملة لتوجهات أصحابها ) إختلفت الأحزاب و إختلف أطروحاتها و بالتالي أصبح هناك تقارب في وجهات النظر بين المشرفين و بعض الأحزاب و هذا ما نتج عنه تحزب بعض الصفحات و المدونات ( بتحزب أصحابها ) أو تعاطفها مع بعض الأحزاب و التيارات السياسية ( بتعاطف أصحابها معها ) .
كما دخل المال السياسي في الإعلام الموازي أشتريت ذمة بعض المشرفين و أصبحت بوقا لهذه الأحزاب ( شأنها في ذلك شأن وسائل الإعلام الرسمي )
إذن فالسؤال الإستنكاري الذي قد نجيب به أنفسنا عن السؤال الدي إنطلقنا منه هو :
ماذا يمكننا أن ننتظر من الإعلام الموازي !
ـــــــــــــــــــــــــــــــــــــــــــــــــــــ