القصبة 2 ... الحقيقة للتاريخ !!

أيام القصبة 2 ، آنا وقتها راكش في الخيمة الإعلامية ، نعدي في بث مباشر و نعمل في حصص إذاعية صحبة صديق ، و نحاولوا نقنعوا في العباد باش تجي تعتصم معانا ، بما أنو الولاد الكل تعبوا وقتها و الخروج من القصبة دون تحقيق أي نتيجة يعتبر وقتها مذلة ، وقتها عملت أكثر من عركة في وسط الخيمة ، إلي على فكرة كانت المكان إلي يدير و ينظم في الإعتصام الكل ، نتفكر وقتها الناس الكل معارضة الحكومة لكن حتى واحد ما عندو بديل و كل ما يجي شكون يطرح بديل و حل و مبادرة ، كانوا بعض المتواجدين و إلي لسوء الحظ فرضوا رواحكم في هيئة التنظيم و ولاو بكلمتهم ، يتهموه بالإندساس و بخدمة مصالح شخصية و سياسية ضيقة و يتهموه بالخيانة و يطردوه مالقصبة ، و كان تتفكروا وقتها لوغة مندس تدور هي الموضة السائدة ، يعني كيف تخرج مطرد بفيلم و هيلمان مالقصبة ، المعتصمين ديراكت يقولك : بوليس سياسي مندس ... و تركح فيك المشطة و البونيا .... حاصيلو وقتها كنا نجموا نلقاو تفسير للحكاية هاذي ، بما أنو برشة أحزاب و أطراف سياسية حبت تركب على الإعتصام و توجهوا ، عملا بسياسة الرزڨ ميتة ماليه ، الخبزة الباردة بلوغة أوضح ، الحاصل ، وقتها توزعت برشة بيانات إما منسوبة لأطراف موش معروفة تقترح في حاجات تتعارض مع مطالب القصبة 2 ، و إما منسبوة زورا لأطراف سياسية وقتها كانت داعمة الإعتصام و تتضمن زادة مطالب زايدة على إلي تم الإتفاق عليه قبل الدعوة للإعتصام !!
آما ما نعرفش علاش وقتها ربي عمالنا عينينا ، على برشة تجاوزات كان تصير في هاكا الخيمة و صادرة على نفس العباد هاذم ، كيف مثلا ستيكات الدخان إلي كانت تتشرى بفلوس التبرعات إلي نورمالمون كانت مرسومة باش نشريو بيها غطاء و ماكلة ، و كيف زادة المواقف إلي تتبدل كل ساعة بعد عند الناس هاذوما و الله أعلم السبب ، و كيف الكيران إلي كانت تجي من كل حدب و صوب و كيف تسأل منين الفلوس يقولولك مالتبرعات ، و كيف زادة الدعوات إلي كانو يوجهوها لكل من يعارض مواقفهم باش نجبدوا رواحنا و نمشيو لبلاصة أخرى نظمو منها الدنيا الكل و فمة لوكال للمبات و فمة كل المرافق و كيف زادة الكلي 3 جي إلي كان معلق في رقبة كل واحد منهم و البيسيات إلي سيري كاسارونا جدد هابطين ، إلخ إلخ ...
الكلام هذا ما يعنيش إLي الخيمة هاكي كانت كلها مشبوهين ، لا بالعكس برشة كانوا مواقفهم ثابتة و إلتزموا إلتزام مبدئي بالمطالب إلي حطيناها من أيام نبرمجوا بالسكايب و ما حبوش يميلو عليها ...
فمة مرة ، شعلت في زوز مالمشبوهين هاذوما ، وقتها طالبت كل واحد باش منهم باش يقدم مقترح و بديل لقيادة المرحلة القادمة ، تملصوا مالإجابة و إعتبروها تشكيك في وطنيتها و درا كيفاش تزلبطوا مالسؤال و دار عليا آنا التورني ، الحاصيلو ، آنا وقتها كنت داعم لمبادرة " أحمد المستيري " إلي كانت مطروحة بقوة وقتها ، علاش ؟ كيفاش ؟ موش هذا موضع كلامنا توة !!
وقتها دافعت عليها المبادرة بقوة ، و الحجة متاعي كانت غياب أي مبادرة أخرى و لو من صلب القصبة !!
آنا حجتي غياب أي مبادرة واقعية أخرى ، الواقعية هاذي حاجة نسبية و ديما نقول موش هذا موضوع الكلام ، و حجتهم كانت لا لا هات نطيحوا الغنوشي ، و نشدد على الغنوشي دون المبزع ، و بعد تو نحكيو !
وقت تشددت في الدفاع على المبادرة هاذي ، إتهموني بخدمة مصالح ضيقة ، فمة شكون مالمسيرين المشبوهين ، شافوني فادد إستغلوا الفرصة و جاو إستدعاوني باش نمشي معاهم لبلاصة ، الله أعلم فين ، باش نكمل نبث الحصص الإذاعية متاعي ، و إلي وقتها كان عندها تأثير كبير في إستقطاب المساندين ، آنا وقتها رفضت ، لأنو وقتها وقع تسجيل زوز حالات غياب لزوز شباب مالمسيرين ، دون إعلام !
كيف رجعت للخيمة بعد ما برددت وجهي ، فمة شكون كان مساندني علنا و فمة شكون كان مساند في الخفى ، و فمة برشة لعبوها مسانديني و هوما عاملين سيستام الحلاب باش يطيحوني قال شنوة آنا ماخو فلوس ، و فمة شكون كان معارضني علنا ! لكن تجاهلت الكل و كملت البث دون التطرق للرأيي الشخصي ...
الحاصيلو ، واصلنا هكاك حتى لين عملنا دعوة لـ"جمعة الغضب " وقتها كان يلزم نتجندوا باش نحتلوا الشارع ، و نعبيو أكثر ما يمكن باش نظهروا إلي أحنا عندنا الشرعية الثورية وشرعية الشارع موش الحكومة ، تجندنا الناس الكل باش نجحوا الإفانمون ، تكون تحرك كبير و سلمي في الشارع ، يطيح الحكومة و يقترح بديل ، ديما إتفكروا إلي ما كان عندنا حتى بديل متفقين عليه ، على عكس المطالب إلي كنا متبنينها الناس الكل و لو إختلفت الصياغة متاعهم ...
نحطكم في الإطار :
ناس زواولة للبرد فرك لا دورو لا ، ياكلو ماتبرعات ، في عز الشتاء بلاش غطاء ، عندها أيام مرمية هكة في الشارع معظمهم بعاد على ديارهم ، جايين بعقلية الثورة إلي تولدت جديدة في مخاخهم و ما تحركت حتى شعرة للحكومة ... لازمهم يروحوا بأي حاجة ، أي تغيير كانوا باش يعتبروه إنتصار حتى ولو كان سلبي ، المفيد بدلنا حاجة ...
أحنا كنا حاسبينها مليح الحكاية هاذي ، الناس تعبت و القصبة بعد ما جاو الناس تصوروا و هبطوا تصاورهم في الفايسبوك ، سايي بداو يفقدوا إهتمامهم و دعمهم للقصابجية ، و ديما كنا حاطين في مخاخنا عقلية التونسي ، القلوقي إلي يجرب حاجة و فيسع ما يفد منها ، التونسي جرب الثورة و هواها وقتها مازال سخون ، ممكن صعبت على ذوي القلوب الضعيفة القصبة 1 لأنو البلاد وقتها موش راكحة ، وقت جات القصبة 2 و تأكدوا العباد من عدم نية الحكومة إستعمال العنف لفك الإعتصام ولاو ماشين جايين و قال شنوة متعاطفين ، آما لاحظنا الناس ماشية و تنقص و زيد ن في الأحياء البورجوازية عملوا إعتصام آخر يعارض الإعتصام متاعنا و كنا حاسينو وقتها بدا ياخذ في شعبية على حساب إعتصامنا ..
يعني كنا واعين بالڨدا إلي أحنا موش باش نجموا نحافظوا على قوة الإعتصام و شعبيتة لمدة طويلة ، دونك كان يلزمنا نستعملوا آخر رصاصة عندنا ، تحرك كبير يظهر حجم الدعم الشعبي لإعتصامنا ...
خدمنا وقتها بالي نجمنا و خلقنا بروباغابدا كبيرة و خدمنا وسيلة الإعلام الوحيدة إلي كانت بيدينا ، الفايسبوك ، و إلي من حسن حظنا كانت وقتها أكثور وسيلة فعالة ، كنا وقتها نعرفوا مليح إلي هاذي الكرطوشة الأخيرة إلي عندنا ! كان صابت نربحوا و نخرجوا بريوس مرفوعة و كان خابت باش نروحوا لديارنا بريوس طايحة و كلها ذل !!
لأنو وقتها في حالة فشل التحرك هذا باش يظهر حجمنا صغير و حتى الحكومة وقتها باش تتشجع و تستعمل العنف ، إلي وقتها كان مرفوض و تحاول تتجنبوا نظرا لحالة الإحتقان ، و لا حتى في حالة نجاح التحرك هذا و إصرار الحكومة على الإستمرار بعناد ، كانت وقتها حكاية شبه مستحيلة إنا نعاودوا تحرك آخر كبير في ظرف زمني قصير !
حاصيلو عملنا إلي نجمنا و نجح التحرك و قعدنا نستناو في النتيجة إلي ما بطاتش برشة و الغنوشي إستقال ...
فرحنا وقتها و فرحنا معانا برشة ناس و حسينا رواحنا إنتصرنا و حققنا كل مطالب القصبة ، كيف العادة عمانا ربي على حاجات صارت قدام عينينا ...
مثلا قبل بليلة مالتحرك متاع " جمعة الغضب " تعدات كرهبة 206 حمراء ، ما نعفش لتوة كيفاش تعدات الجيش و الباراجات إلي عاملينهم أحنا و الكنترول و كل شيء ... تعدات تجري و ضربت كرطوش جات من شيرة المحكمة و طلعت مع الجامع ، وقتها هبطنا الخبر و فسخناه فيسع باش ما نفجعوش العباد إلي باش تجي من غدوة ، حاجة أخرى في ظل هاكا البلبلة إلي صارت و حالة الهيجان ، فقدنا 4 مسيرين مالمشبوهين ، دارت حكاية إلي بوليس سياسي خطفهم و بعد جاونا قالولنا كنا نتعشاو و جاو إقترحوا علينا نتفاوضوا مع المبزع ...
إقترحوا علينا إنا نحكيو مع المعتصمين  ، و نقنعوهم بالآتي :
ـ تفاوضوا مع المبزع عبرهم هوما
ـ نقترحوا عليه 3 أو 4 أسماء يختار منهم هو واحد باش يكون رئيس الحكومة
ـ يعلن المبزع عن تعيين واحد مالأسماء المقترحة كرئيس حكومة تسيير أعمال
ـ يعلن المبزع عن بعث مجلس ثوري مالقصبة و لا شيء غير القصبة ، توكل إليه سلطة المصادقة على القرارت إلي باش تتخذها الحكومة
ـ يعلن المبزع عن موعد للإنتخابات المجلس التأسيسي

الحكاية إلي إقترحوها وقتها ، كانت مغرية برشة ، هوكا حافظنا على العمود الفقري للدولة كيف خلينا " الماريوانت " المزع يحكم و البلاد تقعد قصباوية !
بون عمانا ربي باش نسقسيو فين مشاو ، و علاش هكة بعد العشاء مالحيط هبط مقترح باهي و أحنا عندنا أيامات و أحنا نحاولوا فيهم باش يقترحوا بديل و هوما كانوا يتهربوا و اد عمانا ربي باش نسؤلوهم علاش عبرهم هوما باش نتفاوضوا معاه المبزع ؟؟ علاش موش عبر عباد أخرين مالخيمة الإعلامية و إلي نعاود نذكركم إلي هي كانت الدماغ إلي يحرك في الإعتصام الكل !!!
بون قبلنا لأنو المقترح كان بالحق باهي ! تحركنا يمين يسار ناقشنا المعتصمين حاولنا الماكس باش نقنعوهم بالحكاية ، فمة إلي قبل و مشى معانا في الخط و فمة شكون قعد بين بين و فمة إلي رفض رفضا قاطعا و كان راديكالي و طالب حتى بإسقاط المبزع !
المفيد خلقنا بوليمي في وسط الإعتصام رسات في إنو المقترح معقول و موش خايب ...
حاصيلو ، غابو علينا نص ساعة و رجعولنا قالولنا الليلة باش يلقي خطاب و سايي أقنعناه و قلنا إلي هي ثورتكم و إنتوما أحرار و هاكا الريق !!!
بون الأسماء إلي مشاتلو ، كان من ضمنها أحمد المنستيري ، أحمد بن صالح و واحد آخر ناسي إسمو ، آما متأكد موش السبسي !!
حاصيلو نسيت بالضبط ليلتها و لا من غدوة عمل المبزع الخطاب متاعو و أعلن تعيين السبسي على رأس "حكومة إنتقالية" و أعلن عن موعد الإنتخابات و عن لجنة الإنتخابات و عن عن اللجنة العليا لتحقيق أهداف الثورة و الإنتقال الديمقراطي و إلخ و إلخ و إلي قال وقتها حرفيا إلي إلي باش تكون متكونة الأحزاب و المستقلين !!
وقتها الناس فرحانة و تنڨز و تعيط و المعتصمين ، بسذاجة منهم ، بما إنهم بدلوا حاجة حسوا رواحهم إنتصروا و بدات الناس الكل تبارك لبعضها ...
نتفكر وقتها آنا و بعض مشرفي الصفحات و الناشطين الميدانيين قعدنا مبهمين و ما زدناش برشة و قصدنا ربي للدار إلي نسكن فيها مبهمين موش فاهمين شيء !
لوجنا على هاكا المنظمين باش نسألوهم على هالتكعبيرة إلي كعبروهالنا !! و باش نقولولهم إلي المفاهمة موش هكة و عمرنا ما تفاهمنا فيه هالكلام و إلي السبسي ماهوش مطروح أصلا في القائمة إلي تفاهمنا فيها !! شيء !!
فص ملح و ذاب !!
بعد بشهر ، فهمت اللابز الكل !!
بالصدفة عرضني واحد منهم في شارع الحبيب بورڨيبة !! قلي ماني عضو في الهيئة العليا لإلخ و إلخ و إلخ ...
=> القصبة 2 هي إلي قتلت الثورة !!! موش بسوء نية لكن بسذاجة المعتصمين فيها !! و إلي أولهم آنا .
إنتهى !

سامي الفهري : محاسبة أم إبتزاز ؟

قضية سامي الفهري ما تتناقشش من زاوية وحدة ، لازم نحطوها في إطارها ، 
سامي الفهري فاسد ، هذا لا ريب فيه 
سامي الفهري من أزلام التجمع ، هذا لا ريب فيه 
سامي الفهري بيدق طرابليسة ، هذا أيضا لا ريب فيه 
سامي الفهري متهرب من الضرائب ، هذا زادة ما ينكرو حد !
لكن ...
علاش الوقت هذا بالذات تشد ؟
علاش ما تشدش قبل ؟ 
علاش وقت إلي قناة التونسية ركزت برشة مع الترويكا تشد ؟
علاش وقت إلي قناة التونسية أصبحت الق

ناة التونسية الأولى دون منازع سامي الفهري تشد ؟
علاش وقت إلي قناة التونسية عملت أول برنامج حواري سياسي حقيق في تونس سي الفهري تشد ؟؟
القضية إلي راكبة لسامي الفهري وجهها مالي بالأساس ، لكن باطنها سياسي !
ناخذو مثال قناة "باعث الطحين" :
نفس القضية نورمالمون تركبلها ... و نزيدو فوقها حكاية نشر البلبلة في البلاد و بث نداء ات إستغاثة مفبركة من 15 إلى 17 جانفي 2011 ...
الفرق الوحيد بين سامي الفهري و باعث القناة ، هو إنو واحد لا دار لا مالي و لاخر راكز ركبة في البلاد !
كيفاش ؟
سي سامي الفهري ، عامل الدوانة مع بجبوج ، و ديجا نتفكرو الكل كيفاش حب يسكرلو القناة وقت كان في الحكم ، يعني القطب السياسي الأول موش باش يتكلم عليه ، نتعداو للقطب السياسي الثاني ، الخوانجية و من وراهم التريكا بويز ، سي الفهري حب يجيبها بليد و ركز معاهم برشة في المدة إلي فاتت ، و خرجهم طراطر قدام 10 ملاين مواطن ، و الكلنا نعرفو إلي بني خوجان لا يقبلون المزاح ، حلقة التمساح متاع لطفي زيتون أكبر مثال ، يعني سي سامي الفهري ، لا دار لا دوار ، بينما سي "باعث الطحين " عايش في إستمرارية تطحينة من قبل 14 جانفي ، يعني بالحق الراجل لم ينتظر 14 جانفي كيف ما قال ، بدا على بكري ، قبل 14 بن علي رئيسنا ، وقت الغنوشي طحين مستمر ، السبسي كيف كيف سيب علينا وليد الزراع و بعد مع النهضة ربى اللحية معاها و عطاها حقها ، الحقوق الحصرية متاع الأترفيو في مؤتمر النهضة أكبر دليل ...
ناخذو توة سي ولد بوه الحنين ، السيد هذا راكز بطبيعتو ، بغض النظر عن طحينو القديم ، السيد هذا خذا بوزيسيون شد فيها صحيح بعد 14 جانفي ، الحداثجية و ما أدراك ما الحداثجية ، و كان تتفكرو إنو أول من بدا يطبع مع التجمعيين و إستضافهم في بلاتوواتو ، يرجعلو أكبر دور في التسويق لنداء السبسي على أساس إنو منقذ البلاد من الظلامية ، يعني القروي ولد بوه الحنين و عندو كتف راكز وراه ، و كلنا شفنا التظامن الكبير معاه من طرف الحداثجية وقت قضية بارسيبوليس ، و كيفاش خرجولهولنا أول ضحية لحرية التعبير في تونس ما بعد الثورة ...
يعني يتمس سي فلان تخمج على بني خوجان ....
القضية الكل ، و كان من جاء بيدي القرار ، نعلقهم هاذم الثلاثة من شعر كرارزهم في المنڨالة و نسكرلهم هاكا المواخير متاعهم مرة وحدة و فسخ و عاود من جديد ، لكن إننا نستغلو قضية " مالية " بالأساس باش نسكتو بيها وسيلة إعلامية هذا يعتبر إبتزاز ، و كان مقلقهم برشة القضايا من النوع هذا ، نبداو على بركة الله :
حمدي المدب ، كمال لطيف ، شفيق جراية ، ولد المبروك ، بن ميلاد و القائمة تطول ...
أبداو بيهم هوما و هانا و راكم و بالحق تولي وقتها " إخبس " يا متاع الكبس يا إنتوما !!
و كان مقلقكم سوء إستغلال وسائل الإعلام ، نبداو بالجرائد و أحنا وصلين للتلافز مرورا بالإذاعات ، هاذم وحدهم يعبيو حبوسات تونس الكل !! و بالطبيعة عنبر خاص للعربي كسرة لأنو عندو إعترافات مسجلة عليه وقت تشد في حكاية الخيانة العظمى ، في أيامات حجومة الغنوشي ، وقتها نجبدو الدوسيات الكل ، صحيح حاكم التحقيق إلي حقق معاه ما نجموش نجيبوه ، لأنه إنتقل إلى جوار ربه بالصدفة جيست جمعة بعد ما حقق مع العربي طحين ، مات في حادثة إنتحار غامضة في بن قردان ، بعد ما تكسر و تنفى الغادي ، مع إحترامي لأهل بن ڨدان ،
خلي عاد كان باش نحكيو على ما يسمى " التورط مع النظام السابق " و فازات الوكالة التونسية للإتصال الخارجي ، عاد وقتها ما قل حد لحد ... هوكا المتورطين أون باڨاي ، يعبيو دبو الشراب متاع البكوش ! ( هاذي للبنازرتية ) ..
حاصيلو .... إلي دارو بالڨزاز ما يرميش دار غيرو بالحجر و نعاود نقولها ..
كان جاء بيدي نعلقهم الثلاثة ، الفهري غصرة و ولد بوه ، من شعر كرارزهم في المنڨالة و إلي يتعدى ينتف شعرة ....
بما مضمونو : يدهم و يد الجميع !

طــــــــــــــــز

إلى سيادة رئيس الجمهورية ، السيد المحترم محمد منصف المرزوقي ، أما بعد ،

طز ، طز ثم ألف طز ، في كل وصولي إنتهازي تغنى بمباديء الثورة من محاسبة و تحقيق العدالة الإجتماعية و محاربة للفساد و المحسوبية ، ثم ما إن تسلم السلطة حتى أصبح أكبر راع للفساد و المحسوبية و أبعد ما يكون عن تبني المطالب الثورية ، حتى إذا تكلم أحدهم و أحتج كان الرد : قدامك البحر برة أشرب منه !!

طز ، طز ثم ألف طز في كل من إعتبر تنمية العلاقة مع دولة أثيوبيا أهم من محاسبة قتلة الشعب و لكل من إعتبر تمكين الأطفال من زيارة القصر الرئاسي أهم من توفير مواطن الشغل لآلاف العاطلين عن العمل و لكل من إعتبر أن مشاكل الكشافة التونسية و التحاديات التي تواجهها أهم من مسألة فساد القضاء و الأمن و الإدارة !!!

إلى سيادة رئيس الحكومة السيد المحترم ، حمادي الجبالي ، أما بعد ،

طز و طز و ألف طز ، في كل وصولي إنتهازي تغنى بالدين و الهوية و جعل منهما محور مشاكل المواطن ، و جعل من قضية سطحية بلهاء كتجسيد الذات الإلاهية قضية محورية ، ثم ما إن تسلم السلطة حتى أصبح مهادنا لأعداء الدين و الهوية أكثر من الحداثيين أنفسهم و إذا إحتج أحدهم كان الرد : نحن نعارض محاكمة القناة المسؤولة عن هذا الفعل ، فنحن نحترم حرية التعبير و الإبداع 

طز ، طز ثم ألف طز في كل من لم يصبر أمام أحضان جون ماكاين ، سفاح الأمة و لم يطق لشوقهما صبرا فأرتمى بينهما كالعاشق المشتاق ، و طز و ألف طز في من وعد بتوفير نصف مليون موطن شغل و في ظرف سنة و لم يتسلم حقيبة وزارة التشغيل ، طز و ألف طز في من طبع العلاقة مع دول تأوي سفاحي و ناهبي شعبنا بحكم أن العلاقة معهما أهم من الأشخاص ، طز و ألف طز في من إستبله أتباعه بخطاب ديني يدعو لإقامة الخلافة الراشدة السادسة ثم تراجع بعد يومين عن هذا التصريح ، طزو ألف طز في كل من قال سنحكم بشرع الله ثم إعتبر مجلة الأحوال الشخصية إجتهادا إسلاميا مراعاة لبعض أعداء الدين متناسيا قوله تعالى : <<وأن احكم بينهم بما أنزل الله ولا تتبع أهواءهم واحذرهم أن يفتنوك عن بعض ما أنزل الله إليك فإن تولوا فاعلم أنما يريد الله أن يصيبهم ببعض ذنوبهم وإن كثيرا من الناس لفاسقون ، أفحكم الجاهلية يبغون ومن أحسن من الله حكما لقوم يوقنون >> 

إلى سيادة رئيس المجلس التأسيسي ، السيد المحترم ، مصطفى بن جعفر ، أما بعد ،

طز ، طز و ثم ألف طز في كل وصولي إنتهازي تغنى بالحداثة و التقدمية و جعل منهما محور مشاكل المواطن ، و جعل من المحافظين أعداء ا للوطن ، صورهم على أساس أنهم رجعيون يريدون بالوطن سوء ا ، نعتهم بالراكبين على الثورة ، ثم ما إن تم إنتخابه على هذا الأساس ، تحالف معهم و تناسى وعوده بمعارضتهم و الوقوف جبلا شامخا أمام مشروعهم الرجعي ، حتى إذا عاتبه أحدهم كان الرد : المصلحة العليا للوطن تقتضي التحالف مع الإسلاميين ، أي من نعتهم بالرجعيين و الراكبين على الثورة !!!

طز و طز ثم ألف طز ، في كل من خان أصوات مؤيديه و تحالف مع أعدائهم فقط للوصول للسلطة ، و طز و ألف طز في من قال شكرا لمن يدعو لتقطيع أيادي و أرجل معتصمين يطالبون بلقمة عيش ، و طز و ألف طز لمن نعت أعدائه القدامى حلفائه الجدد بالراكبين على الثورة و حين سؤل عن ماضيه النضالي قال : البوليس السياسي فشلي عجالي كرهبتي في عهد بن علي !! 

و في الأخير، إلى الشعب التونسي الذي و صف بالعظيم ، طز و ألف طز في من مازال سيصوت لأحزاب غير مبدئية تخلق من العدم مشكلا ثم تقدم حلا و تسوقه للعامة على أنه الحل لخلاصها ، طز و ألف طز في كل من إعتمد الأشخاص و حلول المشاكل الوهمية أساسا للتصويت و إنقاد بالطحين الأعمى نحو الموالاة المطلقة و أو المعارضة المطلقة .... 

طز لكل من لم يعمل عقله و طز في كل من لن يعمل عقله في آتي الأيام 

ملاحظة : الطز تشملني شخصيا لأني كنت من بين الذين إنقادوا وراء هذا المد و لم أفق من غيبوبتي إلا متأخرا !

ازدواجية شخصية المسلم ... احد اسباب سقوط الامة : الجزء الاول

احد اهم اسباب سقوط الامة حالة انفصام الشخصية التي يعيشها المسلم , و ان اردنا التعمق في اسباب و نتائج هذه الحالة المرضية و كيفية علاجها , وجب ضرورة التعمق في ماهية الشخصية السليمة للفرد و مكوناتها بشكل عام فشخصية المسلم و مكوناتها بشكل خاص ثم استبيان مواضع المرض فيها و كيفية علاجها .

في هذا المجزء الاول ساحاول , التعمق في تحليل ماهية الشخصية السليمة للفرد و مكوناتها .

تتكون شخصية الفرد عموما من مكونين اثنين :

ـ العقلية : وهي كيفية ادراك و فهم الفرد لمحيطه .

ـ النفسية : وهي اهواء, ميولات و احاسيس الفرد .

ولا يمكن باي شكل من الاشكال عزل هذين المكونين عن بعضهما , اذ تربط بينهما علاقة تكامل, تجانس و تناسق , فالنفسية تنبثق من العقلية و العكس صحيح, اي ان اهواء و ميولات و احاسيس الفرد تنبثق بالضرورة من كيفية ادراكه و فهمه لمحيطه و ان كيفية ادراكه و فهمه لمحيطه تنبثق بالضرورة ايضا من اهوائه و ميولاته و احاسيسه , و انطلاقا من هذ الطرح, يمكن ان نلاحظ ان العقلية تنتج نفسية تنتج بدورها عقلية جديدة و هكذا دواليك, و هذا ما يسمح للفرد بالتطور و مواكبة عصره, و لكن ان امعنا النظر في هذه المعادلة , سنجد انها ذات مجهولين , اي اننا سنسقط في لغز , من اتى اولا ؟ البيضة ام الدجاجة ؟ ... و لحل هذه المعادلة , و جب بالضروره ايجاد عنصر ثالث , حتى نثبت احد المجهولين , العقلية او النفسية , و هنا يطرح اشكال جديد , ايهما يمكن ضبطه و تثبيته و الزامه بقيمة اصل لا تتغير مع الوقت و لا الظروف ؟

فالتحكم في احد هذين المكونين , تثبيته و تاصيله , لا يمكن ان يتم الا اذا كان للمكون خاصية تمكن من التحكم به .

فاما العقلية فهي و كما سبق تعريفها في هذا السياق , كيفية ادراك و فهم محيط الفرد , اي انها في جانب منها بالاضافة الى ارتباطها بالنفسية, هي نتاج اعمال العقل , العقل الذي ينتج فكرا , اي انها نابعة من كيان الفرد و لا تربطها بالواقع سوى علاقة الملاحظة في حين ان انتاج الفكر يتم داخل كيان الفرد بمعزل عن المحيط, و اما النفسية و كما سبق تعريفها في هذا السياق ايضا , اهواء و ميولات و احاسيس , اي انها ايضا في جانب منها بالاضافة الى علاقتها بالعقلية , هي نتاج للتاثر بالواقع , الواقع المتغير , اي انها ليست نابعة من كيان الفرد بمعزل تام عن المحيط , صحيح ان انتاج المشاعر يتم داخل كيان الفرد و لكن العلاقة الرابطة بين هذا الفعل و الواقع تتعدى الملاحظة لتصل للتاثر به و تحكمه , الواقع, في نتيجة هذا الفعل ,انتاج المشاعر.

و مما سبق يمكن استبيان عدم القدره على التحكم في النفسية بقدر القدرة على التحكم في العقلية , اي و بالرجوع لاصل الموضوع , حل معادلة انبثاق مكوني الشخصية من بعضهما البعض و البحث عن المكون الذي الاجدر بالتثبيت و التاصيل , يمكن ان نتبين ان اول اسس تكوين شخصية سليمة , هو تثبيت عقلية الفرد , اي كيفية فهمه و ادراكه لمحيطه.

و اذا تحدثنا عن تثبيت العقلية , طرحنا مجموعة اسئلة ؛

كيف نثبت فكرنا ؟ ماهو الثابت الذي وجب ان نفصل عقليتنا بالرجوع اليه ؟ كيف نثبت كيفية ادراكنا و فهمنا لعنصر غير ثابت , المحيط و بالتالي الواقع , دون ان ننفصل عنه و دون ان نعتزله و بالتالي نتركه يتجاوزنا ؟

الاجابة في الجزء الثاني.

دجو

لا حمد و لا موزا ! تونس للتوانسة

أنا ضد زيارة أمير قطر الفيل بو الترامي و السحلية متاعو بانانا و خاصة في هذه المناسبة بالذات !!

14 جانفي متاعنا أحنا التوانسة موش متاع حتى حد آخر ! و بربي ميساج للجمآعة إلي قاعدين يرحبوا و يعاودوا بيه !! ياخي ما تحشموش على رواحكم ؟ نهارين لتالي فرحانين بإسماعيل هنية إلي قاعد يقاوم في الصهاينة و اليوم ترحبوا بالي قاعد يبيع في الڨاز للصهاينة باش يقتلوا الشعب إلي يقاوم على خاطره إسماعيل هنية ؟؟ ياخي عايشين في إزدواجية ؟؟ نهار و طولوا تتبكاو على بغدادو العراق المحتل و ناسين من ضربت أمريكا العراق ؟؟ ناسين قاعدة السيلية ؟؟؟ ياخي بهايم و لا عملاء و لا طماعة ؟؟؟

نهار كامل و إنتوما تحكيو هاو مؤمرات ماسونية ، هاو مؤامرات غربية ، هاو هيمنة غربية ، هاو إمبرياليه هاو راس لمبوط لين صدعتولنا ريوسنا بيها هالحكاية !!! اليوم تجي المؤامرات و مظاهر الهيمنة الكل و تاقف عند بو الترامي فيل قطر ؟؟؟ 

ياخي جايبنها بو العريف في السياسة و نهار و طولوا و إنتوما تحللوا و تناقشوا و كل صغيرة و كبيرة تعملوا منها قاوق و طاولة و 4 كراسي !! جيتوا لقطر و سكتوا ؟ بكمتوا ؟؟ ما عادش تفهموا ؟؟

أول زيارة عملها الغنوشي بعد الإنتخابات عملها لقطر !! 

أول إسم وقع إقتراحه ليكون ضيف شرف في المجلس الوطني التأسيسي كان إسم فيل قطر !!!

بوشلاكة وزير الخارجية متاعنا ، إلي ما عنديش مشكل في التعيين متاعه ، ياخي موش ولد قطر المدلل ، كان باش تبدى تهز و تنفض و تقول آش مدخل هذا في هذا ، أعمل طلة و شوف شكون وزير الخارجية الليبي ، و باز ماكم زعام في المؤامرات تو تفهم الرابط وحدك !!

كل شيء نجم نعديه !! آما إستقبال عميل خائن لقضية الأمة آوي القوات الأمريكية على أرضه بالورود و التهليل من طرف شعب مازال كيف كان يستقبل في بطل مقاوم بحق عنده جمعة لتالي و مازال كيف خرج من إنتخابات كان الغرض منها إثبات إستقلالية القرار الوطني و عندو عام ملي عمل ثورة سماها ثورة الكرامة و الحرية و في بالو خرج مالتبعية و الهيمنة الأجنبية !! هذا شيء ما يتعداش !!

كان باش تقلي هاو قطر دولة عربية نقلك برة شوف غلاة القومية العربية و التيارات القومية في العالم العربي الكل كيفاش يصنفوا قطر !!! ما نتصورش كان باش تكون إنت قومي أكثر مالقوميين أنفسهم !!

و كان باش تقلي هاو دولة مسلمة !! شوف الإسلاميين الصحاح ، موش أسباه الإسلاميين ، خوذ مثلا حزب التحرير كيفاش يعتبر دولة قطر !! حتى باش يسميه القطر القطري ما يسميهاش !! دولة ما عندهاش مقومات الدولة لا تاريخ و لا حضارة !! فلوس كهو !! أشلاء الحجاز و الجزيرة !!!

آآه يا تونس !!! عقاب الزمان باش يحكموك جماعة بو عڨال ، لا دين لا ملة !!! يلعن بو الثورة كان باش ترصي هكة !!!

تونس للتوانسة ! لا أمريكا لا فرانسا و لا قطر و لا هتى لوطي آخر !! تونس متاع التوانسة !!!

العلاقة مع الدول الأخرى يا تكون في إطار ندية و إحترام متبادل يا موش لازم منها !!!

تونس ليست لا مقاطعة قطريه و لا أمريكية و لا فرنسية !!!

الناطقون بعد الـ14 ... من أنتم ؟

الناطقون بعد الـ 14 ، هكذا أسميهم ، هم من كانوا شياطين خرساء عندما كان الظلم و الذل يحكمنا ، هم من لم يكلفو أنفسهم الجهاد بأضعف الإيمان : كلمة الحق .
كلنا كنا مظطهدين ، كلنا كنا مقموعين و كلنا كنا مقيدين ....

لكن لم نكن كلنا شجعان و نزهاء أمام حق شعبنا ، و حق وطننا و حق تاريخنا و حضارتنا ...

هناك من إختار أن يكون شريفا و أن يجاهد بما إستطاع للجهاد من وسيلة : كلمة الحق عند سلطان جائر و هناك من إختار أن يكون نعامة و يغمس رأسه في الرمل ، يعيش رافعا شعار : أنا لا أرى ، لا أسمع ، لا أتكلم

لا ألوم هؤلاء و لا أتهمهم بالعمالة و لا الخيانة كما يفعل البعض ، فمستوايات الوعي أو الجرأة تختلف من فرد لفرد ، وهذا خارج عن نطاقنا ...

و لكن ما يحز في نفسي اليوم ، هو محاولة البعض منهم إبراز نفسه كتشي غيفارا تونس ، و كقائد ثورة لم يشارك فيها أصلا ، و ما يزيد الطين بلة هو نجاح البعض من المتعيشين من الثورة في ربط هذه الصورة بنفسه .

أرى اليوم إنتهازيي الثورة و راكبيها ، سواء كان ذلك في العالم الإفتراضي أو الواقعي ، يسردون وقائع ، طبعا هي من نسج خيالهم ، لبطولاتهم و وقوفهم الدائم في وجه بن علي و طرابلسيته ...

لن أتطرق للأشخاص هنا ، حتى لا أتهم بشن حملة على فلان أو فلان ، و لكني سأتحدث عن بعض الصفحات الفايسبوكية دون تسميتها ، صفحات لم أسمع بوجودها ، رغم مدون أعمل في المنتديات و مدونات البلوغسفير و صفحات الفايسبوك منذ سنين ، ـ لم أسمع ـ قبل 14 جانفي ...

صفحات و إتحادات للصفحات تأسست كلها بعد 14 جانفي ، أي بعد زوال خطر بن علي ... صفحات تزعم أنها من قام بالثورة ، صفحات تزعم أنها لطالما تعرضت لمضايقات إبان حكم الطاغية ...

الحقيقة التي لا ينكرها أحد ، أن الثورة لم يقدها أي كان ، الثورة إنطلقت من سيدي بوزيد كمسيرات إحتجاج و مطالبة بحق البوعزيزي غفر له الله ، الثورة ولدت هناك ، و ترعرعت في الڨصرين و لم تكن وقتها ثورة بعد ، الثورة لم تصبح ثورة إلى بعدما شملت كل جهات تونس ، و أعود و أقول لم يقدها أحد .
لا ينكر أحد أن الصفحات الفايسبوكية ساندت الثورة ، بتغطيتها إعلاميا ، و لكن لم تقدها ، صحيح أنها حرضت على الثورة و لكنها لم تقدها ...

بعض مشرفي الصفحات ، كانوا سباقين في نشر الأخبار التي كانت محينة و لعبت دور الإعلام الرسمي حين كان الإعلام الرسمي يتهم الثوار بأنهم " مجموعة من الأفراد الملثمين " البعض من هؤلاء كانو يتحركون ميدانيا و إفتراضيا و كانو بحق عاملا أساسيا في إنجاح الثورة ، البعض الآخر إختار أن يراهن على الحصان الرابح أو بالأحرى المرشح للربح : بن علي و أزلامه و عارض الثورة و بعد 14 جانفي أخفى صفحته و إختفى ...

باختصار مجموعة من الأسئلة لم يدعي البطولة :
أين كنت قبل 14 جانفي ؟
متى أنشأت صفحتك ؟
ماهي المواضيع التي كانت صفحتك تناقشها ، هذا إن كانت تناقش أصلا ، قبل 14 جانفي ؟
هل حافظتم على نفس الخط التحريري في صفحاتكم ؟
ماهو تاريخكم الذي يمكن أن تدعموه بدلائل ؟

بإختصار : من أنتم ؟؟؟؟

دجــو رد على مقال : "الحل بيد السبسي" لصالح الحاجة الصادر اليوم 18 أفريل 2011 بجريدة الصريح :

سي صالح الحاجة قرأت مقالك هذا الصباح ، فوجئت بتلك الجرأة الكبيرة التي أصبحت تتحلى بها كلماتك ، هكذا فجأة !!
أيام بن علي لم أقرأ لك سوى كلمات المناشدة و تعديد إنجازات سيادة رئيس الجمهورية الموقر ، لم أكن أبالي فلم تكن الأسوأ بين صحفيي العار ، و لكن مفاجأتي الكبرى كانت بعد الثورة ، تحرر العقل التونسي و تحرر الفكر لدى التونسي و مارس الشعب لأول مرة حرية التعبير التي لطالما سمع عنها .
تحرر الكل ، إلا بعض النفوس المريضة ، مازالت لم تستوعب بعد أن تونس قد نزعت ثوبها البنفسجي الباهت و إزتانت بحلتها الخضراء العتيقة ، تونس تحررت يا سي صالح الحاجة و حرية الصحافة اليوم على وشك أن يكون واقعا نعيشه لولا بعض العوائق والتي يتسبب فيها أمثالك، .
قرأت مقالك و تأكدت أن لا ينفع العقار في ما أفسده الدهر ؛
شكر مقام التقديس للباجي قائد السبسي ، ذلك الذي لم تتحدث عنه حتى بكلمات مقتضبة حين كان بن علي موجودا و بعد ذلك حين تم تعيينه رئيسا للوزراء ؛ اليوم و بعد أن صرح بعدم رضاه عن إقصاء التجمعيين غمرتك المشاعر و الحنين للماضي ، ماضي المناشدات ، ماضي المدح حتى الغزل في بن علي ، في غمرة هذه المشاعر تخمرت ، حتى كتب قلمك دون سيطرة منك ـ و أنقل هنا ما قلته حرفيا ـ :
==============
كل يوم أتأكد أن تونس محظوظة بتولي السيد الباجي قائد السبسي رئاسة الحكومة المؤقتة في هذه الظروف الصعبة و الدقيقة .. و المفتوحة على كل الإحتمالات و أتأكد كذلك أن الله أراد ببلادنا خيرا عندما تحمل السي الباجي المسؤولية بشجاعة و محبة خالصة للوطن و للتونسيين .
==============
كلام حقيقة أفحمني ، بالمعنى الهزلي لكلمة إفحام ، واصت القراءة علي أجد مفاجأة في مقالك تفند ما ورد على ذهني من ذكريات أيام المناشدات و أجواء رفع التحديات ـ و أنقل هنا ما قلته حرفيا ـ :
==============
وقد تأكد لدي هذا الإنطباع مرة أخرى بعد أن إستمعت إليه و هو يعلق و يحلل و يفكر بصوت مرتفع حول نية إقصاء التجمعيين ... و هي نية خاصة لدى البعض ... و ليست عامة لدى الجميع ... و لا تعبر عن الشعب التونسي و قد تكون نية طيبة و لكنها على طيبتها لن تخدم تونس خصوصا في هذه المرحلة و هي تواجه فترة من أصعب فترات تاريخها الحديث .
==============
أكملت هذه الفقرة و علت رأسي نقطتا إستفهام و تعجب كبيرتين !! رفعت عينيا عن الجريدة ، تمتمت بكلمات لم أفهمها حتى أنا ، فركت عينيا ، أعدت القراءة ، حقيقة لم أخطأ !
نية خاصة لدى البعض ، و ليست عامة لدى الجميع ... و لا تعبر عن الشعب التونسي ؟؟؟؟
سي صالح الحاجة ، أين كنت حين نظم إعتصام القصبة 1 ، 2 و 3 ؟؟ إحدى أهم أهم مطالب تلك الإعتصامات حل التجمع الدستوري الديميقراطي ! ستقول أنك لست قصباويا ، و أنك قباوي و هذا ما قد لا أستغربه .
أين كنت حين كان الثوار يهتفون : خبز و ماء و التجمع لا ! حين كانوا يهتفون : أر سي دي ديڨاج ! حين كانوا يهتفون : يسقط حزب الدستور يسقط جلاد الشعب !
ثم كيف لك أن تدعي معرفة ما يريده الشعب و أنت الذي كنت في خدمة من هم ضد إرادة الشعب لمدة 23 سنة ، وحتى حين إنتفض الشعب و أراد أن يكرس إرادته وقفت أنت و جريدتك في وجه إرادته ! ما أدراك أنت بإرادة الشعب ؟
ثم كيف لك أن تصف أسعد لحظات تونس و أنبلها و أقواها على مر تاريخها المعاصر ، لحظات بناء تونس الدولة المدنية الحرة الديمقراطية بأنها فترة من أصعب فترات تاريخ تونس الحديث ؟؟؟
أحسست بالدم يغلي في رأسي و تشنجت أعصابي و لكني أكملت القراءة بقيت كلماتك تصعد في إستفزازها ـ أنقل كالعادة الفقرة التالية من المقال ـ :
============
لقد تكلم سي الباجي كلام المسؤول الناضج الذي يصر على العقلانية و الرصانة و الواقعية حتى و إن سار في الإتجاه المعاكس و حتى لو إقتضاه الأمر إتخاذ قرارات غير شعبية . و ما قاله سي الباجي من ضرورة التمعن في قرار الإقصاء و دراسته و تحليله و عرضه على الإستفتاء الشعبي إذا لزم الأمر و هو ما يقوله العقل و المنطق و الحكمة
============
أكملت قراءة هذه الفقرة وضعت يدي على رأسي ، تنهدت ، أحسست بدوار و شعور بالقزز ! شعور إفتقدته منذ مدة ، منذ كانت تونس لا ترى إلا بعيون بنفسجية .
حتى لو إقتضاه الأمر إتخاذ قرارات غير شعبية ؟؟؟ دعوة علنية للتفرد بالقرار ؟ للتفرد بالحكم ؟ أثار الشعب ليستبدل ديكتاتورية بأخرى ؟؟ سؤالي الذي سبق و أن طرحته لم يعد إستنكاريا ! حقيقة أصبحت أنتظر منك جوابا : هل كنت حاضرا حين إندلعت الثورة ؟ هل كنت تعيش في تونس التي كنا نعيشها ؟؟
ثم ، كيف لك أن تقترح إستفتاء الشعب حول مشاركة التجمعيين في انتخابات ؟ هل يعقل أن يصوت المواطن أربع مرات مرات في نفس السنة ؟ مرة لتقرير مصير التجمعيين ، مرة للإنتخاب أعضاء المجلس التأسيسي ، و مرة لإختيار رئيس و مرة لإختيار أعضاء مجلس النواب !
صدقني إن قلت لك أن كلامك إستفزني لدرجة لم أستطع أن أكمل المقال ، ولكن ما شد إنتباهي في ما تبقى بل و ما أثار دهشتي هو قولك بكل دنائة و ثقة في النفس
=========
إن إقصاء التجمعيين معناه و بكل بساطة تدشين مرحلة الدخول في المجهول ... ثم إنه قرار يتناقض مع ما ننشده من ديمقراطية و تعددية و تعايش بين الجميع مهما إختلفت مشاربهم و أفكارهم و مذاهبهم .
=========
هنا ، كنت ستتسبب يا سي صالح الحاجة في قتل مواطن بريئ لا ذبنب له سوى أن العاثر شاء أن يقع مقال كتبته أنت بين يديه ، حقيقة لم أفهم كيف لتونسي يدعي الشرف و المصداقية و يدعي دعمه للحرية أن يتفوه بما كتبت ؟؟؟
إقصاء التجمعيين معناه تدشين مرحلة الدخول في المجهول ؟ و أين كانت تونس حين كان التجمعيون يحكمونها ؟ ألم تكن في أسفل قاع مستنقع المجهول و الضياع و الفراغ ؟؟ أم أنك تأثرت بكلمات المدح و الشكر التي لطالما توجهت بها لسيادة رئيس جمهوريتك البنفسجية عرفانا له بالجميل لإنجازاته العظيمة ؟
ثم كيف لفئة لا أقول أنها لم تدعم الثورة فقط ، فمن صمتو إبان الثورة كثر ، و لكن وقفت ضد الثورة و قاومتها ! كيف لهذة الفئة أن تنعم بثمار الثورة ؟ ألم تتعلم الدرس بعد ؟؟ ثورتنا جائت بديمقراطية !! و القاعدة الأولى في الديمقراطية تقول : لا ديمقراطية مع أعداء الديمقراطية !!
هممت بلف الجريدة حين شدتني كلمة أخرى في نفس المقال ـ أنقلها بكل أمانة ـ :
=========
إننا على يقين من أن سي الباجي سوف ينقذ التجمعيين الشرفاء و النزهاء من تحويلهم لفئة من المنبوذين في مجتمعهم ...
=========
أكملت قراءة هذه الجملة ، لففت الجريدة و رميتها في سلة المهملات و تأكدت حينها أن تونس لن تتقدم ما لم يعد التونسي يعتبر صفة تجمعي تهمة

و هذا كلام موجه لك ، يا سي صالح الحاجة و لأمثالك ممن لم يدركوا بعد أن عجلة الزمان قد دارت و أن الموازين قد إختلفت و لم يعودو في موقف قوة يسمح لهم بنعت الآخر بالرجعية والجذب للخلف ، فقد أصبحو هم الآن من يلعب هذا الدور ، و كل الشعب واع بهذا !

بعيدا عن الأجواء السياسية المشحونة و العاطفة التي أصبحت تحرك كيان المواطن التونسي في هذه الفترة و في لحظة صراحة و صدق نقفها أمام أنفسنا و الصدق مع النفس أول خطوة نحو الصدق مع الآخر و النزاهة في المعاملات لا يسعنا إلا أن نقر بأنه مهما إختلفت المسميات يبقى المسمى واحدا ، و مهمى إختلفت الأوصاف يبقى الموصوف واحدا ، الإقصاء هو الإقصاء ، مهما كان من سيقع عليه الفعل ، إسلاميا ، يساريا ، قوميا ، أو حتى تجمعيا كان !!!
الإقصاء هو الإقصاء ، و هذه حقيقة لا تخفى عن عاقل ، كذب كل من إدعى غير ذلك .

و لكن بعد الثورة التي تنادي بالديمقراطية و تحارب الإقصاء : يطرح ظرورة سؤالان : إلى أي مدى يمكن تطبيق الديمقراطية و تبنيه و إلى أي مدى نلغي الإقصاء ونحاربه ؟؟
لا أنتظر منك و منهم جوابا لأن الجواب لا يملكه إلا نشأ فكريا في مدرسة ثورية و أنتم لم و لن تكونو كذا !
الجواب جملة على كل تجمعي أن يحفظها :
لا ديمقراطية مع أعداء الديمقراطية !

دجو المشلول من جرأة التجمعيين الأنذال و رقعتهم ! دجو الي باش يرجع يغني ديــــــــــــڨاج !!