يوميات ماسوني

يا قوم بني ماسون !! عندي ولد أختي صغير ، فرخ ولد 3 سنين ، الصباح خليتو يلعب في الصالة و عامل جو ، يحي وحدو كيف المهبلة و يغني و يشطح و يجري و شادد الننوس متاعو يحكي معاه على أساس هو باتمان ... المفيد الطفل كيف الصغار الكل ! بستو و خرجت نعمل في قهوة في الحومة ! فيقت مخي بزوز سواڨر و تعديت إل بسمة صاحبتي ، في الدورة تاع دارهم وقفت معاها شوية غمزة ، على ضحكة على كلمة حلوة على يزي بابا يتعدى من هنا تي إيييه كملت معاها مشيت إل صاحبي سليم ، واحد هردوس مهبول ! ههه كعبة بليدة حاصيلو ضحكة منا، نكتة منا سمعني زوز غنايات تيليشارجاهم ، جبدلي الڨيتار و بدا يدندن على راسي ، في بالو ڨيتاريست و هو المزاودي خير منو ، راسي وجعني قتلو أيا جو فلاي آنا ! سليت روحي و كعبة كعبة مروح للدار ! عرضني عم العياشي عاطيها كعبة رايبان كلاسيك ، موش فاهم هاكا الشياب منين يجيبو فيهم ، كعبة دوريجين و ما تلقاهاش و ماشي يصلي ، قتلو السلام عدالو كعبة السلام و ڨحرة كيفاش آنا موش ماشي للجامع وقت الأذان .. حاصيلو وصلت للدار حليت الباب الحديد دخلت جبدت المفتاح من المحبس المثلث الثاني على يدك ليمين و حليت الباب اللوح ، دخلت قلت السلام أمي حطلي نفطر ! و دخلت للصالة باش نبوس هاكا الفرخ ولد أختي ! آنا دخلت و أُببببببب !!!!! فجأة و بدون سابق إنذار و على حين غرة منه ! دخلت عليه على غفلة !! و كانت الفاجعة الكبرى !! مصيبة صارت في الدار ! تتصورو آش نلقاه يعمل ؟؟؟ آخر حاجة كنت نتصورها !! لا حول و لا قوة إلا بالله ! حسبي الله و نعم الوكيل ! موش عارف كيفاش نقولها !!! تتصوروا نلقاه يلعب بالليغو !!!!!!!أي نعم الليغو !! اللعبة الماسونية الشهيرة !! صدقوني وجهي لخلخ ! كنت باش ندوخ !!! المصيبة ما وفاتش إلغادي !!! تعرفو ف اش يعمل بالليڨو !!!!؟؟؟ آخر ما تنجمو تتصورو !! نلقاه يصنع في هرم !!!! هرم إي نعم هرم مرة وحدة !! صدقوني تخرمت في مخي ! ما فهمت شيء ! ما فهمتش آش نعمل معاه ! آنا هكاك و من غير ما نشعر ! من غير حتى ذرة متاع إدراك و وعي و عقل و تفكير و إعمال للعقل و تخديم غرام واحد مالمادة الشخمة متاعي ! من غير ما نشعر نهز هاكا الهرم و نسطعو على الحيط ! فتفرك قطعا قطعا ! و إنتشرت أجزائه في كامل أنحاء الصالة ! ولد أختي مسكين كان يلعب و يغني في ترا ترا ترمممم تارارار ترممممم تيرارارارا .. برمممم برمممم !! تفجع ، بهم دموعو هبطت قبل ما نسمع حتى كلمة !! و بدا يصيح و يبكي ! و خآآآآآآف مني و هرب يجري تخبي وراء الديفون ! جيت باش نجبدو باش نفهمو علاش آنا نتصرفت هكاك نلقاه يمسح في دموعو !! و خايف جيت نثبت !! نلقاه و هو يمسح في دموعي يمسح باليد اليسار !! و يمسح في عين وحدة ! و العين الأخرى هي الي ظاهره !!! وخرت إلتالي مالأول ! خفت ! إستعوذت الشيطان !! زدت قدمت نلقاه باقي يغزرلي بعين وحدة !!! تصدمت !! و آنا هكاك !! جاني فلاش متاع ميموار في مخي و بدا شريط فيديو كامل يمشي في مخي !
و دخلت في حالة لا وعي ! الدنيا بدات تغيب عليا بالشوية بالشوية الدنيا و لات ضباب ! و بديت نسمع في صوت متاع موسيقى خافت !! موسيقى تخوف و تحسها فيها غموض !! بديت نسترجع في مخي في حاجات شفتهم المدة الي فاتت و ما ركزتش معاهم !! تفكرت برشة فازات ، فازة الخسوف متاع الشمس و تزامنو مع الزلزال متاع اليابان زعهمة صدفة ؟؟ و آنا هكاك نزيد نتفكر فازة باراك أوباما كيفاش لابس في كوستيم كحلة و مرتو لابسة كوستيم أبيض في الخطاب الأخير !! و هذا الكل متزامنة مع الزلزال متاع اليابان و الخسوف الكلي ! قلت بيني و بين روحي ؟ يا دجو ؟ زعمة هذا الكل صدفة ! ما ظاهرلي ! و آنا هكاك في حالة تبهيمية بحتة ! تهبط عليا كيف الصاعقة حكاية في مخي !! اليوم نهار 25/06/2011 !! يعني كان نركز شوية توه نلقى إلي 2+5=7 !! 7 ناقص 6 ! تطلع 1 !! واحد زائد 2011 !! تجي 2012 !!! يا رسول الله !!
عام 2012 يذكرني بحاجة ! قالو الدنيا باش توفى في 2012 !! هاذي تفرجت فيها في فيلم ! يا رب !!! بديت نرعش بكلي !! زدت تفكر حاجات صارولي اليوم !! وقت مشت للقهوة ! عم حمد القهواجي ! عمل فازة ما فهمتهاش في الوقت ! تتصورو آش عمل ؟ !!! بعول خشمو بالإصبع السبابة متاع اليد اليسار !! زعمة علاش السبابة بالذات ؟ و علاش اليسار بالذات !!! لا لا !! ستنا !! بسمة ، صاحبتي و قت مشيتلها ! و آنا نهز في عيني و نتمعشق ! شفتها لابسة شركة ! حبيت نستبب بيها باش نمسها ! هزيت الشركة ! نلقى الموتيف متاعها ! عين !!!! لا لا عاد هذه ماعادش فيها لعب ! موش صدفة هذا الكل ! وقت سألتها ! قتلي حاطة عين باش نطير العين حبوبي !! أه أه أه !! حتى إنتي يا بسمة ! طلعت منهم !!! لا لا فمة فازة أخرى ! وقت مشيت لسليم الهردوس ! سمعني غنايتين ، آنا موش طيارة في الأنڨلي آما و كأني سمعت كلمة ديابل هكة تحوس !! زعمة هذا الكل صدفة ! زلزال ؟ خسوف ؟ 2012 ؟ تبعويل خسم باليد اليسار ؟؟ شركة فيها عين ؟ و غناء فيه ديابل ؟ !!!! والله ما عمرو ما يكون صدفة هذا الكل !! ستنا ستنا !!!! عم العياشي !!! المرايات متاعو !!!!! راي بان !! زعمة آش يقصد بيها هذه زعمة ! ؟؟؟ هذه الوحيدة الي ما فهمتهاش !!!
حسيلو ما عاد فاهم شيء !! خضخضت راسي يمين يسار ! و قمتلهم !!! آه يا ولاد الكلب !!!! آه يا كلاب !! ماسونيين طلعتو و آنا ما فقتش بيكم كان توة وقت الدنييا باش توفى ؟ و الله والله لاني مسيبكم !! لازمني ننقذ العالم قبل ما يوفى مالأشرار الي كيفكم !! نهز عيني نلقى ولد أختي قدامي مازال يمسح في دموعو و يخزرلي على جنب بعين وحدة ! آه يا ولد الكلب !! ماسوني طلعت !! و نهز نشلبق والدين بوه بكف طار تنطر على الحيط ! كورت بيه ! وأمي جات تجري تحز !!! نتلفت نلقاها لابسة فولارا كلها مثلثات !! طحت على ركايبي نبكي !! حتى إنت يا أمي ؟؟ حتى إنت !! خزرتلي خزرة عمرها ما خزرتهالي ! دزتني بساقيها و قتلي : علاش تضرب فيه ميدو ؟؟ علاش شعملك !! يا مريض يا حيوان إذهب الله لا يردك يعطيك داء يلمك !! يرزيني فيك بجاه هالنهار !!! أمي ، ميدو ولد أختي ، صاحبتي ، سليم صاحبي ، عم العياشي ، عم حمد !! الكل ماسونيين ؟؟ لشكون باش نمشي آنا ؟ كيفاش الحل ؟ يا ربي شنية عملت آنا في حياتي !!! يا ربي شنوة نعمل !! يا ربي !! راني عبدك الضعيف ! علاش هكة يا ربي تبليني في الناس الي نحبهم الكل ؟؟ يا ربي علاش !!! آنا هكاك و ربي هداني للحل !!!!
الحمد لله !! مشيت نجري للبيسي ، حليتو ، حليت الفايسبوك ، و دخلت نلوج على صفحة معروفة ديما تكشف في الماسونيين و ديما معرڨهالهم ! دخلت ! عملت دورة تفرجث في 4 فيدوات ! هع هع ! الحمد لله ! لقيت الحل !!! يرحم والديكم يا مشرفي هذه الصفحة ! والله كان موش ربي هداني و مشيت لصفحتكم راو سيطرو عليا الماسونين و راني وليت كيفهم !!!
الحلي الي لقيتو ساهل برشة و ما يستحق حتى تعب : كل ما يعرضك واحد يحكيلك على الماسونية ، من جدارة والدين أمو إلى أخمص قدميه سبهم و كان تنجم كيفاش تبلوكيه و لا تهبط على راسو بحجرة حلو مخو بالك يتحل
=========
دجو الماسوني بكل فخر