دار دجو المسكونة

الحكاية الكل بدات آخر عام 2009 ، وقتها آنا ناجح من الأولى للسنة الثانية ، باش نكري في تونس و فقت مخر ، قعدت نلوج على دار ، آنا و ڨروب متاع صحابي ، قلبنا الدنيا الديار اللي لقيناهم الكل حكك و أحنا 4 ما يكفيوناش ، لولاد حبو يكريو في باردو و آنا شديت صحيح حبيت نكري قريب للباساج خاطر وقتها صحبتي تسكن غادي قلت قريبة ، الحاصيلو رمضان كامل بعد شقان الفطر نهبطو آنا و لولاد بالكرهبة نلوجو ! عاد بعد شهر كامل نلوجو ، كلمنا الصمصارة و لوجنا في لابراس و شيء ديما واحلين يا دار غالية يا دار صغيرة و أحنا وقتها مخر برشة بدينا نلوجو ، الحاصل ! مرة جانا واحد قال عندي دار ، بين باب الخضراء و باب العسل ، في نهج بنزرت كان تعرفوه هيكا دار زرقة بني متاع فرانسا قديمة ، برة قلنا نشوفوها كيفاش ، أول ما دخلنا ساعة المفتاح تقسم في الكوبة ! قلنا يا فتاح يا رزاق يا عليم ! الراجل خلع الباب ، كسر شباك صغير في الباب و حل الدار وقت دخلنا ، الدار كلها غبرة و كانو رابطين فيها كلب و سبقتكم بالحديث الدار تضهر فيلا كاملة من برة آما وقت تدخللها تلقى بلاصة ميرو و نص على ميرتو و نص ، 3 بيبان بابنا على اليمين ، و باب مرى كارية الغادي على اليسار و باب مقابل يهز للسطح ، المرا هاذي مربية قرابة 25 قطوس و مغرومة بيهم شي عجب ، عاد الدار الي باش نسكنو فيها نلقاوها فيها كلب و كلها قطاطس القطاطس بدرجة كبيرة ، تسمع كان تمعويق و صوت عرك قطاطس ، و ما فمة حتى أنبوبة في الدار ، الحيوط مقشرين و الغبرة ماكلتها ، عاد لولاد ما عجبتهمش و زيد فيها كان زوز بيوت و صالة و المرا طالبة 350 دينار ! آما بلاصتها باهية وراء المحكمة العقارية و وزارة التربية آنا كبشت زيد قريبة لدار صاحبتي ، قلت كعبتي و كعبة ، هيا درا كيفاش غلطنا و قبلنا بيها ! روحنا ليلتها و رجعنا غدوة جبنا الدبش و الموبل ، و جبنا زادة شوية سيما بيضة و دهن ، و آنا في الصيف ساعات نخدم دهان ، عندي الصنعة و الولاد الي معايا شقانس ولاد كرنيش في بنزرت ، عاد هاكا لدار قرقشتها و دهنتها و ليقت اللايص الطايحة فيها في حيوطها في نهار ، و سيقناها و إستقرينا . أيا قلنا نبداوها بالبركة ، حطينة سورة البقرة و الدار و لا تلق ، و نهارتها في الليل بدا الجو أيا ليلتها رقدنا في سلام ، هانين و فرحانين ، قمنا الصباح نلقاو الدار كلها غبرة و فمة آثار متاع ساقين بالطبعة ، و الدار تقول هبت عاصفة رملية و خاصة الصالة ، و التوالاتا حاشاكم فيها حاجة تقول شكون دخل و ما نضفهاش ، عملنا مشكل في بعضنا ، بدينا نتنابزو راو والله ما يجي هكة و راو الي دخل مسخ الدار من أول نهار هكة ما يجيش و التوالات ما يجيش ما نجبدوش الشاس ، هاكا اللاوي حاصيلو ، قلن ما صار شيء و لازم نتلهاو بالنظافة متاع الدار ، آما قعدنا متعجبين شكون عملها خاطر أحنا الكل نظاف و نعرفو بعضنا بالڨدا و زيد الناس الكل قالت خاطيني خاطيني ، برة على روحك ، تعدات الحكاية ما ركزناش معاها ، آما حاجة لاحظناها ، الدار وساخة يعني إنت تمسح و تكنس من هنا و الدار ترجع وقدرة قادر مسخة بعد نص ساعة ! حاجة أخرى زادة لاحظناها ، نحطو حاجة في بلاصة ما نلقاهاش و لا نلقاوها في بلاصة أخرى ، و الشلايك و الصبابط و الكلاصدات ، كل مرة تضيعلنا فردة و ما نلقاوهاش و الصباح و أحنا خارجين نلقاوها البرة في الكياس ! بدينا ندورو على بعضنا ، كل مرة نعملو قعدة و نقولو فمة شكون فينا مريض و لا شنوة و برجولية معادش كرية هاذي و هاكا الحديث ، موش كان الكلاسدات كانت تترمى البرة ، الأومو و الجافال و الڨريزي ، ديما نلقاوهم مفرتين و مبزعين عالقاع ، يعني أي حاجة عندها علاقة بالنظافة ديما تصير فيها مشكل أيا ، أحنا شباب أكبر واحد فينا وقتها عمرو 23 سنة ، يعني موش باش تركبلنا بالساهل حكاية دار مسكونة و هاكا الكلام ، الفارغ ، يعني ديما نقولو واحد منا قاعد يتشمت و وصلنا شكينا قلنا المرا مولات الدار عندها مفاتح و مريضة ، و قلنا حتى ممكن القطاطس ! آه فتكم بالكلام ، القطاطس ديما في الدار ، برشة و كيف نقول برشة يعني فوق العشرين ديما يدخلو ما نعرفوش منين ! أيا هذا من جانب فمة جانب آخر عندنا صحابنا كانو يجيونا ، يعديو ليلة ولا زوز كانو ديما كيف يفيقو الصباح يصبحو مدڨدڨين يعني تقول ماكلين طريحة و لا شنوة و يقولنا ، شدنا بو تليس و تخنقنا في الليل و كانو زادة ديما يقوللنا فمخ حكاية غريبة في داركم ، الباب في الليل تحل وحدو و الوبة تحركت ، يعني موش ريح ، الكوبة تتحرك يتحل الباب و يتسكر وحدو ! و أحنا ديما نقولو صليو على النبي ، تي إنتوما تفدلكو ، المشكل موش واحد و لا زوز ! باهي ، أول حكاية غريبة صارت ، وقتها مرة واحد منا يشعل في الشوفو باش يدوش ، و ينفخ عليه نار ! المشكل الحكاية هذه تصير اما يحكيلنا قال النار ، موش عادية ، في شكل دوامة و ملات الكوجينة الكل ، يعني موش نفخة عادية ، و قال إلي هو هرب يجري و النار خارجة مالكوجينة و وقفت في الكولوار ، يعني حسب حديثو النار عبات الكوجينة و تتبع فيه ! بيان سير قلنالو يزي بلا أفلام ! بالطبيعة أحنا شباب كلام كيف هذا موش باش يدخل مخاخنا و زيد هو وحدو شاف هالحكاية ، و هي ما تتصدقش ، دونك كذبناه آما كل واحد بينو و بين روحو قعدت راكبتلو في مخو ، خاطر كل واحد فينا شاف حاجة و ما حبش يقول لا يولي تكركيرة حاصيلو ، موش باش نطول كل مرة تصير حكاية ، هاو مرة ضو قص هاو مرة ماء و كل مرة حاجة ! بون توة باش نحكي حكاية ، ما تاخذوش عليا فكرة غالطة آما صغر ماكم تعرفو . صاحبتي كانت تجي حذايا للدار ، هذا تفصيل موش باش نتوسع فيه ! آما المشكل إنها كل ما تجي تضيعلها فردة متاع بلوطة ! باهي باش نكونو واضحين صاحبتي عندها حكاية حكاتهالي قبل و آنا ما عطيتهاش أهمية باهي صاحبتي هذه أول ما تعرفت عليها حكاتلي إلي دارهم مسكونة و مسكونة بناس طيبة ، كل ليلة تحلم بمرا تلبس روبة بيضة ، تجي تحكيلها حديث لوعة رد بالك من فلان راو بيه و رد بالك من فلتان راو ناوي على درا شنوة و قتلي راو أمي زادة تحلم بنفس المرا ! كل ليلة و نفس الكلام تقولهولها ! آنا برجولية وقتها ، خذيتها على أساس ريق بنات و ماكم تعرفوه شكون ينجموا ! حاصيلو ، صاحبتي كانت كل ما تجيني و تدخل معايا للدار يبدى النفس يتسكر عليها و تقلي نحب نخرج و جها كان يصفار و يمشي و يجي ألوان حاصيلو جاتني مرة ، قتلي ما تتغشش راو الدار ما عادش نحب ندخللها ! آنا قلت راو باز صارتلها مشكل ، لوغة أمها سمعت و لا شكون شافها و قال قلتلها على راحتك ! آما المشكل قتلي ، وإنت برة إكري مع ڨدور و سيب عليك مالأولاد ، هاك موش ماخو راحتك ! آنا حسيتها مخبية حاجة اما ما عطيتهاش أهمية الحكاية و تلفت الجرة ! ايا عاد في ليلة مالليالي ! صارت حكاية غريبة ، و آنا البطل فيها شدو في مخاخكم حكاية صاحبتي ، قلتلكم في ليلة صارت حكاية ، عندي صاحبي ! مقرعش ديما عاملينو تكركيرة ، في النوم يحكي و يخلوض ! عاد الليلة هاكي من غدوة عندي إكزامان ، و ليلتها سهرت برشة ، قلت تو نقوم الصباح نقرى ! نتفكرها كيف توة ! مع الساعتين متاع الصباح رقدت ! هو راقد على جراية بجبنب فرشي في القاع ! جاي على نهارين وقتها ! آنا تلفتت للحيط و بديت باش نغفى ! الباب تحرك بالشوية و تحل و الكوبة عملت حس ! آنا موش نشوف في شيء خاطر عاطي بظهري ! و سمعت حس ساقين عبد ! آنا قلت راو صاحبي يلوج على شارجور البيسي عاد ما تلفتتش و لا حاجة ! آما المشكل صاحبي الي راقد لوطة بدى يلهث ! آنا برجولية نعفو ديما يخلوض في النوم ، قلت آنا توة باش نرقد ! كان نقوم تو تتكعبرلي في الإكزامان ! كملت رقدت و نذكر الحكاية هاذ صارت بين 2 و 3 متاع صباح ! قمت الخمسة ! ساعتين نوم كهو باش نقرى ، نلقى سي صاحبي هذا فايق يرحي في الدخان قتلو صباح الخير ما جاوبنيش و دخل بعضو ! قلت هالصباح المبروك صبح يهديك ، مشى داخ بعضو للبيت الأخرى . حاصيلو حكاية 6 و نص قامو لولاد ! جبدنا الكل و آنا معاهم و قالنا : لولاد الدار مسكونة !! لازم تنقلو !!! حاصيلو ، في آش فمة آش فمة ! قالنا ، مع الساعتين متاع الصباح آنا بديت باش نرقد ! و آنا هكاك ! عكشت و ما عادش نجم نتحرك ! تقول بو تليس ! آما المشكل تشليت موش مخنوق و لا متضايق ! جيست ما عادش نجم نتحرك ! قال و آنا هكاك ! نرا في الباب تحل و نرا في جمال ( إلي هو آنا ) داخل مالباب ! المشكل آنا راقد وراه !!! يعنو هو بيني آنا و الباب ! قال ! جاني و يڨحرلي و حط يدو على راسي و بدا يقرى عليا في قرآن و قال حسيت بدني سخن تقول نار ! قال كمل و ضحك و خرج قال وقتها نجمت نتحرك تلفت ورايا نلقى جمال راقد و عاطيني بظهرو في فرشو ! حاصيلو ما نحكيلكمش ! عملناه ضحكة مسكين آما كلنا نكذبو على رواحنا ، خاطر آنا واحد مالناس ركبتلي ! شبيك يا ولدي حكاية فيها آنا مرة وحدة ! حاصيلو ! تعدات هاك الفازة ! و آنا قعدت مهلوس ! مالليلة هاكي ! بدات حكايات غريبة تصير في الدار ! أول حاجة ريحة اللطف تقول حاشاكم ڨمة و لا حاجة في الدار ! ولينا نسمعو في أصوات ، كيف الي نسمعوهم في الحمام ، صدى هكة متاع تڨربيع و حاجة طاحت ! ولات الشبابك نسكروهم و لاو يتحلو عيناني تدخل ريح قوية و البرة ما فماش ريح و لا حاجة طقس لاباس ! و الماعون يتكسر وحدو كل صباح نقومو نلقاو حاجة طايحة ! أيا وقتها ماعادش فيها ! فهمنا كل شيء ! آما قلنا تي إيه قلو جن قلو مسكونة هانا ڨاعدينو هاو مونسينا أيا جات الصلاعة روحنا و رجعت آنا أول واحد ، متوحش صاحبتي ، آنا وحدي في الدار و الشي زاد عاد ! ساعة آنا روحت و حاجة غريبة عرضتني ! ما عاد فمة حتى قطوس في الدار و في الفيراندا ! حتى قطوس ! إلا قطوس أكحل أقسم بالله قد كلب متوسط ! يجي كل شيء كان قطوس ! آنا جيت داخل عملتو بش بش جاني يجري دحنس على ساقيا و بعد كش عليا و عمل هاكا الصوت متاع القطاطس كيف يتعارك و ڨدميني من صبعي ! بالرغم من إنو كان يتدحنس عادي ! دخل للدار ؛ 15 يوم فارغة ،نلقاها داخلة بعضها ، إشي موبل طايح ! إشي ماعون مكسر إشي وسخ ... حاصيلو كيف نهار دخلنالها ! تفجعت الحق ، خرجت نجري ، مشيت لمرى الي ساكنة بجنبنا ، قلتلها شنوة هذا ! الدار تسرقت و لا شنوة ! جات المرا ، و دخلت و قاتلي والله ما نعرف ولدي ! اما الي بهتني نها ما تعجبتش ! و إستغربتش تقول حكاية عادية ! كلمت الأولاد جاو نهارتها ! قلتلهم إجاو تفقدو دبشكم ظاهرلي تسرقنا ! أيا جاو ، ما لقينا شيء ناقص هوما قالو راو ممكن مفرخ درا كيفاش دخلو للدار و فسدوا و انا برجولية ما تعداش الحكاية ! الأولاد مشاو للمرى مولات الدار ! قالولها مادام الدار برجولية موش عادية ! و زيد 350 برشة ! قعدو يتناقشو معاها إنها تنقص في السوم ، عاد هوما يحبوها تنقص 40 و هي قالت ما تنقص كان عشرين ! شدو هالأسوام هادي في مخاخكم ! مشيت لصاحبتي ! قابلتها ! أول سؤال سئلتهولي بعد سافا ، قتلي بربي باش نسئلك كيفاش سكلها المرا مولات الدار ؟ آنا جيت باش نوصفها و هي وصفتهالي !!! والله تقول تعرفها قلتها والله هاكي هاكي هية ياخي منين تعرفها ! وجها صفار و سكتت و قعدت نهار كامل ساكتة ! حتى لين تعاركت معاها قلتلها هاذ مقابلة تقابلني بيها بعد 15 يوم ! أيا روحت نهارتها للدار ، و نهارتها شفت حاجة عمري ما ننساها ! حاصيلو سهرنا عاديو بعد رقدو الأولاد ، و آنا سهرت على فيلم ! و انا هكاك حسيت حاجة تحركت بزربة في البيت ! نحيت البي سي و بديت نسمل ! نهز عيني وين صاحبي راقد مقابلني ! نلقى حاجة كحلة فوقو و تتحرك ! قعدت نستعوذ و بسمل و نقرى في القرآن و آنا خايف باش نموت آما صدقوني ما نجمت نتحرك زدت ثبتت ، نشوف في راجل كامل ! متربع فوق صاحبي ، لحيتو طويلة و هو يعمل طولو نص ميترو و لا 75 صم ! متربع و لابس لبسة كيف متاع الشيعة ، كوفية كحلة و قميص و لا آش يسميوه أكحل و قاعد يخزرلي و يڨحر ! و عينيه درا كيفاش ! كبار أكبر مالعادي آما ماو ظلام الدنية ما ثبتش برسة ! حاصيلو قعدت نقرى في القرآن و نبسمل حكاية 30 ثانية و هكاك إختفى تدريجيا وحدو ! حاصيلو قعدت مصدوم ساعتين كاملين في بلاصتي ! و بعد قمت و آنا بكلي نرعش ! قمت نجري حليت الباب و خرجت نجري ! ! عديت ليلة كاملة في محطة باب الخضراء متاع الميترو ! و آنا في شورط و خلعة ! الصباح حكاية 6 هكاك ، مشيت للقهوة في الحومة ، السارفور يعرفني قتلو بربي التاليفون لحظة قتلو حالة مستعجلة ، عاد مدلي التاليفون كلمت صاحبي الداخل قتلو أخرجلي أكيد خرجلي صاحبي حكيتلو آش فمة ، ركبهالي إلي آنا نتخيل ! دخلت معاه و آنا نسمل و نستعوذ مالشيطان ! و نرعش بكلي ! حاصيلو الله يهديه ركبهالي إلي آنا نتخيل ! و قيم الأولاد و عملوني تكركيرة ! أيا روحت للدار ، أمي معلمة ، عندها هاكا المعلقات متاع التربية الإسلامية فيهم قرآنو دعاء و هاكا الفازات ! هزيت منهم قرابة 50 ورقة و علقت في الدار الكل ، وخاصة البيت الي انا و صاحبي فيها ! و اللية هاكي حطيت البيسي وقت باش نرقد ! حطيت القرآن في الميديا ، القرآن كامل ! من غدوة نقوم على الصباح ! نلقى القرآن الكل في القاع و الأدعية وكل شيء و البيسي مسكر ! و الشارجور منحي ، أور هو ما ىكدم كان بالشارجور ! سألت الأولاد قالولي موش أحنا وقتها هوما بداو يصدقو إلي فمة حكاية غريبة ! فمة مشكلة ! الآيات الكل و القرآن اكل طاح إلا معلقة وحدة : اللهم إني أعوذ بك من الخبث و الخبائث ... كان هاكي قعدت ! هالدعاء هذا يتقال وقت وآحد يدخل لتواليت و لا حاجة منجوسة ! هنا باش نرجع لحكاية صاحبتي مرة صاحبي جات حذاه صاحبتو للدار باش تبات ، ماني قلتلكم كنا ليبراليين على الأخر ! و صاحبي هذا آنا وياه فرد بيت ! ديما نوصيه نقلو ما تجيب صاحبتك باش تبات كان كيف نبدى آنا موش هنا راني ما نبات كان في فرشي ! أيا نهارتها ، البيت لخرى فارغة ، مشيت لغادي ! و هو وياها في بيت وحدهم ! تعدات ليلة كالم وقتها ! الصباح تحكيلنا ! قالتلنا ، في الليل قامت مشات للتوالات ( و هاني جاي لحكاية التوالات حاشاكم ) قالت و هي متعدية شافت قطوس أكحل كبير واقف في الشباك ! و هي خارجة راجعة للبيت ! القطوس ولا في وسط لدار و جايها يجري و يصيح ! هربت للبيت و سكرت الباب مشات تقيم في صاحبها ، هي تضرب فيه بالكف و هو ما قامش ، جاتني آنا في البيت ، تصيح و تبكي و تفيق فييا ما قمتش ! حاصيلو ! عداتها ليلة كاملة بكى حتى للـ6 و نص ، باش قمنا أحنا حكاتلنا ! فتكم بحاجة ! القطوس الأكحل هذا إلي ملي جاء هو ماعاد فمة حتى قطوس ! المرى قالت موش تابعني و قالت إلي قطاطسها الكل هربوا ! و زيد نسكروش الدار الكل كل نقبة في الدار ! رسمي في الليل نقومو نلقاو القطوس الداخل ! منين دخل الله أعلم و زيد فوق هذا ، بربي القطوس وقت يجي لدار وين يمشي تي ماو للكوجينة و لا لا ؟ لا القطوس هذا رسمي ندخلو نلقاوه يحفر في الفايونس متاع الدوش ! يحفر من غير ستوب و كيف نقولولو كس ! يغور علينا ! قطوس تقول كلب و راسو صحيح ! و ديما درا كيفاش يدخل ! و يحفر ! لين نضربوه بمصلحة باش يهرب ! أيا منهم نهار ، خوكم كبشت في صاحبتي باش تروح معايا ، باش نلعبو طرح رامي هههه ، عاد بالسيف روحت معايا ! آما المرة هاذي هي دخلت و وجها صفار و خرجت تجري و تصيح لبرة ! يا بنتي شبيك ! في طول ! في عرضك ناس تتفرج ! قتلي الدار هذه اليوم تنقل منها ! اليوم تخرج منها ! مخي وقف وصلتها لدارهم ! و روحت خايف برجولية ! آنا دخلت شعلت الضو و الضو قص ! آما الي هبلني حاجة ! مشيت نجري للتاليفون ! نلقاه قاعد يشرجي ! تعني ضو ما يمشيش ! و التاليفون يشرجي ! قلت باز ماس ! آما سامحوني في الدار الكل ؟ إي شبيه البريز يخدم ! مشيت ضويت بالبورطابل و جبت فايوزة حاطها حذا راسي ! الفيوزة ما تمشيش و البورطابل يشرجي ! يعني أي سورس متاع ضو لا ! ليلتها بايت انا و صاحبي و واحد ضيف كهو في الدار ! و هو جايب صاحبتو باش تبات ! أيا قتلو برجولية ! ما عادش فيها راو هاذي ! كان الليلة نشوف القطوس لكحل في الدار نهبل ! لا علينا ! سهرنا حاطين البيسي و الكلنا في بيت و حدة ، زوز ولا د صاحبة صاحبي الكل بايتين في بيت وحدة ! ايا الحاجة الي مڨمرينها في الدار كونو كيف يبداو الأنتريبتور لوطة راو الضو يخدم و كيف يبدى الأنتيربتور الفوق راو طافي ! مشيت قبل ما نشدو بلاصتنا ! طفيت الضو الكل و البيت الي أحنا فيها م نعملش عليها خاط فيها ماس ! طفيتها و خليت جيست ضو الكوجينة يشعل ! هكاك باش كان رجع ! نفيق بيه ! أيا عاد ركزولي على التوالات الضو متاعها طفيتو بيدي ! نتفكرها و بابها الي هو مقابل باب بيتنا ! سكرتو بيدي خاطر بيناتنا راكبلي فيلم منها الحكاية ! و الباب هذا ما يتحل إلا ما تعطيه ضربة بكتفك ! يعني كاسح ! أيا ركشنا في ابيت نحكيو و درا شنوة ! حبيت خوك نتكيف سيڨارو خرجت للكلوار و حليت الباب ! و شعلت ! آنا ما إنتبهتش آما نطقتلي الطفلة قاتلي : جمال موش طفيتو الضو و سكرت الباب متاع التوالات ! نتلفت ! يا لطيف نلقى البيبان الكل محلولين بما فيهم البب البراني و الشبابك كيف كيف ! و الضو الكل يشعل متاع البيوت الكل ! الكلنا لخلخنا ! و وجوهنا صفارت و تخرتلنا صاحبي غمزني باش ما نشلقش قدام الطفلة لا تموت مالرعب ! قلتلها لا لا ماني حليتو ! حاصيلو درت آنا و صاحبي ! درنا مالخوف نطفيو في الضو الكل ! و نسكرو في البيبان ! سكرناهم الكل كان حاجة برك ! باب التوالات ما نجمتش نقربلو خفت ! طفيت الضو ! و هربت نجري للبيت ! حاصيلو في وسط البيت ! قعدنا الكل ساكتين كان الطفلة تحكي خاطرها موش فايقة بشيء و أحنا الثلاثة الخوف قاتلنا موش فاهمين شيء ! خوكم شديت كتاب مصحف و نقرى و نعاود ! أيا أحنا هكاك ! و يتحل الباب بقوة ! تقول ريح ! آما المرة هاذي غريبة صارت زادت أكدتلنا كل شيء ! البيبان الكل مسكرة أوكي ! اما الضو يشعل فيهم الكل ! و باب التوالات ! مسكر ! إلي آنا ما سكرتوش و الله ! و زيد ما يتحل و يتسكر كان بكتف ! أيا وقتها سايي لا عاد فيها تفدليك و لا حديث ليلة كاملة الكلنا في فرش واحد قاعدين متغطين و حاطين القرآن مالبي سي الي بعد قص شارج و ليلة كاملة هكاك لين جاء الصباح ! كلمة لربي لا توة تتفكروها حكاية صاحبتي ؟ من غدوة مشيت ملخلخ دايخ بالنوم مفوع و كلي أصفر تقول مريض بالبو صفير قابلتها ،و هي زادة جات هكاك كيفي ! بعد صباح الخير ! هي تقلي عندي ما نحكيلك و آنا نقلها عندي ما نحكيلك ! في أحكي في أحكي إنت ! بدات هي تحكي ! قاتلي البارح حلمت حلمة غريبة ، حلمت إلي إنت في دارك ، و الدار هي في المنام حستها داري آما هي ما تشبهش لداري جملة ! قتلي دارك في شكل توالات كبيـــــــــــــــــرة ! مسخكة و فيها ريحة غريبة ! و قاتلي ! مالفة تجيني هاكا المرا في المنام المرة هاذي جاوها ! خيالات كحل ! يصيحو و يعيطو و قالبين الدنيا و يحكيو بلوغة مش مفهومة فيها برسة حس ! و قتلي بعد قالولها بلوغتنا : كان ما يخرجوج الجمعة هاذي مالدار باش نبداو بيه هو ( عليا آنا ) و قتلي يطبطبو في البيبان و يحلوو يسكرو في الضو و شفتكم إنتوما خايفين و تصيحو ! قتلي يربربو هوما و يحكيو في كلام موش مفهوم آما فيه برشة كفر حاصيلو وخرت لتالي و تفجعت ! قلتها يا فلانة ! هذا هو الي صار البارح ! و ليلة كاملة ساهرين ! سكتت و سكت و وجوهنا تقول كعبة قارص ! قتلي تتفكر وقت سألتك على المرا ؟ قاتلي لمت إلي صحابك فلان و فلان و فلان ! ( إلي بالحق هوما الي مشاو ) يحكيو مع مرا كيف وصفتهالك ، هي تقلهم والله نكريلكم كان ب 20 و هوما يقولو لا والله 40 ! قاتلي قلت ما تجيش الفازة دار ب 20 و 40 ! قلتها يا فلانة الي سميتهم بالحق مشاو مرة ! اما هوما يحبو ينقصو 40 و هي شادة صحيح في 20 ! صدقوني وجوهنا لا يوريها لمؤمن ! قعدنا ساكتين قعدة كاملة ! روحت آنا دخلت نرڨل للدار لميت ساك ، و مشيت لدار واحد صاحبي مشيت عديت عندو بقية الشهر ! و ما رجعت للدار كان مرة برك ! مرة حاشاكم ، تغصورت لازمني ندخل لتوالات و آنا في الفاك ! و زيد وقتها ماعادش عيني باش نقرى ! و مازالت عنا محاضرة و لا زوز ! أيا جاتني صعيبة باش نقول لصاحبي هات مفتاحك ! قلت برة خليفتي على ربي ! قصدت ربي للدار ! نلقى القطاطس رجعو ! آما فيهم برشة كحل ! سملت و دخلت و آنا ماني نقول في شيء غير : اللهم إني أعوذ بك من الخبث و الخبائث ! دخلت للتوالات آنا سكرت الباب و الدنيا تقلبت ! ماعون طايح و قطاطس تتعارك بجنب الباب تاع توالات و دينيا تقلبت أيا خفيت روحي و خرجت و طرت من هاكا الدار أيا كلمت أصحابي ، قلتهم هيا نلوجو على دار أخرى و لا راني خارج مالكرا ! عكسوني كملو شهر بعدي صار فيهم ما صار ! واحد قام مرة عينو زرقة و مرة واحد زلق كسر يدو و لاخر مرة درا شنوة شاف الحاصل حكاولو قلتلهم تستاهلو خاطر ما خرجتوش ! آنا بعدها عملت نافات بنزرت تونس ، آما قبلها قعدت نلوج على دار ! ما لقيتش ! صاحبتي قتلي حلمت بيا قاتلي جاتها المرا متاع العادة قالتلها جمال موش باش يرتاح ! كان في دار وحدة إسمها حبيبة ! أيا ما نطولش عليكم وقتها كل شيء وليت نصدقو ! ما سهلش ربي في دار ! وليت نعمل نافات ! و مع الوقت 3 أشهرة القدام تقصت مع صاحبتي ! ومع الوقت بديت ننسى في التفاصيل حتى لين وليت مع الوقت نقول بالك إنت تخرم يا جمال ! بالك إنت تهز و تنفض ! بالك إنت كبرتها ! حاصيلو في الصيف و انا مرة قاعد نتذكر ! قاعد نضحك على روحي كيف ما إنتوما قاعدين تضحكو على الحكاية ! خطفت في مخي حكاية ! دار حبيبة ! پفف تي هاي فلانة طلعت تهز و تنفض عليا تي هاني عملت نافات و ما دار حبيبة و لا وذني ! و آنا هكاك و مخي يتصنطر وحدو ! دارنا ! الدار الو ساكنين فيها توة ! مقيدة بإسم خالتي ! و إسمها حبيبة ! و هذه كآنت قصتي مع الدار المسكونة ، إلي يحب يصدق يصدق و إلي مكذبني ما نلوموش ! عندو الحق ! فمة شوية تفاصيل شخصية خبيتهم و فمة تفاصيل ما حكيتهمش خاطر ما نجمش نوصفهم وصف دقيق كان باش نحكيهم تو تقولو راو يهز و ينفض ! الدار بين باب عسل و باب الخضراء في نهج بنزرت ، في النهج الي يهز لوزارة التعليم ( ضاهرلي ) و المحكمة العقارية ! الدار البيضة إلي فيها فار فورجي أزرق ! فيها شجرتين متاع سفرجل ! و السلام دجو ! و أقسم بالله العلي العظيم كل كلمة حكيتها صحيحة !