لمن يعتبر ...

يحكيو على زوز أخوة توأم ، الوالد ، هز ربي حاجتو على بكري و خلالهم قطعة أرض صغيرة ، قالهم هاكي وارثها بو على جد و نخليهالكم أمانة باش تورثوها لولادكم بعد ، إخدمو فيها و إسترزقو من خيرها و حطوها في عينيكم . الأولاد وقتها كانو صغار ، ما يفهمو شيء مالدنيا ، ما فهموش كلامو بالڨدا ، عاد جاء عمهم قلهم آنا في مقام بوكم ، وآنا أكبر منكم و عندي في الدنيا خبرة ، إجاو إخدمو في الأرض و آنا وصي عليها ، إخدموها و آنا نبيع و تو نعطيكم حويجة ، أزرعوها و آنا نبيع و نعطيكم حويجة ، آما خير ولا يغورو عليها البراينية ؟؟
الأولاد ، بما أنهم صغار ، ما يفهموش ، وافقولو ، مش وافقولو برك لا وزادو خدمو و عطاوه .
عادا عمهم ، بطل الخدمة ، وشد الدار لا خدمة لاڨدمة ، كل موسم توصلو الفلوس ، يرمي حويجة لهاكا زوز وليدات و ياكل هو الباقي !!
تعدات سنين و الحالة هكاك ، كبرو هاكا الوليدات و ولاو رجال ، و كبر عمهم وولا راجل كبير .
كبرو آما قعدو كيف العبيد في رزقهم و كبر هو و ولا معلم كبير في السوق من رزق غيرو .
فمة واحد من هاكا زوز وليدات الي ولاو رجال ، كان ديما كيف يقعد بينو و بين روحو يقعد يخمم :
علاش فلوس خدمتي و الي في رزقي ياكل فيها عمي و هو ما عندو حتى حق فيها ؟؟ علاش ؟؟
سؤال هذا قعد ديما يدور في مخو ! كل مرة يجبد لخوه على الموضوع يجاوبو خوه يزي أسكت !! باش نقطعلنا خبزتنا ؟ يسكت كيف المغبون و يكمل يخدم ! موش مرة .. موش إثنين !! كل ما يجبد الموضوع يقلو خوه أسكت !! باش تباصينا !!
عادا جاء مرة نهار ، قام هاكا المغبون على الصباح و حط في مخو حكاية : اليوم باش نرجع رزق بابا و نولي معلم على رزقي !!
قال إل خوه هيا معايا للقاضي متاع المدينة نحكيوا الحكاية بالك ينصفنا ، قلو خوه برة وحدك آنا ما نلعبش بخبزتي . تشجع هاكا المغبون و هز روحو ومشى للقاضي في الباب ما حبوش يدخلوه قعد يستنى نهار كامل قدام الباب و شيء . ! رجع من غدوة للخدمة يلقى خوه صب بيه الصبة و يلقى عمو راميلو دبشو إل برة و قلو ما عادش تعتبها الدار و الخدمة ! بات مسكين البرة جيعان ڨرسان .
من غدوه عاود مشى للقاضي ، كيف كيف طردوه مالباب قالوا القاضي عندو خدمة موش باش يقابل الحثالة الي كيفك ، قعد مسكين كل يوم يمشي و يطردوه يمشي ويطردوه ، قعد مسكين جيعان ياكل كان حنو عليه العباد و يكسي روحو مالي يلقاه مطيش .
حتى جاء نهار !!!
هو قدام الباب و القاضي خارج ، نڨز عليه مسكين المغبون و يبكي و يشكي و يبوسلو في يديه و يقلو أنصرني ينصرك ربي ، عاد دخلو القاضي و سمع حكايتو و سخف عليه ! كلم الحرس متاعو قلهم هذا تمشيو معاه للأرض تخرجو عمو و تقولولو راو متاع الناس للناس .
فرح مسكين هاكا المغبون ، مشى معاه الحرس متاع القاضي و خرجو عمو و هزوه للحبس ، جاو باش يهزوا خو المغبون قالهم لا هذا راو خويا و الرزق رزقو زادة آما ربي يهدي و كهو !
عاد رجع المغبون للأرض و حب يبدى يخدم فيها . جاء باش يحرثها ما لقاش عندو فلوس ، قال إل خوه إيجا نحطو فلوسي على فلوسك و نكريو ثور باهي و محراث من عند شهبدر الفلاحة ، و نحرثوها الأرض .
خزرلو خوه قلو لا !!! الفلوس الي عندي باش نخليها تحت الجراية و الأرض راهي ماعادش تنتج كيف قبل و بلاش عمي الي عندو خبرة ما نجمو نعملو شيء !! مسكين هاكا المغبون مشى حط الي فيقو الكل وزاد دار منا دار منا و تسلف تفتوفة جاب بيها الثور و المحراث ، قال إل خوه باهي هاني جبتهم بفلوسي إيجا عاوني على الأقل نحرثوها مع بعضنا ! قلو لا !!! الأرض ماهياش باش تدخللنا فلوس ، ماو عمي دخلتو للحبس و هو الوحيد الي يعرف يخدم الأرض !! مش مسكين كالعادة هاكا المغبون حرثها و تعب فيها وحدو ! مشى إل خوه قلوا ! عيش خويا هاو الأرض فكيتها إل عمي و الحرث و حرثتها ! آش قعد ؟؟ قعد كان باش نزرعوها !! هاي ولات ساهلة هيا عاوني حتي بالجهد ! قلو لا !!! ماني قتلك بلاش عمي ما عنا وين نوصلو !! خدمة الأرض راهي صعيبة ولازمها شكون يفهم ! ماك حطيت عمي في الحبس إتصرف وحدك !! كالعادة مشى مسكين هاكا المغبون دبر تفتوفة أخرى فلوس و شرى الزريعة و زرعها وحدو ! و مسكين قعد مسال مع الناس الكل ، جيعان في كرشو مهدود في بدنو مالخدمة !
جاء وقت الحصاد ، مسكين والف ما مشاش إل خوه تعدى ديراكت للأرض يحصد فيها وحدو ! تهد مسكين وبدنو كلو مدمم مالشمس و التعب !!!
عامتها جاء العام صابة ! لم برشه شعير و ڨرط !! حاصيلو !! فرحان مسكين مشى للڨايد متاع القمح باش يبيع محصولو و يخلص لعباد و يهنى أول مرة بفرنك من عرق جبينو من أولو إل آخرو من غير ما يجي شكون يفكهولو !! عاد قبل الحصول للڨايد و هو مروح للدار يلقى خوه يستنى فيه في الحوش !
قلو خويا الرزق ، راو رزقنا أحنا الزوز و الفلوس هاكي نقسموها بالنص !!
أيا قولولي !! يقسم معاه ولا لا ؟؟ عندو الحق الخو في الرزق هذا ولا لا ؟؟؟ جــــــــــــــــــــــــــــــاوبوني