وجوه ذابلة

وجوه ذابلة، عينين طايحة، لحي هايجة ، شعورات مجعدة ، ظهورات مقوسة ، أكتاف مهدودة ، ريوس مالقاع ما تتهزش !
طريق واحد ، و الناس تمشي فيه ! فرد خطوة ، خطوة متهالكة متطايحة ، الساق تتهز بالسيف و كيف تطيح تهد الأرض ! صوت الخطوات ، قوي ، يهد جبال ، فرد إيقاع ، إيقاعو حزين و ذليل .
طريق واحد ، و الناس تمشي فيه ، يمشيو في سكات ، كلمة ما تتسمعش ، همسة لا ، توشويشة لا ! كان صوت هاكا الإيقاع الحزين ، إيقاع الإنكسار و الذل و المهانة !
طريق واحد ، و الناس تمشي فيه ! و ماشين فرد ثنية ، لا يميلو يسار و لا يميلو يمين ، فيهم شكون يعرج و فيهم شكون يحبو و فيهم شكون على كرشو يزحف ! اما هاكا الإيقاع ، الناس الكل محافظين عليه !
تخمرو بيه ، شدتهم النوبة متاعو ! ما ينجم حد يخرج على الريتم !
الكل فرد خطوة في فرد طريق إتبع في هاكا الإيقاع !
في ها الطريق على الأجناب ، فمة شجر!! آما أوراقها خرفت و شاحت و طاحت ، تحتها ضباع و كلاب مسعورة جيعانة ! تستنا في إلي باش يخرج على الطريق باش تنهش لحمو تشبع كروشها و جوعها !
فوقها طيور الموت و الجيفة ، واقفة تستنى في شكون باش يطيح في وسط الطريق باش تنقب جلدو و تقطعلو لحمو و تاكلو مصارنو و هو حي !!
ريحة الجيفة ، تتشم من بعيد ، ناس مخنوقة ، بالسيف ما تتنفس ، لكن !
ديما في نفس الإيقاع ! نفس الخطوة و ديما في نفس الثنية في نفس الطريق !
لا يميلو يسار و لا يميلو يمين !
ساعات !! واحد يهز راسو ! يحب يعرف ! آخرتها فين ؟ فين باش تهزو هالثنية ؟!! فين آخرتو هالطريق !
راسو يهز ! و يجيوه الضباع و الكلاب و طيور الموت ! تنهش لحمو و تقطعلو أطرافو و تشرب دمو و هو يصيح ! و ينادي ! يا ناس فيقوا ! يا ناس !! هزوا ريوسكم ! يا ناس راني خوكم ! راني منكم ! راني قاعد نموت ! عاونوني !!
و لا حياة لمن تنادي ، حد ما يتلفت ، الناس تكمل تمشي ، ما يضيع حد الإيقاع ! نفس الخطوة ، نفس الإيقاع ، نفس الثنية و نفس الطريق !
ونفس المصــــــــــــــــــــــــــــــــــــــــــــــــــــــــير