الناطقون بعد الـ14 ... من أنتم ؟

الناطقون بعد الـ 14 ، هكذا أسميهم ، هم من كانوا شياطين خرساء عندما كان الظلم و الذل يحكمنا ، هم من لم يكلفو أنفسهم الجهاد بأضعف الإيمان : كلمة الحق .
كلنا كنا مظطهدين ، كلنا كنا مقموعين و كلنا كنا مقيدين ....

لكن لم نكن كلنا شجعان و نزهاء أمام حق شعبنا ، و حق وطننا و حق تاريخنا و حضارتنا ...

هناك من إختار أن يكون شريفا و أن يجاهد بما إستطاع للجهاد من وسيلة : كلمة الحق عند سلطان جائر و هناك من إختار أن يكون نعامة و يغمس رأسه في الرمل ، يعيش رافعا شعار : أنا لا أرى ، لا أسمع ، لا أتكلم

لا ألوم هؤلاء و لا أتهمهم بالعمالة و لا الخيانة كما يفعل البعض ، فمستوايات الوعي أو الجرأة تختلف من فرد لفرد ، وهذا خارج عن نطاقنا ...

و لكن ما يحز في نفسي اليوم ، هو محاولة البعض منهم إبراز نفسه كتشي غيفارا تونس ، و كقائد ثورة لم يشارك فيها أصلا ، و ما يزيد الطين بلة هو نجاح البعض من المتعيشين من الثورة في ربط هذه الصورة بنفسه .

أرى اليوم إنتهازيي الثورة و راكبيها ، سواء كان ذلك في العالم الإفتراضي أو الواقعي ، يسردون وقائع ، طبعا هي من نسج خيالهم ، لبطولاتهم و وقوفهم الدائم في وجه بن علي و طرابلسيته ...

لن أتطرق للأشخاص هنا ، حتى لا أتهم بشن حملة على فلان أو فلان ، و لكني سأتحدث عن بعض الصفحات الفايسبوكية دون تسميتها ، صفحات لم أسمع بوجودها ، رغم مدون أعمل في المنتديات و مدونات البلوغسفير و صفحات الفايسبوك منذ سنين ، ـ لم أسمع ـ قبل 14 جانفي ...

صفحات و إتحادات للصفحات تأسست كلها بعد 14 جانفي ، أي بعد زوال خطر بن علي ... صفحات تزعم أنها من قام بالثورة ، صفحات تزعم أنها لطالما تعرضت لمضايقات إبان حكم الطاغية ...

الحقيقة التي لا ينكرها أحد ، أن الثورة لم يقدها أي كان ، الثورة إنطلقت من سيدي بوزيد كمسيرات إحتجاج و مطالبة بحق البوعزيزي غفر له الله ، الثورة ولدت هناك ، و ترعرعت في الڨصرين و لم تكن وقتها ثورة بعد ، الثورة لم تصبح ثورة إلى بعدما شملت كل جهات تونس ، و أعود و أقول لم يقدها أحد .
لا ينكر أحد أن الصفحات الفايسبوكية ساندت الثورة ، بتغطيتها إعلاميا ، و لكن لم تقدها ، صحيح أنها حرضت على الثورة و لكنها لم تقدها ...

بعض مشرفي الصفحات ، كانوا سباقين في نشر الأخبار التي كانت محينة و لعبت دور الإعلام الرسمي حين كان الإعلام الرسمي يتهم الثوار بأنهم " مجموعة من الأفراد الملثمين " البعض من هؤلاء كانو يتحركون ميدانيا و إفتراضيا و كانو بحق عاملا أساسيا في إنجاح الثورة ، البعض الآخر إختار أن يراهن على الحصان الرابح أو بالأحرى المرشح للربح : بن علي و أزلامه و عارض الثورة و بعد 14 جانفي أخفى صفحته و إختفى ...

باختصار مجموعة من الأسئلة لم يدعي البطولة :
أين كنت قبل 14 جانفي ؟
متى أنشأت صفحتك ؟
ماهي المواضيع التي كانت صفحتك تناقشها ، هذا إن كانت تناقش أصلا ، قبل 14 جانفي ؟
هل حافظتم على نفس الخط التحريري في صفحاتكم ؟
ماهو تاريخكم الذي يمكن أن تدعموه بدلائل ؟

بإختصار : من أنتم ؟؟؟؟

دجــو رد على مقال : "الحل بيد السبسي" لصالح الحاجة الصادر اليوم 18 أفريل 2011 بجريدة الصريح :

سي صالح الحاجة قرأت مقالك هذا الصباح ، فوجئت بتلك الجرأة الكبيرة التي أصبحت تتحلى بها كلماتك ، هكذا فجأة !!
أيام بن علي لم أقرأ لك سوى كلمات المناشدة و تعديد إنجازات سيادة رئيس الجمهورية الموقر ، لم أكن أبالي فلم تكن الأسوأ بين صحفيي العار ، و لكن مفاجأتي الكبرى كانت بعد الثورة ، تحرر العقل التونسي و تحرر الفكر لدى التونسي و مارس الشعب لأول مرة حرية التعبير التي لطالما سمع عنها .
تحرر الكل ، إلا بعض النفوس المريضة ، مازالت لم تستوعب بعد أن تونس قد نزعت ثوبها البنفسجي الباهت و إزتانت بحلتها الخضراء العتيقة ، تونس تحررت يا سي صالح الحاجة و حرية الصحافة اليوم على وشك أن يكون واقعا نعيشه لولا بعض العوائق والتي يتسبب فيها أمثالك، .
قرأت مقالك و تأكدت أن لا ينفع العقار في ما أفسده الدهر ؛
شكر مقام التقديس للباجي قائد السبسي ، ذلك الذي لم تتحدث عنه حتى بكلمات مقتضبة حين كان بن علي موجودا و بعد ذلك حين تم تعيينه رئيسا للوزراء ؛ اليوم و بعد أن صرح بعدم رضاه عن إقصاء التجمعيين غمرتك المشاعر و الحنين للماضي ، ماضي المناشدات ، ماضي المدح حتى الغزل في بن علي ، في غمرة هذه المشاعر تخمرت ، حتى كتب قلمك دون سيطرة منك ـ و أنقل هنا ما قلته حرفيا ـ :
==============
كل يوم أتأكد أن تونس محظوظة بتولي السيد الباجي قائد السبسي رئاسة الحكومة المؤقتة في هذه الظروف الصعبة و الدقيقة .. و المفتوحة على كل الإحتمالات و أتأكد كذلك أن الله أراد ببلادنا خيرا عندما تحمل السي الباجي المسؤولية بشجاعة و محبة خالصة للوطن و للتونسيين .
==============
كلام حقيقة أفحمني ، بالمعنى الهزلي لكلمة إفحام ، واصت القراءة علي أجد مفاجأة في مقالك تفند ما ورد على ذهني من ذكريات أيام المناشدات و أجواء رفع التحديات ـ و أنقل هنا ما قلته حرفيا ـ :
==============
وقد تأكد لدي هذا الإنطباع مرة أخرى بعد أن إستمعت إليه و هو يعلق و يحلل و يفكر بصوت مرتفع حول نية إقصاء التجمعيين ... و هي نية خاصة لدى البعض ... و ليست عامة لدى الجميع ... و لا تعبر عن الشعب التونسي و قد تكون نية طيبة و لكنها على طيبتها لن تخدم تونس خصوصا في هذه المرحلة و هي تواجه فترة من أصعب فترات تاريخها الحديث .
==============
أكملت هذه الفقرة و علت رأسي نقطتا إستفهام و تعجب كبيرتين !! رفعت عينيا عن الجريدة ، تمتمت بكلمات لم أفهمها حتى أنا ، فركت عينيا ، أعدت القراءة ، حقيقة لم أخطأ !
نية خاصة لدى البعض ، و ليست عامة لدى الجميع ... و لا تعبر عن الشعب التونسي ؟؟؟؟
سي صالح الحاجة ، أين كنت حين نظم إعتصام القصبة 1 ، 2 و 3 ؟؟ إحدى أهم أهم مطالب تلك الإعتصامات حل التجمع الدستوري الديميقراطي ! ستقول أنك لست قصباويا ، و أنك قباوي و هذا ما قد لا أستغربه .
أين كنت حين كان الثوار يهتفون : خبز و ماء و التجمع لا ! حين كانوا يهتفون : أر سي دي ديڨاج ! حين كانوا يهتفون : يسقط حزب الدستور يسقط جلاد الشعب !
ثم كيف لك أن تدعي معرفة ما يريده الشعب و أنت الذي كنت في خدمة من هم ضد إرادة الشعب لمدة 23 سنة ، وحتى حين إنتفض الشعب و أراد أن يكرس إرادته وقفت أنت و جريدتك في وجه إرادته ! ما أدراك أنت بإرادة الشعب ؟
ثم كيف لك أن تصف أسعد لحظات تونس و أنبلها و أقواها على مر تاريخها المعاصر ، لحظات بناء تونس الدولة المدنية الحرة الديمقراطية بأنها فترة من أصعب فترات تاريخ تونس الحديث ؟؟؟
أحسست بالدم يغلي في رأسي و تشنجت أعصابي و لكني أكملت القراءة بقيت كلماتك تصعد في إستفزازها ـ أنقل كالعادة الفقرة التالية من المقال ـ :
============
لقد تكلم سي الباجي كلام المسؤول الناضج الذي يصر على العقلانية و الرصانة و الواقعية حتى و إن سار في الإتجاه المعاكس و حتى لو إقتضاه الأمر إتخاذ قرارات غير شعبية . و ما قاله سي الباجي من ضرورة التمعن في قرار الإقصاء و دراسته و تحليله و عرضه على الإستفتاء الشعبي إذا لزم الأمر و هو ما يقوله العقل و المنطق و الحكمة
============
أكملت قراءة هذه الفقرة وضعت يدي على رأسي ، تنهدت ، أحسست بدوار و شعور بالقزز ! شعور إفتقدته منذ مدة ، منذ كانت تونس لا ترى إلا بعيون بنفسجية .
حتى لو إقتضاه الأمر إتخاذ قرارات غير شعبية ؟؟؟ دعوة علنية للتفرد بالقرار ؟ للتفرد بالحكم ؟ أثار الشعب ليستبدل ديكتاتورية بأخرى ؟؟ سؤالي الذي سبق و أن طرحته لم يعد إستنكاريا ! حقيقة أصبحت أنتظر منك جوابا : هل كنت حاضرا حين إندلعت الثورة ؟ هل كنت تعيش في تونس التي كنا نعيشها ؟؟
ثم ، كيف لك أن تقترح إستفتاء الشعب حول مشاركة التجمعيين في انتخابات ؟ هل يعقل أن يصوت المواطن أربع مرات مرات في نفس السنة ؟ مرة لتقرير مصير التجمعيين ، مرة للإنتخاب أعضاء المجلس التأسيسي ، و مرة لإختيار رئيس و مرة لإختيار أعضاء مجلس النواب !
صدقني إن قلت لك أن كلامك إستفزني لدرجة لم أستطع أن أكمل المقال ، ولكن ما شد إنتباهي في ما تبقى بل و ما أثار دهشتي هو قولك بكل دنائة و ثقة في النفس
=========
إن إقصاء التجمعيين معناه و بكل بساطة تدشين مرحلة الدخول في المجهول ... ثم إنه قرار يتناقض مع ما ننشده من ديمقراطية و تعددية و تعايش بين الجميع مهما إختلفت مشاربهم و أفكارهم و مذاهبهم .
=========
هنا ، كنت ستتسبب يا سي صالح الحاجة في قتل مواطن بريئ لا ذبنب له سوى أن العاثر شاء أن يقع مقال كتبته أنت بين يديه ، حقيقة لم أفهم كيف لتونسي يدعي الشرف و المصداقية و يدعي دعمه للحرية أن يتفوه بما كتبت ؟؟؟
إقصاء التجمعيين معناه تدشين مرحلة الدخول في المجهول ؟ و أين كانت تونس حين كان التجمعيون يحكمونها ؟ ألم تكن في أسفل قاع مستنقع المجهول و الضياع و الفراغ ؟؟ أم أنك تأثرت بكلمات المدح و الشكر التي لطالما توجهت بها لسيادة رئيس جمهوريتك البنفسجية عرفانا له بالجميل لإنجازاته العظيمة ؟
ثم كيف لفئة لا أقول أنها لم تدعم الثورة فقط ، فمن صمتو إبان الثورة كثر ، و لكن وقفت ضد الثورة و قاومتها ! كيف لهذة الفئة أن تنعم بثمار الثورة ؟ ألم تتعلم الدرس بعد ؟؟ ثورتنا جائت بديمقراطية !! و القاعدة الأولى في الديمقراطية تقول : لا ديمقراطية مع أعداء الديمقراطية !!
هممت بلف الجريدة حين شدتني كلمة أخرى في نفس المقال ـ أنقلها بكل أمانة ـ :
=========
إننا على يقين من أن سي الباجي سوف ينقذ التجمعيين الشرفاء و النزهاء من تحويلهم لفئة من المنبوذين في مجتمعهم ...
=========
أكملت قراءة هذه الجملة ، لففت الجريدة و رميتها في سلة المهملات و تأكدت حينها أن تونس لن تتقدم ما لم يعد التونسي يعتبر صفة تجمعي تهمة

و هذا كلام موجه لك ، يا سي صالح الحاجة و لأمثالك ممن لم يدركوا بعد أن عجلة الزمان قد دارت و أن الموازين قد إختلفت و لم يعودو في موقف قوة يسمح لهم بنعت الآخر بالرجعية والجذب للخلف ، فقد أصبحو هم الآن من يلعب هذا الدور ، و كل الشعب واع بهذا !

بعيدا عن الأجواء السياسية المشحونة و العاطفة التي أصبحت تحرك كيان المواطن التونسي في هذه الفترة و في لحظة صراحة و صدق نقفها أمام أنفسنا و الصدق مع النفس أول خطوة نحو الصدق مع الآخر و النزاهة في المعاملات لا يسعنا إلا أن نقر بأنه مهما إختلفت المسميات يبقى المسمى واحدا ، و مهمى إختلفت الأوصاف يبقى الموصوف واحدا ، الإقصاء هو الإقصاء ، مهما كان من سيقع عليه الفعل ، إسلاميا ، يساريا ، قوميا ، أو حتى تجمعيا كان !!!
الإقصاء هو الإقصاء ، و هذه حقيقة لا تخفى عن عاقل ، كذب كل من إدعى غير ذلك .

و لكن بعد الثورة التي تنادي بالديمقراطية و تحارب الإقصاء : يطرح ظرورة سؤالان : إلى أي مدى يمكن تطبيق الديمقراطية و تبنيه و إلى أي مدى نلغي الإقصاء ونحاربه ؟؟
لا أنتظر منك و منهم جوابا لأن الجواب لا يملكه إلا نشأ فكريا في مدرسة ثورية و أنتم لم و لن تكونو كذا !
الجواب جملة على كل تجمعي أن يحفظها :
لا ديمقراطية مع أعداء الديمقراطية !

دجو المشلول من جرأة التجمعيين الأنذال و رقعتهم ! دجو الي باش يرجع يغني ديــــــــــــڨاج !!

لمن يعتبر ...

يحكيو على زوز أخوة توأم ، الوالد ، هز ربي حاجتو على بكري و خلالهم قطعة أرض صغيرة ، قالهم هاكي وارثها بو على جد و نخليهالكم أمانة باش تورثوها لولادكم بعد ، إخدمو فيها و إسترزقو من خيرها و حطوها في عينيكم . الأولاد وقتها كانو صغار ، ما يفهمو شيء مالدنيا ، ما فهموش كلامو بالڨدا ، عاد جاء عمهم قلهم آنا في مقام بوكم ، وآنا أكبر منكم و عندي في الدنيا خبرة ، إجاو إخدمو في الأرض و آنا وصي عليها ، إخدموها و آنا نبيع و تو نعطيكم حويجة ، أزرعوها و آنا نبيع و نعطيكم حويجة ، آما خير ولا يغورو عليها البراينية ؟؟
الأولاد ، بما أنهم صغار ، ما يفهموش ، وافقولو ، مش وافقولو برك لا وزادو خدمو و عطاوه .
عادا عمهم ، بطل الخدمة ، وشد الدار لا خدمة لاڨدمة ، كل موسم توصلو الفلوس ، يرمي حويجة لهاكا زوز وليدات و ياكل هو الباقي !!
تعدات سنين و الحالة هكاك ، كبرو هاكا الوليدات و ولاو رجال ، و كبر عمهم وولا راجل كبير .
كبرو آما قعدو كيف العبيد في رزقهم و كبر هو و ولا معلم كبير في السوق من رزق غيرو .
فمة واحد من هاكا زوز وليدات الي ولاو رجال ، كان ديما كيف يقعد بينو و بين روحو يقعد يخمم :
علاش فلوس خدمتي و الي في رزقي ياكل فيها عمي و هو ما عندو حتى حق فيها ؟؟ علاش ؟؟
سؤال هذا قعد ديما يدور في مخو ! كل مرة يجبد لخوه على الموضوع يجاوبو خوه يزي أسكت !! باش نقطعلنا خبزتنا ؟ يسكت كيف المغبون و يكمل يخدم ! موش مرة .. موش إثنين !! كل ما يجبد الموضوع يقلو خوه أسكت !! باش تباصينا !!
عادا جاء مرة نهار ، قام هاكا المغبون على الصباح و حط في مخو حكاية : اليوم باش نرجع رزق بابا و نولي معلم على رزقي !!
قال إل خوه هيا معايا للقاضي متاع المدينة نحكيوا الحكاية بالك ينصفنا ، قلو خوه برة وحدك آنا ما نلعبش بخبزتي . تشجع هاكا المغبون و هز روحو ومشى للقاضي في الباب ما حبوش يدخلوه قعد يستنى نهار كامل قدام الباب و شيء . ! رجع من غدوة للخدمة يلقى خوه صب بيه الصبة و يلقى عمو راميلو دبشو إل برة و قلو ما عادش تعتبها الدار و الخدمة ! بات مسكين البرة جيعان ڨرسان .
من غدوه عاود مشى للقاضي ، كيف كيف طردوه مالباب قالوا القاضي عندو خدمة موش باش يقابل الحثالة الي كيفك ، قعد مسكين كل يوم يمشي و يطردوه يمشي ويطردوه ، قعد مسكين جيعان ياكل كان حنو عليه العباد و يكسي روحو مالي يلقاه مطيش .
حتى جاء نهار !!!
هو قدام الباب و القاضي خارج ، نڨز عليه مسكين المغبون و يبكي و يشكي و يبوسلو في يديه و يقلو أنصرني ينصرك ربي ، عاد دخلو القاضي و سمع حكايتو و سخف عليه ! كلم الحرس متاعو قلهم هذا تمشيو معاه للأرض تخرجو عمو و تقولولو راو متاع الناس للناس .
فرح مسكين هاكا المغبون ، مشى معاه الحرس متاع القاضي و خرجو عمو و هزوه للحبس ، جاو باش يهزوا خو المغبون قالهم لا هذا راو خويا و الرزق رزقو زادة آما ربي يهدي و كهو !
عاد رجع المغبون للأرض و حب يبدى يخدم فيها . جاء باش يحرثها ما لقاش عندو فلوس ، قال إل خوه إيجا نحطو فلوسي على فلوسك و نكريو ثور باهي و محراث من عند شهبدر الفلاحة ، و نحرثوها الأرض .
خزرلو خوه قلو لا !!! الفلوس الي عندي باش نخليها تحت الجراية و الأرض راهي ماعادش تنتج كيف قبل و بلاش عمي الي عندو خبرة ما نجمو نعملو شيء !! مسكين هاكا المغبون مشى حط الي فيقو الكل وزاد دار منا دار منا و تسلف تفتوفة جاب بيها الثور و المحراث ، قال إل خوه باهي هاني جبتهم بفلوسي إيجا عاوني على الأقل نحرثوها مع بعضنا ! قلو لا !!! الأرض ماهياش باش تدخللنا فلوس ، ماو عمي دخلتو للحبس و هو الوحيد الي يعرف يخدم الأرض !! مش مسكين كالعادة هاكا المغبون حرثها و تعب فيها وحدو ! مشى إل خوه قلوا ! عيش خويا هاو الأرض فكيتها إل عمي و الحرث و حرثتها ! آش قعد ؟؟ قعد كان باش نزرعوها !! هاي ولات ساهلة هيا عاوني حتي بالجهد ! قلو لا !!! ماني قتلك بلاش عمي ما عنا وين نوصلو !! خدمة الأرض راهي صعيبة ولازمها شكون يفهم ! ماك حطيت عمي في الحبس إتصرف وحدك !! كالعادة مشى مسكين هاكا المغبون دبر تفتوفة أخرى فلوس و شرى الزريعة و زرعها وحدو ! و مسكين قعد مسال مع الناس الكل ، جيعان في كرشو مهدود في بدنو مالخدمة !
جاء وقت الحصاد ، مسكين والف ما مشاش إل خوه تعدى ديراكت للأرض يحصد فيها وحدو ! تهد مسكين وبدنو كلو مدمم مالشمس و التعب !!!
عامتها جاء العام صابة ! لم برشه شعير و ڨرط !! حاصيلو !! فرحان مسكين مشى للڨايد متاع القمح باش يبيع محصولو و يخلص لعباد و يهنى أول مرة بفرنك من عرق جبينو من أولو إل آخرو من غير ما يجي شكون يفكهولو !! عاد قبل الحصول للڨايد و هو مروح للدار يلقى خوه يستنى فيه في الحوش !
قلو خويا الرزق ، راو رزقنا أحنا الزوز و الفلوس هاكي نقسموها بالنص !!
أيا قولولي !! يقسم معاه ولا لا ؟؟ عندو الحق الخو في الرزق هذا ولا لا ؟؟؟ جــــــــــــــــــــــــــــــاوبوني

الجرايد التونسيه

مقال كتبته منذ سنة 2009 و أعيد نشره :
=========
الجرايد التونسيه، هاكا اللفة متاع الاوراق إلي إلف فيهم عم صالح الكسكروتاجي الكسكروتات، لفة متاع اوراق إلي تفرشهم الوالده فوق الطاوله كيف نجيو باش نتعشاو، لفة الاوراق إلي كي ما تعرفش الدات متاع اليوم تنجم تشريهم باش تعرفو ...اللفه متاع الاوراق هاذم عندهم برشة أسامي ، كيف "الشروق" و "الصريح" و "الصباح" ... و انا شخصيا نموت على الجوده العاليه متاع اوراق جريدة الصباح ( يمسحو الطاوله مش نرمال)


نرجعو إل موضوعنا ... الاوراق هاذم حكايتهم حكايه ... قالك يا سيدي هاذوما السلطه الرابعة في تونس... إيييييه .... السلطة الرابعه مرة وحدة ... و قالك هاذم " صوت التونسي الحر"... يا بو قلب ... يعني النضال و الكفاح متاع عبد العزيز الثعالبي و علي باش حامبه و فرحات حشاد و غيرهم وغيرهم ... هذا الكلو باش يخرج التونسي حر و يتبع اخبار هيفاء وهبي و نانسي و يقرا كل نهارين "سيناريو نهاية العالم " إلي كل شويه يبداو يحكيو عليه هالجرايد و يقراو على "فضيحة سهريات ميكل إنرامو فيل بواتات" ... آه مالا كيفاش ياخي ساهله هيّه الحكايه ؟؟ ماو باش إيقولو عليك متثقف و تعرف كل شيء لازمك تكون "برانشي" و ما تنجم تكون هكّا كان ما تقرا الجرايد التونسيه !!! وبرّا عاد وقت يبدا فمه هزّان قفه .... يا بابا وخر إلتالي !!! يبداو عادا ... كلنا مع ... هزان القفه ... كلنا فداك يا ...قفه !!! حصيلو جو !! لا ويبداو عادا هاكا الخدّامه إلي يقولولهم صحافيين يِِتْفَنْنُّو في هزان القفه ... ماو هذاكا هو الفن الثامن في تونس ... التونسي الحر هو إلي ينجم يهز القفه من غير ما ما يقول ... آي... !!!!! هذا هو التونسي الحر إلي تحب تعملو الجرايد هاذي !!لكن وقت إجد الجد ... تلقاهوم هزتهم ريح السد ... البطاله ، الحرقه ، الفقر ، الرشوه ، الاكتاف ، غلاء المعيشه ، هالمشاكل هاذي الكل بالنسبه للجرائد التونسيه مسائل ثانوية ما تستاهلش اكثر من صفحه واحدة يلمّوهم فيها و ديما يمشي ... ياخي نرمال إنت ؟؟ تحبهم يعبِّيوْلك الجريده الكل بالهمْ و المشاكل كل يوم ؟؟ و ينساو ما يكتبوش "حظك اليوم" ولاّ صفقة إنتقال " حمادي لعور إل إتحاد برشلونه " !!!!و نرمال إنت يقعدو ما يكتبوش عروض الزواج ؟؟؟ و ما يحطّوش الإعلانات ؟؟؟ الجرايد هاذم قالك يا سيدي عامناول زادو في السوم متاعهم ... ولاّو بـ600 فرنك !!!يا لطيـــــف !!!! قالك ماعادش تساعد لحكايه ب500 !!قالك كيفاش آنا نحكيلك على الكوره الكل و إنّبْرُو على الحكام التوانسه و نحكيلك كيفاش فلان قتل فلان و كيفاش تونس ولات مثال يحتذى به و نحكيو و نحكيو و هذا الكل بـ 500 ؟؟!! ما تجيش الحكايه ... !!! باللاهي قولولي ... هالجرايد هاذي تستاهل إنو الواحد يقعد يحكي عليها هذا الكل ؟؟ شكون منكم نهار شرا جريده و لقا فيها حاجه تصلح ؟؟ إنت كيف تقرا جريده تونسية ما تحسش إنو كان هي بالحق تعبر على صوت التونسي راو التونسي اتفه كائن فالوجود ؟؟ استغفر الله العظيم والله نتخيل في الاجانب إلي يشروو الجرايد متاعنا قداش يقعدو يضحكو علينا ! !!!!

لا للحجب مهما كانت الأسباب

السلام عليكم يا جماعة ، بربي فمة نقطة نحب نعرج عليها إن شاء الله ما نتفهمش بالغالط ، بالنسبة للحكم القضائي الي صدر اليوم و القاضي بغلق المواقع الإباحية ، فمة برشة ناس إستحسنتو القرار هذا بحكم إنو يحفظ الأخلاق الحميدة إلخ .. و هذه حاجة معقولة .
لكن كان ننظرو للموضوع من زاوية أخرى ، قرار الحجب هذا هو الواجهة متاع قانون شرعنة ماكينة الصنصرة ، يعني لتفعيل قرار الحجب هذا ، عطينا الحق بوجود جهاز في الدولة يشرف على العملية هاذي، و الجهاز هذا ما فمة حتى قانون يحدد مسؤولياته فين تاقف ! يعني كيف اليوم سكرو المواقع الإباحية ، غدوة المنديات الجهادية ، بعد غدوة الصفحات و المدونات الي تنتقد في الحكومة و بالشوية بالشوية نرجعو للممارسات القديمة . و زيد على هذا بمباركة القرار القضائي هذا ، نزيدو نعطيو حق للحكومة باش تكون وصية علينا في أدق تفاصيل حياتنا ، حتى في حميميتنا الخاصة و هذا يتسمى توطية راس !
سامحوني بالله ، علاش نسكرو المواقع هاذي بينما أحنا ماناش ملزمين باش ندخلولهم ، باش تقلي على الصغار ؟ نقلك تنجم تكلم الفورنيسور تاعك و تعمل كونترول پارونتال على المواقع هاذي !
غير هذا ، إنك تخلي شكون يمارس وصاية عليك و على تصرفاتك يعتبر في حد ذاته إنبطاحية و تقزيم لذاتك و لعقلك هذا من طرفك إنت ! لكن من طرف الحكومة و كيف نقول الحكومة هنا نعني السلطة التشريعية و القضائية و التنفيذية لأنها الكلها في يد الحكومة !! وقت تعطي الحكومة لروحها الحق باش تمرس الوصاية هاذي و تتدخل في أدق تفاصيل الحياة الشخصية للمواطن بما فيها حميميته الخاصة ، هنا يولي مشكل لأنها كيما قال السبسي تولي تعتبر المواطنين رعية تسيرهم هي كيف ما تحب ، و المواطن التونسي بعد 14 جانفي ، ما يلزموش يتحرك قيد أنملة واحدة التالي في ما يخص مجال الحريات و يلزمو يحافض على مجال الحرية الي إفتكوا !
باهي باش تقولولي الحرية بالبورنو هي ؟ نقلك لا غلق المواقع هاذي حق يراد به باطل ! و كيما قلت مالأول هو فقط مجرد شماعة لشرعنة ماكينة الحجب !
الحر مسؤول في حريتو ! خوذ حريتك و كون مسؤول فيها ، ما تخلي حد يكون وصي عليك !

شعب تونس ما بعد 14 جانفي ، حتى و إن لم تنجح الثورة ، شعب واع و ثائر ، ما يقبلش وصاية من أحد و الدليل إنو قاعد يعيش في أزمة ثقة مع الأحزاب لأنو ماعاد قابل حتى واحد يكون وصي عليه !

الحيادية الإيجابية

الحيادية أمر لا يمكن إدراكه ، فالحياد تجرد كمل من الأفكار ، و هو ما أجمع كل المفكرين على إستحالته ، و حتى لو إقتربنا من الحياد دون تحقيقه ، فسنجد أنفسنا أمام مفترق طرق :
حياد سلبي أم حياد إيجابي ؟

الحياد السلبي هو الإكتفاء بنقل المعلومة و الأخبار دون التعمق في تحليلها ، و لست ملزما بنقل المعلومة فالكل بإمكانه الحصول عليها ، لأنها أصبحت متوفرة و سريعة الإنتشار .

الحياد الإيجابي هو الإنحياز التام لمصلحة الوطن و الشعب ، طبعا حسب رؤيتك الخاصة ، و إلتزام الحياد بين الأطراف التي تراها منحازة لهذه المصالح مهما إختلفت معها في سبل و وسائل تحقيق الأهداف ، المهم أن يكون هناك سقف واحد يجمع هذه الأطراف ، المصلحة العليا للوطن ، طبعا في حال تبني هذا الخط التحريري ، يبقى الخبر مقدسا و نقله يكون بحيادية تامة ، أما التحليل الذي يليه فكل يحلله حسب الزاوية التي يراه منها ، و طبعا يبقى هذا التحليل رأيا خاصا و إجتهادا فرديا !

شخصيا أتبنى الحياد و الموضوعية ، و لكن حتى لا أسقط في السلبية ، فأنا أفضل الحيادية التي لها موقف ، أي الحيادية الإيجابية

وجوه ذابلة

وجوه ذابلة، عينين طايحة، لحي هايجة ، شعورات مجعدة ، ظهورات مقوسة ، أكتاف مهدودة ، ريوس مالقاع ما تتهزش !
طريق واحد ، و الناس تمشي فيه ! فرد خطوة ، خطوة متهالكة متطايحة ، الساق تتهز بالسيف و كيف تطيح تهد الأرض ! صوت الخطوات ، قوي ، يهد جبال ، فرد إيقاع ، إيقاعو حزين و ذليل .
طريق واحد ، و الناس تمشي فيه ، يمشيو في سكات ، كلمة ما تتسمعش ، همسة لا ، توشويشة لا ! كان صوت هاكا الإيقاع الحزين ، إيقاع الإنكسار و الذل و المهانة !
طريق واحد ، و الناس تمشي فيه ! و ماشين فرد ثنية ، لا يميلو يسار و لا يميلو يمين ، فيهم شكون يعرج و فيهم شكون يحبو و فيهم شكون على كرشو يزحف ! اما هاكا الإيقاع ، الناس الكل محافظين عليه !
تخمرو بيه ، شدتهم النوبة متاعو ! ما ينجم حد يخرج على الريتم !
الكل فرد خطوة في فرد طريق إتبع في هاكا الإيقاع !
في ها الطريق على الأجناب ، فمة شجر!! آما أوراقها خرفت و شاحت و طاحت ، تحتها ضباع و كلاب مسعورة جيعانة ! تستنا في إلي باش يخرج على الطريق باش تنهش لحمو تشبع كروشها و جوعها !
فوقها طيور الموت و الجيفة ، واقفة تستنى في شكون باش يطيح في وسط الطريق باش تنقب جلدو و تقطعلو لحمو و تاكلو مصارنو و هو حي !!
ريحة الجيفة ، تتشم من بعيد ، ناس مخنوقة ، بالسيف ما تتنفس ، لكن !
ديما في نفس الإيقاع ! نفس الخطوة و ديما في نفس الثنية في نفس الطريق !
لا يميلو يسار و لا يميلو يمين !
ساعات !! واحد يهز راسو ! يحب يعرف ! آخرتها فين ؟ فين باش تهزو هالثنية ؟!! فين آخرتو هالطريق !
راسو يهز ! و يجيوه الضباع و الكلاب و طيور الموت ! تنهش لحمو و تقطعلو أطرافو و تشرب دمو و هو يصيح ! و ينادي ! يا ناس فيقوا ! يا ناس !! هزوا ريوسكم ! يا ناس راني خوكم ! راني منكم ! راني قاعد نموت ! عاونوني !!
و لا حياة لمن تنادي ، حد ما يتلفت ، الناس تكمل تمشي ، ما يضيع حد الإيقاع ! نفس الخطوة ، نفس الإيقاع ، نفس الثنية و نفس الطريق !
ونفس المصــــــــــــــــــــــــــــــــــــــــــــــــــــــــير

دار دجو المسكونة

الحكاية الكل بدات آخر عام 2009 ، وقتها آنا ناجح من الأولى للسنة الثانية ، باش نكري في تونس و فقت مخر ، قعدت نلوج على دار ، آنا و ڨروب متاع صحابي ، قلبنا الدنيا الديار اللي لقيناهم الكل حكك و أحنا 4 ما يكفيوناش ، لولاد حبو يكريو في باردو و آنا شديت صحيح حبيت نكري قريب للباساج خاطر وقتها صحبتي تسكن غادي قلت قريبة ، الحاصيلو رمضان كامل بعد شقان الفطر نهبطو آنا و لولاد بالكرهبة نلوجو ! عاد بعد شهر كامل نلوجو ، كلمنا الصمصارة و لوجنا في لابراس و شيء ديما واحلين يا دار غالية يا دار صغيرة و أحنا وقتها مخر برشة بدينا نلوجو ، الحاصل ! مرة جانا واحد قال عندي دار ، بين باب الخضراء و باب العسل ، في نهج بنزرت كان تعرفوه هيكا دار زرقة بني متاع فرانسا قديمة ، برة قلنا نشوفوها كيفاش ، أول ما دخلنا ساعة المفتاح تقسم في الكوبة ! قلنا يا فتاح يا رزاق يا عليم ! الراجل خلع الباب ، كسر شباك صغير في الباب و حل الدار وقت دخلنا ، الدار كلها غبرة و كانو رابطين فيها كلب و سبقتكم بالحديث الدار تضهر فيلا كاملة من برة آما وقت تدخللها تلقى بلاصة ميرو و نص على ميرتو و نص ، 3 بيبان بابنا على اليمين ، و باب مرى كارية الغادي على اليسار و باب مقابل يهز للسطح ، المرا هاذي مربية قرابة 25 قطوس و مغرومة بيهم شي عجب ، عاد الدار الي باش نسكنو فيها نلقاوها فيها كلب و كلها قطاطس القطاطس بدرجة كبيرة ، تسمع كان تمعويق و صوت عرك قطاطس ، و ما فمة حتى أنبوبة في الدار ، الحيوط مقشرين و الغبرة ماكلتها ، عاد لولاد ما عجبتهمش و زيد فيها كان زوز بيوت و صالة و المرا طالبة 350 دينار ! آما بلاصتها باهية وراء المحكمة العقارية و وزارة التربية آنا كبشت زيد قريبة لدار صاحبتي ، قلت كعبتي و كعبة ، هيا درا كيفاش غلطنا و قبلنا بيها ! روحنا ليلتها و رجعنا غدوة جبنا الدبش و الموبل ، و جبنا زادة شوية سيما بيضة و دهن ، و آنا في الصيف ساعات نخدم دهان ، عندي الصنعة و الولاد الي معايا شقانس ولاد كرنيش في بنزرت ، عاد هاكا لدار قرقشتها و دهنتها و ليقت اللايص الطايحة فيها في حيوطها في نهار ، و سيقناها و إستقرينا . أيا قلنا نبداوها بالبركة ، حطينة سورة البقرة و الدار و لا تلق ، و نهارتها في الليل بدا الجو أيا ليلتها رقدنا في سلام ، هانين و فرحانين ، قمنا الصباح نلقاو الدار كلها غبرة و فمة آثار متاع ساقين بالطبعة ، و الدار تقول هبت عاصفة رملية و خاصة الصالة ، و التوالاتا حاشاكم فيها حاجة تقول شكون دخل و ما نضفهاش ، عملنا مشكل في بعضنا ، بدينا نتنابزو راو والله ما يجي هكة و راو الي دخل مسخ الدار من أول نهار هكة ما يجيش و التوالات ما يجيش ما نجبدوش الشاس ، هاكا اللاوي حاصيلو ، قلن ما صار شيء و لازم نتلهاو بالنظافة متاع الدار ، آما قعدنا متعجبين شكون عملها خاطر أحنا الكل نظاف و نعرفو بعضنا بالڨدا و زيد الناس الكل قالت خاطيني خاطيني ، برة على روحك ، تعدات الحكاية ما ركزناش معاها ، آما حاجة لاحظناها ، الدار وساخة يعني إنت تمسح و تكنس من هنا و الدار ترجع وقدرة قادر مسخة بعد نص ساعة ! حاجة أخرى زادة لاحظناها ، نحطو حاجة في بلاصة ما نلقاهاش و لا نلقاوها في بلاصة أخرى ، و الشلايك و الصبابط و الكلاصدات ، كل مرة تضيعلنا فردة و ما نلقاوهاش و الصباح و أحنا خارجين نلقاوها البرة في الكياس ! بدينا ندورو على بعضنا ، كل مرة نعملو قعدة و نقولو فمة شكون فينا مريض و لا شنوة و برجولية معادش كرية هاذي و هاكا الحديث ، موش كان الكلاسدات كانت تترمى البرة ، الأومو و الجافال و الڨريزي ، ديما نلقاوهم مفرتين و مبزعين عالقاع ، يعني أي حاجة عندها علاقة بالنظافة ديما تصير فيها مشكل أيا ، أحنا شباب أكبر واحد فينا وقتها عمرو 23 سنة ، يعني موش باش تركبلنا بالساهل حكاية دار مسكونة و هاكا الكلام ، الفارغ ، يعني ديما نقولو واحد منا قاعد يتشمت و وصلنا شكينا قلنا المرا مولات الدار عندها مفاتح و مريضة ، و قلنا حتى ممكن القطاطس ! آه فتكم بالكلام ، القطاطس ديما في الدار ، برشة و كيف نقول برشة يعني فوق العشرين ديما يدخلو ما نعرفوش منين ! أيا هذا من جانب فمة جانب آخر عندنا صحابنا كانو يجيونا ، يعديو ليلة ولا زوز كانو ديما كيف يفيقو الصباح يصبحو مدڨدڨين يعني تقول ماكلين طريحة و لا شنوة و يقولنا ، شدنا بو تليس و تخنقنا في الليل و كانو زادة ديما يقوللنا فمخ حكاية غريبة في داركم ، الباب في الليل تحل وحدو و الوبة تحركت ، يعني موش ريح ، الكوبة تتحرك يتحل الباب و يتسكر وحدو ! و أحنا ديما نقولو صليو على النبي ، تي إنتوما تفدلكو ، المشكل موش واحد و لا زوز ! باهي ، أول حكاية غريبة صارت ، وقتها مرة واحد منا يشعل في الشوفو باش يدوش ، و ينفخ عليه نار ! المشكل الحكاية هذه تصير اما يحكيلنا قال النار ، موش عادية ، في شكل دوامة و ملات الكوجينة الكل ، يعني موش نفخة عادية ، و قال إلي هو هرب يجري و النار خارجة مالكوجينة و وقفت في الكولوار ، يعني حسب حديثو النار عبات الكوجينة و تتبع فيه ! بيان سير قلنالو يزي بلا أفلام ! بالطبيعة أحنا شباب كلام كيف هذا موش باش يدخل مخاخنا و زيد هو وحدو شاف هالحكاية ، و هي ما تتصدقش ، دونك كذبناه آما كل واحد بينو و بين روحو قعدت راكبتلو في مخو ، خاطر كل واحد فينا شاف حاجة و ما حبش يقول لا يولي تكركيرة حاصيلو ، موش باش نطول كل مرة تصير حكاية ، هاو مرة ضو قص هاو مرة ماء و كل مرة حاجة ! بون توة باش نحكي حكاية ، ما تاخذوش عليا فكرة غالطة آما صغر ماكم تعرفو . صاحبتي كانت تجي حذايا للدار ، هذا تفصيل موش باش نتوسع فيه ! آما المشكل إنها كل ما تجي تضيعلها فردة متاع بلوطة ! باهي باش نكونو واضحين صاحبتي عندها حكاية حكاتهالي قبل و آنا ما عطيتهاش أهمية باهي صاحبتي هذه أول ما تعرفت عليها حكاتلي إلي دارهم مسكونة و مسكونة بناس طيبة ، كل ليلة تحلم بمرا تلبس روبة بيضة ، تجي تحكيلها حديث لوعة رد بالك من فلان راو بيه و رد بالك من فلتان راو ناوي على درا شنوة و قتلي راو أمي زادة تحلم بنفس المرا ! كل ليلة و نفس الكلام تقولهولها ! آنا برجولية وقتها ، خذيتها على أساس ريق بنات و ماكم تعرفوه شكون ينجموا ! حاصيلو ، صاحبتي كانت كل ما تجيني و تدخل معايا للدار يبدى النفس يتسكر عليها و تقلي نحب نخرج و جها كان يصفار و يمشي و يجي ألوان حاصيلو جاتني مرة ، قتلي ما تتغشش راو الدار ما عادش نحب ندخللها ! آنا قلت راو باز صارتلها مشكل ، لوغة أمها سمعت و لا شكون شافها و قال قلتلها على راحتك ! آما المشكل قتلي ، وإنت برة إكري مع ڨدور و سيب عليك مالأولاد ، هاك موش ماخو راحتك ! آنا حسيتها مخبية حاجة اما ما عطيتهاش أهمية الحكاية و تلفت الجرة ! ايا عاد في ليلة مالليالي ! صارت حكاية غريبة ، و آنا البطل فيها شدو في مخاخكم حكاية صاحبتي ، قلتلكم في ليلة صارت حكاية ، عندي صاحبي ! مقرعش ديما عاملينو تكركيرة ، في النوم يحكي و يخلوض ! عاد الليلة هاكي من غدوة عندي إكزامان ، و ليلتها سهرت برشة ، قلت تو نقوم الصباح نقرى ! نتفكرها كيف توة ! مع الساعتين متاع الصباح رقدت ! هو راقد على جراية بجبنب فرشي في القاع ! جاي على نهارين وقتها ! آنا تلفتت للحيط و بديت باش نغفى ! الباب تحرك بالشوية و تحل و الكوبة عملت حس ! آنا موش نشوف في شيء خاطر عاطي بظهري ! و سمعت حس ساقين عبد ! آنا قلت راو صاحبي يلوج على شارجور البيسي عاد ما تلفتتش و لا حاجة ! آما المشكل صاحبي الي راقد لوطة بدى يلهث ! آنا برجولية نعفو ديما يخلوض في النوم ، قلت آنا توة باش نرقد ! كان نقوم تو تتكعبرلي في الإكزامان ! كملت رقدت و نذكر الحكاية هاذ صارت بين 2 و 3 متاع صباح ! قمت الخمسة ! ساعتين نوم كهو باش نقرى ، نلقى سي صاحبي هذا فايق يرحي في الدخان قتلو صباح الخير ما جاوبنيش و دخل بعضو ! قلت هالصباح المبروك صبح يهديك ، مشى داخ بعضو للبيت الأخرى . حاصيلو حكاية 6 و نص قامو لولاد ! جبدنا الكل و آنا معاهم و قالنا : لولاد الدار مسكونة !! لازم تنقلو !!! حاصيلو ، في آش فمة آش فمة ! قالنا ، مع الساعتين متاع الصباح آنا بديت باش نرقد ! و آنا هكاك ! عكشت و ما عادش نجم نتحرك ! تقول بو تليس ! آما المشكل تشليت موش مخنوق و لا متضايق ! جيست ما عادش نجم نتحرك ! قال و آنا هكاك ! نرا في الباب تحل و نرا في جمال ( إلي هو آنا ) داخل مالباب ! المشكل آنا راقد وراه !!! يعنو هو بيني آنا و الباب ! قال ! جاني و يڨحرلي و حط يدو على راسي و بدا يقرى عليا في قرآن و قال حسيت بدني سخن تقول نار ! قال كمل و ضحك و خرج قال وقتها نجمت نتحرك تلفت ورايا نلقى جمال راقد و عاطيني بظهرو في فرشو ! حاصيلو ما نحكيلكمش ! عملناه ضحكة مسكين آما كلنا نكذبو على رواحنا ، خاطر آنا واحد مالناس ركبتلي ! شبيك يا ولدي حكاية فيها آنا مرة وحدة ! حاصيلو ! تعدات هاك الفازة ! و آنا قعدت مهلوس ! مالليلة هاكي ! بدات حكايات غريبة تصير في الدار ! أول حاجة ريحة اللطف تقول حاشاكم ڨمة و لا حاجة في الدار ! ولينا نسمعو في أصوات ، كيف الي نسمعوهم في الحمام ، صدى هكة متاع تڨربيع و حاجة طاحت ! ولات الشبابك نسكروهم و لاو يتحلو عيناني تدخل ريح قوية و البرة ما فماش ريح و لا حاجة طقس لاباس ! و الماعون يتكسر وحدو كل صباح نقومو نلقاو حاجة طايحة ! أيا وقتها ماعادش فيها ! فهمنا كل شيء ! آما قلنا تي إيه قلو جن قلو مسكونة هانا ڨاعدينو هاو مونسينا أيا جات الصلاعة روحنا و رجعت آنا أول واحد ، متوحش صاحبتي ، آنا وحدي في الدار و الشي زاد عاد ! ساعة آنا روحت و حاجة غريبة عرضتني ! ما عاد فمة حتى قطوس في الدار و في الفيراندا ! حتى قطوس ! إلا قطوس أكحل أقسم بالله قد كلب متوسط ! يجي كل شيء كان قطوس ! آنا جيت داخل عملتو بش بش جاني يجري دحنس على ساقيا و بعد كش عليا و عمل هاكا الصوت متاع القطاطس كيف يتعارك و ڨدميني من صبعي ! بالرغم من إنو كان يتدحنس عادي ! دخل للدار ؛ 15 يوم فارغة ،نلقاها داخلة بعضها ، إشي موبل طايح ! إشي ماعون مكسر إشي وسخ ... حاصيلو كيف نهار دخلنالها ! تفجعت الحق ، خرجت نجري ، مشيت لمرى الي ساكنة بجنبنا ، قلتلها شنوة هذا ! الدار تسرقت و لا شنوة ! جات المرا ، و دخلت و قاتلي والله ما نعرف ولدي ! اما الي بهتني نها ما تعجبتش ! و إستغربتش تقول حكاية عادية ! كلمت الأولاد جاو نهارتها ! قلتلهم إجاو تفقدو دبشكم ظاهرلي تسرقنا ! أيا جاو ، ما لقينا شيء ناقص هوما قالو راو ممكن مفرخ درا كيفاش دخلو للدار و فسدوا و انا برجولية ما تعداش الحكاية ! الأولاد مشاو للمرى مولات الدار ! قالولها مادام الدار برجولية موش عادية ! و زيد 350 برشة ! قعدو يتناقشو معاها إنها تنقص في السوم ، عاد هوما يحبوها تنقص 40 و هي قالت ما تنقص كان عشرين ! شدو هالأسوام هادي في مخاخكم ! مشيت لصاحبتي ! قابلتها ! أول سؤال سئلتهولي بعد سافا ، قتلي بربي باش نسئلك كيفاش سكلها المرا مولات الدار ؟ آنا جيت باش نوصفها و هي وصفتهالي !!! والله تقول تعرفها قلتها والله هاكي هاكي هية ياخي منين تعرفها ! وجها صفار و سكتت و قعدت نهار كامل ساكتة ! حتى لين تعاركت معاها قلتلها هاذ مقابلة تقابلني بيها بعد 15 يوم ! أيا روحت نهارتها للدار ، و نهارتها شفت حاجة عمري ما ننساها ! حاصيلو سهرنا عاديو بعد رقدو الأولاد ، و آنا سهرت على فيلم ! و انا هكاك حسيت حاجة تحركت بزربة في البيت ! نحيت البي سي و بديت نسمل ! نهز عيني وين صاحبي راقد مقابلني ! نلقى حاجة كحلة فوقو و تتحرك ! قعدت نستعوذ و بسمل و نقرى في القرآن و آنا خايف باش نموت آما صدقوني ما نجمت نتحرك زدت ثبتت ، نشوف في راجل كامل ! متربع فوق صاحبي ، لحيتو طويلة و هو يعمل طولو نص ميترو و لا 75 صم ! متربع و لابس لبسة كيف متاع الشيعة ، كوفية كحلة و قميص و لا آش يسميوه أكحل و قاعد يخزرلي و يڨحر ! و عينيه درا كيفاش ! كبار أكبر مالعادي آما ماو ظلام الدنية ما ثبتش برسة ! حاصيلو قعدت نقرى في القرآن و نبسمل حكاية 30 ثانية و هكاك إختفى تدريجيا وحدو ! حاصيلو قعدت مصدوم ساعتين كاملين في بلاصتي ! و بعد قمت و آنا بكلي نرعش ! قمت نجري حليت الباب و خرجت نجري ! ! عديت ليلة كاملة في محطة باب الخضراء متاع الميترو ! و آنا في شورط و خلعة ! الصباح حكاية 6 هكاك ، مشيت للقهوة في الحومة ، السارفور يعرفني قتلو بربي التاليفون لحظة قتلو حالة مستعجلة ، عاد مدلي التاليفون كلمت صاحبي الداخل قتلو أخرجلي أكيد خرجلي صاحبي حكيتلو آش فمة ، ركبهالي إلي آنا نتخيل ! دخلت معاه و آنا نسمل و نستعوذ مالشيطان ! و نرعش بكلي ! حاصيلو الله يهديه ركبهالي إلي آنا نتخيل ! و قيم الأولاد و عملوني تكركيرة ! أيا روحت للدار ، أمي معلمة ، عندها هاكا المعلقات متاع التربية الإسلامية فيهم قرآنو دعاء و هاكا الفازات ! هزيت منهم قرابة 50 ورقة و علقت في الدار الكل ، وخاصة البيت الي انا و صاحبي فيها ! و اللية هاكي حطيت البيسي وقت باش نرقد ! حطيت القرآن في الميديا ، القرآن كامل ! من غدوة نقوم على الصباح ! نلقى القرآن الكل في القاع و الأدعية وكل شيء و البيسي مسكر ! و الشارجور منحي ، أور هو ما ىكدم كان بالشارجور ! سألت الأولاد قالولي موش أحنا وقتها هوما بداو يصدقو إلي فمة حكاية غريبة ! فمة مشكلة ! الآيات الكل و القرآن اكل طاح إلا معلقة وحدة : اللهم إني أعوذ بك من الخبث و الخبائث ... كان هاكي قعدت ! هالدعاء هذا يتقال وقت وآحد يدخل لتواليت و لا حاجة منجوسة ! هنا باش نرجع لحكاية صاحبتي مرة صاحبي جات حذاه صاحبتو للدار باش تبات ، ماني قلتلكم كنا ليبراليين على الأخر ! و صاحبي هذا آنا وياه فرد بيت ! ديما نوصيه نقلو ما تجيب صاحبتك باش تبات كان كيف نبدى آنا موش هنا راني ما نبات كان في فرشي ! أيا نهارتها ، البيت لخرى فارغة ، مشيت لغادي ! و هو وياها في بيت وحدهم ! تعدات ليلة كالم وقتها ! الصباح تحكيلنا ! قالتلنا ، في الليل قامت مشات للتوالات ( و هاني جاي لحكاية التوالات حاشاكم ) قالت و هي متعدية شافت قطوس أكحل كبير واقف في الشباك ! و هي خارجة راجعة للبيت ! القطوس ولا في وسط لدار و جايها يجري و يصيح ! هربت للبيت و سكرت الباب مشات تقيم في صاحبها ، هي تضرب فيه بالكف و هو ما قامش ، جاتني آنا في البيت ، تصيح و تبكي و تفيق فييا ما قمتش ! حاصيلو ! عداتها ليلة كاملة بكى حتى للـ6 و نص ، باش قمنا أحنا حكاتلنا ! فتكم بحاجة ! القطوس الأكحل هذا إلي ملي جاء هو ماعاد فمة حتى قطوس ! المرى قالت موش تابعني و قالت إلي قطاطسها الكل هربوا ! و زيد نسكروش الدار الكل كل نقبة في الدار ! رسمي في الليل نقومو نلقاو القطوس الداخل ! منين دخل الله أعلم و زيد فوق هذا ، بربي القطوس وقت يجي لدار وين يمشي تي ماو للكوجينة و لا لا ؟ لا القطوس هذا رسمي ندخلو نلقاوه يحفر في الفايونس متاع الدوش ! يحفر من غير ستوب و كيف نقولولو كس ! يغور علينا ! قطوس تقول كلب و راسو صحيح ! و ديما درا كيفاش يدخل ! و يحفر ! لين نضربوه بمصلحة باش يهرب ! أيا منهم نهار ، خوكم كبشت في صاحبتي باش تروح معايا ، باش نلعبو طرح رامي هههه ، عاد بالسيف روحت معايا ! آما المرة هاذي هي دخلت و وجها صفار و خرجت تجري و تصيح لبرة ! يا بنتي شبيك ! في طول ! في عرضك ناس تتفرج ! قتلي الدار هذه اليوم تنقل منها ! اليوم تخرج منها ! مخي وقف وصلتها لدارهم ! و روحت خايف برجولية ! آنا دخلت شعلت الضو و الضو قص ! آما الي هبلني حاجة ! مشيت نجري للتاليفون ! نلقاه قاعد يشرجي ! تعني ضو ما يمشيش ! و التاليفون يشرجي ! قلت باز ماس ! آما سامحوني في الدار الكل ؟ إي شبيه البريز يخدم ! مشيت ضويت بالبورطابل و جبت فايوزة حاطها حذا راسي ! الفيوزة ما تمشيش و البورطابل يشرجي ! يعني أي سورس متاع ضو لا ! ليلتها بايت انا و صاحبي و واحد ضيف كهو في الدار ! و هو جايب صاحبتو باش تبات ! أيا قتلو برجولية ! ما عادش فيها راو هاذي ! كان الليلة نشوف القطوس لكحل في الدار نهبل ! لا علينا ! سهرنا حاطين البيسي و الكلنا في بيت و حدة ، زوز ولا د صاحبة صاحبي الكل بايتين في بيت وحدة ! ايا الحاجة الي مڨمرينها في الدار كونو كيف يبداو الأنتريبتور لوطة راو الضو يخدم و كيف يبدى الأنتيربتور الفوق راو طافي ! مشيت قبل ما نشدو بلاصتنا ! طفيت الضو الكل و البيت الي أحنا فيها م نعملش عليها خاط فيها ماس ! طفيتها و خليت جيست ضو الكوجينة يشعل ! هكاك باش كان رجع ! نفيق بيه ! أيا عاد ركزولي على التوالات الضو متاعها طفيتو بيدي ! نتفكرها و بابها الي هو مقابل باب بيتنا ! سكرتو بيدي خاطر بيناتنا راكبلي فيلم منها الحكاية ! و الباب هذا ما يتحل إلا ما تعطيه ضربة بكتفك ! يعني كاسح ! أيا ركشنا في ابيت نحكيو و درا شنوة ! حبيت خوك نتكيف سيڨارو خرجت للكلوار و حليت الباب ! و شعلت ! آنا ما إنتبهتش آما نطقتلي الطفلة قاتلي : جمال موش طفيتو الضو و سكرت الباب متاع التوالات ! نتلفت ! يا لطيف نلقى البيبان الكل محلولين بما فيهم البب البراني و الشبابك كيف كيف ! و الضو الكل يشعل متاع البيوت الكل ! الكلنا لخلخنا ! و وجوهنا صفارت و تخرتلنا صاحبي غمزني باش ما نشلقش قدام الطفلة لا تموت مالرعب ! قلتلها لا لا ماني حليتو ! حاصيلو درت آنا و صاحبي ! درنا مالخوف نطفيو في الضو الكل ! و نسكرو في البيبان ! سكرناهم الكل كان حاجة برك ! باب التوالات ما نجمتش نقربلو خفت ! طفيت الضو ! و هربت نجري للبيت ! حاصيلو في وسط البيت ! قعدنا الكل ساكتين كان الطفلة تحكي خاطرها موش فايقة بشيء و أحنا الثلاثة الخوف قاتلنا موش فاهمين شيء ! خوكم شديت كتاب مصحف و نقرى و نعاود ! أيا أحنا هكاك ! و يتحل الباب بقوة ! تقول ريح ! آما المرة هاذي غريبة صارت زادت أكدتلنا كل شيء ! البيبان الكل مسكرة أوكي ! اما الضو يشعل فيهم الكل ! و باب التوالات ! مسكر ! إلي آنا ما سكرتوش و الله ! و زيد ما يتحل و يتسكر كان بكتف ! أيا وقتها سايي لا عاد فيها تفدليك و لا حديث ليلة كاملة الكلنا في فرش واحد قاعدين متغطين و حاطين القرآن مالبي سي الي بعد قص شارج و ليلة كاملة هكاك لين جاء الصباح ! كلمة لربي لا توة تتفكروها حكاية صاحبتي ؟ من غدوة مشيت ملخلخ دايخ بالنوم مفوع و كلي أصفر تقول مريض بالبو صفير قابلتها ،و هي زادة جات هكاك كيفي ! بعد صباح الخير ! هي تقلي عندي ما نحكيلك و آنا نقلها عندي ما نحكيلك ! في أحكي في أحكي إنت ! بدات هي تحكي ! قاتلي البارح حلمت حلمة غريبة ، حلمت إلي إنت في دارك ، و الدار هي في المنام حستها داري آما هي ما تشبهش لداري جملة ! قتلي دارك في شكل توالات كبيـــــــــــــــــرة ! مسخكة و فيها ريحة غريبة ! و قاتلي ! مالفة تجيني هاكا المرا في المنام المرة هاذي جاوها ! خيالات كحل ! يصيحو و يعيطو و قالبين الدنيا و يحكيو بلوغة مش مفهومة فيها برسة حس ! و قتلي بعد قالولها بلوغتنا : كان ما يخرجوج الجمعة هاذي مالدار باش نبداو بيه هو ( عليا آنا ) و قتلي يطبطبو في البيبان و يحلوو يسكرو في الضو و شفتكم إنتوما خايفين و تصيحو ! قتلي يربربو هوما و يحكيو في كلام موش مفهوم آما فيه برشة كفر حاصيلو وخرت لتالي و تفجعت ! قلتها يا فلانة ! هذا هو الي صار البارح ! و ليلة كاملة ساهرين ! سكتت و سكت و وجوهنا تقول كعبة قارص ! قتلي تتفكر وقت سألتك على المرا ؟ قاتلي لمت إلي صحابك فلان و فلان و فلان ! ( إلي بالحق هوما الي مشاو ) يحكيو مع مرا كيف وصفتهالك ، هي تقلهم والله نكريلكم كان ب 20 و هوما يقولو لا والله 40 ! قاتلي قلت ما تجيش الفازة دار ب 20 و 40 ! قلتها يا فلانة الي سميتهم بالحق مشاو مرة ! اما هوما يحبو ينقصو 40 و هي شادة صحيح في 20 ! صدقوني وجوهنا لا يوريها لمؤمن ! قعدنا ساكتين قعدة كاملة ! روحت آنا دخلت نرڨل للدار لميت ساك ، و مشيت لدار واحد صاحبي مشيت عديت عندو بقية الشهر ! و ما رجعت للدار كان مرة برك ! مرة حاشاكم ، تغصورت لازمني ندخل لتوالات و آنا في الفاك ! و زيد وقتها ماعادش عيني باش نقرى ! و مازالت عنا محاضرة و لا زوز ! أيا جاتني صعيبة باش نقول لصاحبي هات مفتاحك ! قلت برة خليفتي على ربي ! قصدت ربي للدار ! نلقى القطاطس رجعو ! آما فيهم برشة كحل ! سملت و دخلت و آنا ماني نقول في شيء غير : اللهم إني أعوذ بك من الخبث و الخبائث ! دخلت للتوالات آنا سكرت الباب و الدنيا تقلبت ! ماعون طايح و قطاطس تتعارك بجنب الباب تاع توالات و دينيا تقلبت أيا خفيت روحي و خرجت و طرت من هاكا الدار أيا كلمت أصحابي ، قلتهم هيا نلوجو على دار أخرى و لا راني خارج مالكرا ! عكسوني كملو شهر بعدي صار فيهم ما صار ! واحد قام مرة عينو زرقة و مرة واحد زلق كسر يدو و لاخر مرة درا شنوة شاف الحاصل حكاولو قلتلهم تستاهلو خاطر ما خرجتوش ! آنا بعدها عملت نافات بنزرت تونس ، آما قبلها قعدت نلوج على دار ! ما لقيتش ! صاحبتي قتلي حلمت بيا قاتلي جاتها المرا متاع العادة قالتلها جمال موش باش يرتاح ! كان في دار وحدة إسمها حبيبة ! أيا ما نطولش عليكم وقتها كل شيء وليت نصدقو ! ما سهلش ربي في دار ! وليت نعمل نافات ! و مع الوقت 3 أشهرة القدام تقصت مع صاحبتي ! ومع الوقت بديت ننسى في التفاصيل حتى لين وليت مع الوقت نقول بالك إنت تخرم يا جمال ! بالك إنت تهز و تنفض ! بالك إنت كبرتها ! حاصيلو في الصيف و انا مرة قاعد نتذكر ! قاعد نضحك على روحي كيف ما إنتوما قاعدين تضحكو على الحكاية ! خطفت في مخي حكاية ! دار حبيبة ! پفف تي هاي فلانة طلعت تهز و تنفض عليا تي هاني عملت نافات و ما دار حبيبة و لا وذني ! و آنا هكاك و مخي يتصنطر وحدو ! دارنا ! الدار الو ساكنين فيها توة ! مقيدة بإسم خالتي ! و إسمها حبيبة ! و هذه كآنت قصتي مع الدار المسكونة ، إلي يحب يصدق يصدق و إلي مكذبني ما نلوموش ! عندو الحق ! فمة شوية تفاصيل شخصية خبيتهم و فمة تفاصيل ما حكيتهمش خاطر ما نجمش نوصفهم وصف دقيق كان باش نحكيهم تو تقولو راو يهز و ينفض ! الدار بين باب عسل و باب الخضراء في نهج بنزرت ، في النهج الي يهز لوزارة التعليم ( ضاهرلي ) و المحكمة العقارية ! الدار البيضة إلي فيها فار فورجي أزرق ! فيها شجرتين متاع سفرجل ! و السلام دجو ! و أقسم بالله العلي العظيم كل كلمة حكيتها صحيحة !

كيف تصبح خوانجي إفتراضي في 12 خطوة

كيف تصبح خوانجي إفتراضي في 12 خطوة ( راني نحكي على الخوانجية الإفتراضيين موش الصحاح ):

ــــ أدخل للمنديات الجهادية و تعلم مصطلحات خوانجية و كلام كبير موش لازم حتى تكون فاهمو

ــــ بدل تصويرة متاع بروفيلك لراية التوحيد

ـــــ فسخ البنات الكل من بروفيلك و إكتب في المعلومات العامة " لا أقبل دعوات النساء الرجاء التفهم "

ــــ بارتاجي في پروفيلك كوكتال محمد حسان و شوية أبو إسحاق الحويني و شوية أناشيد جهادية

ـــــ أدخل في الباجات و كل ما تلقى كلمة علماني و لا لبرالي و لا قومي ، إستغفر الله و قول : كفّـــــــار !!

ـــــ كل ما تلقى شكون مبارتاجي غناء و لا موسيقى إكتب : المعازف حرام ربي يهديك !! و موش مشكل كان إنت بارتاجيت مرة و لا زوز غناء پسايكو آم

ـــــ كل ما تلقى فيدو فيه حكاية غريبة ، خليقة و لا صنيعة ما يهمش إل مفيد غريبة ، يبداش حتى كرسي كيف تنزل على قفلة يولي طاولة ، إكتب تعليق : سبحان الله إن الله في خلقه شؤون !!


ـــــ كل ما تلقى واحد مبارتاجي النشيد الوطني ولا علم تونس قول : الحدود زائفة عملها المستعمر !!

ـــــ كل ما يجي يناقشك واحد و يكون معارضك في الرأي قلوا : " أتكفر بما أنزل الله ؟ " حتى لو كان ماهوش يحكي على الدين !

ـــــ كل ما تلقى نقاش حتى كان موش فاهموا على شنوة موضوعه ، جيب آيات قرآنية و أحاديث حتى كان ما عندهم حتى علاقة بالموضوع و قول : من لم يتبع ما أنزل الله و ما أتى به رسوله فهو خارج عن الملة


ــــــ كل ما تلقى واحد ينتقد في راشد الغنوشي و لا في النهضة حتى كان كلامه منطقي و صحيح و حتى كان حكى بإحترام قلوا : يا كلب ، النهضة و راشد الغنوشي أشرف منك بألف مرة يا ملحد !!

ــــــ باش ما تقلقش و تفد أعمل كونت آخر عيش بيه حياتك ، ركح بيه بنات ، بارتاجي منو غناء فديوات اللول و شارك بيه الباجات إلي يلعبوا في كرسي الإعتراف و الأكسيون فيريتي

و أدامك الله ذخرا للإسلام و للأمة جمعاء

إلى الكلاب

إلى الكلاب ، قصة ملي آنا صغير حكاتهالي أمي ، بون موش كيف هكة بالضبط آما الرسالة وحدة !

يُقال إن كلباً سرق قطعة من اللحم وجرى مسرعاً حتى لا يلحق به أحد. وصل الكلب إلى نهر وحاول عبور النهر ليذهب إلى مسكنه ويستمتع بأكل قطعة اللحم. نظر الكلب إلى النهر فوجد صورته في الماء، فحسب أن هناك كلبا آخر يحمل قطعة لحم أخرى. قرر الكلب أن يأخذ قطعة اللحم التي في الماء ففتح فمه وإذا بقطعة اللحم تقع من فمه في مجرى النهر. حاول الكلب الطماع استرجاع قطعة اللحم من المجرى ولكنه لم يستطع ذلك.

لماذا أعارض النهضة

أعارض النهضة ولكن ليس لأنها :
ـ حزب ذا مرجعية دينية لأنه كما يقول البعض أن الإسلام ليس حكرا على النهضة أقول أن الشيوعية ليست حكرا على حزب العمال و القومية ليست حكرا على البعثيين وقس على ذلك .
ـ حزب رجعي كما يدعي البعض لأنني لم أرى أي دليل على رجعية الحركة و فكرها فهي أقرب للحداثة ممن يدعون الحداثة و تقدمية أكثر ممن ينسب لنفسه التقدمية .
ـ تحمل فكرا مستوردا خارجا عن ثقافتنا لأننا إن إعتبرنا الإسلام خارجا عن ثقافتنا فلنعلم حينها أننا نجهلها .
ـ حزب إنتهازي راكب على الثورة كما يدعي البعض لأن الثورة لم تقم يوم 17 ديسمبر بل هي ثمرة سنوات من النضال ساهمت فيه حركة الإتجاه الإسلامي و وريثتها النهضة مساهمة كبيرة.
ـ حزب إلتفافي كما يقول البعض ، لأن مواقف النهضة بعد الثورة و إن كنت أعيب عليها إحتشامها و ضعفها في بعض الأحيان كانت قوية في البعض الآخر و سايرت إرادة الشعب في مجملها .
ـ حزب يسعى للوصول للسلطة لأن الأحزاب تنشأ لتسعى للسلطة و هذه هي السياسة !
ــــــــــــــــــــــــــــــــــــــــــــــــــــــــــــــ
ـــــــــــــــــــــــــــ
إذن لماذا أعارض النهضة ؟
ـ أعارض النهضة لأن بعض قياداتها التاريخية لم يستوعبوا بعد الخطاب الجديد للحركة و لم يتأقلموا معه و مازالوا يحملون نفس الفكر القديم المهترئ .
ـ أعارض النهضة لأن بعض قيادتها التاريخية و لأن فهمهم للطرح الجديد للحركة مغلوط ، يمارسون شتى أنواع النفاق السياسي و إزدواجية الخطاب فقط للمزج بين طرحهم القديم المتآكل و المهترئ و الطرح الجديد للقيادات الشابة في الحركة دون أن يكون الطرحان متمازجين .
ـ أعارض النهضة لأن بعض المتعاطفين معها و المنخرطين فيها شأنهم شأن قيادتها القديمة يؤمنون بطرح ولى عليه الدهر و مضى و لا يفقهون من فكرها و طرحها الجديد شيئا و يحاولون أن يعطلوا ـ بقصد أو بغير قصد ـ حركة الإنتقال التطور الفكري الذي تشهده الحركة .
ـ أعارض النهضة لأن بعض المتعاطفين معها و المنخرطين فيها لم ينضموا للحركة إيمانا منهم بطرحها الجديد بل فقط لمرجعيتها الدينية الأمر الذي يميزها الآن بحكم أنها الحزب الوحيد المرخص له الذي يتبنى هذه المرجعية و هو أمر قد يزول في المستقبل بالترخيص لأحزاب
جديدة تتبنى نفس المرجعية ، أي أنه ظرف زائل!

إلى ناشطي الأنترنات قبل 14 جانفي

إلى ناشطي الأنترنات قبل 14 جانفي ! إلى من صنعوا الثورة ! و فرشولها البساط الأحمر الي مشات عليه !
______________________________
شكون يتفكر الفايسبوك ( السياسي ) في تونس قبل الثورة ؟ تتفكروا قداش كان محلاه
؟ كنا قبل في الخطر لأننا نتكلمو على الحق ! وقتها كان للتدوين طعم و للنضال الإفتراضي طعم ! وقتها كنا وقت نحكيو في السياسة و لا الشأن العام ، عندنا بضع آلاف في الباج ، فمة شكون كانت عندو الجرأة إنو يعلق و يحكي بشجاعة ، و فمة شكون كان يتبع تتبيع من غير ما يتدخل و فمة شكون كان ( التجمعيين) يجي يسب و يهددنا ! لكن بالحق وقتها كان واحد مخو مرتاح حتى كان البوليس السياسي جانا للدار و هزنا ، كنا مرتاحين لأننا أقلقنا النظام ! نتفكر وقتها كن نصبح للـ6 متاع الصباح و آنا في نقاش سياسي عبر السكايب و لا الفايسبوك و كان بالحق المستوى راقي لدرجة إنك ما تجمش ترقد ! و كنا نتبادلو الأفكار و كنا نتعلمو من بعضنا ! إلي يعرف يقول نعرف و إلي ما يعرفش يقول ما نعرفش ! كنا قبل مجموعة نعرفوا بعضنا لتوة ! بإختلاف توجهاتنا الفكرية نحكيو ! نتناقشو و ما فماش تطيح قدر ، مستوى النقاش كان ديما في مستوى الأفكار ! الي كانت وقتها راقية حتى و إن لم تكن ناضجة بالدرجة الكافية لأنو السياسة كانت ممنوعة علينا!
ما أحلاها هاكا الأيام ، نتفكر وقت عمار ضربلي زوز باجات و مدونة ، آنا وقتها عمري 20 ، فرحت وقتها ! وقتها حسيت إنو صوتي قاعد يوصل و يوجع و يقلق في النظام !
وقتها نتفكر إلي كنا متضامنين مع بعضنا ، كل مرة نسمعو بواحد تهز و لا جاوه للدار ولا قلقوه في الشارع ! كنا نتضامنو مع بعضنا ، محلانا وقتها ! و صدقوني لتوة نعرفوا بعضنا حتى و لو ما تقابلناش !
قبل وقت كنا نستعملو الحروف العربية في الفايسبوك كانو يضحكو علينا ! وصلوا شكو فينا خليجيين مش لعب ! توة وليت ندخل للفايسبوك نلقاه كلو عربي ! نجي نقرى راسي يوجعني ! نجي نسأل شكون الي كاتب يقلي آنا وقت إنت ساكت آنا نحكي ! نقلو ما نعفكش آما مرحبا بيك و راو هذا الي تحكي فيه ما يجيه راو تزوير للتاريخ و لا راو معلومتك غالطة و هاو الدليل ! يسبني و يقلي يا ثورجي !
خرجولنا توة الخلايا النائمة ! وقت كنا نحكيو أحنا هوما كانو راكشين يلعبي في "كرسي الإعتراف" و " أكسيون فيريتي " في الباجات ! توة ولاو الكلهم سياسيين ! مانيش نحتكر في السياسة للمتكلمين قبل 14 جانفي !! لا لا بالعكس ! نتفكر قبل وقت كانو أصحابي يسألوني علاش تعمل هكة راو ما عندك فين توصل ! كنت نقلهم ميسالش هات نمهدوا الطريق للجيل الي بعدنا باش يوصل ! هات الشعب يولي يحكي سياسة في عوض الكورة ! وقتها ما كان حد فينا يعتقد إنو فمة إمكانية باش تقوم ثورة ! أكبر المتفائلين ما كانش يحلم بيها ! خسرنا معركة الرديف 2008 لكن خرجنا مالمعركة الإعلامية هاكي بمعنويات مرتفعة لأننا نجمنا ننقلو الواقع تحدينا التعتيم الإعلامي وقتها ! جات بعد تحرك " نهار على عمار " وقتها عملنا الي نجمو باش نفضحو ممارسات الرقيب التونسي باش نهيؤا أرضية باش نخدمو عليها وقتها ! ما كناش نسعاو باش يتنحى الرقيب ( عمار 404 ) بقدر ما كنا نحبو نعملو إختبار ! هل صوتنا واصل ولا لا !! تفاجأنا إنو كان صوتنا واصل إنو التونسي قادر يخرج للشارع ! و قادر يتحرك ضد القمع بالرغم من إنو تم منع الوقفة الإحتجاجية لكن فمة ناس خرجت ! زادت جات بعد حكاية "محسن الشريف " بيبي نانتانياهو مناهضي التطبيع خدموا برشة ! و زدنا تأكدنا إلي نجمو نخلقو تواصل بين الإفتراضي و الواقع و وصلنا منعنا حفل سليم البكوش من مهرجان قرطاج و زدنا "حرقنا" "محسن الشريف" و فرضنا منعو من التلفزة و المهرجانات أقلها لمدة عام ! بعدها جات حكاية بن ڨردان وقتها تأكدنا إلي أحنا ، رغم إنا ما كناش نسقوا مع بعضنا ، تأكدنا إنا قادرين على النجاح ! و نجحنا في فضح ممارسات النظام و خلقنا ضغط داخلي من النقابات و الأحزاب ( الأحزاب الي كانت تناضل وقتها معترف بيها و غير معترف بيها ) ! و وصلنا عملنا خرق للتعتيم الإعلامي آلي كان فارضو بن علي و نظام نوفمبر ! رغم إنا كنا موش محميين و معرضيين للتتبعات العدلية في أي وقت آما كنا ديما نخدموا ليل و نهار ! وقتها كانت فمة إرادة قوية عندنا ! ماناش نسعاو لثورة لأنو مجرد الحديث عليها وقتها كان هبال و جنون لكن كنا نسعاو للتغيير. كيفاش ؟ الله أعلم لكن نحبوا تغيير ! وقتها زادة كنا نضربو على أكثر من جبهة ! عطلنا مشروع التمديد لبن علي و فضحناه و قاومنا مد المناشدات ! نتفكر وقتها عملنا إنتخابات برلمان إفتراضي ( حاجة رمزية ) كان فيها "زهير مخلوف" ، "نور الدين عويدادي" ، " إيمان الطريقي" ! حاولنا بكل ما نجموا نفضحو الظلم ( لأننا ما كناش قادرين نتصداولو ) و نجلبو التونسي للسياسة ! كنا كل مبادرة تجي ( حتى و ان كان رمزية كيف البرلمان الإفتراضي ) كنا نستحسنوها و ما كناش نبروا على بعضنا بالعكس كنا نتناقشوا و نطوروا في فكرنا ! وقتها ! كانو هالثورجيين هاذم ، شادين الفايسبوك ، يبارتاجيو في فيديوات "اللول" و يبزنسوا و يلعبوا في " كرسي الإعتراف " ! توة ولاو مناضلين ! لا موش مناضلين كهو بل تشيغيفارات تونس ! الثورة توة فشلت ! من شنوة ؟ من ثوار 2011 ! أي نعم ثوار جانفي !! الثورة بدات عندها سنين ! آنا حكيت علط الي عشتو لكن النضالات متاع الرجال الي سبقتنا هاكي الي مهدت الثنية باش صارت الثورة ! حكيت كان على المجال الإفتراضي لكن الي ذاقو الحبس و التعذيب و التنكيل في عهد الظلمات و الوقت الي ما كانش فمة وسائل إعلام باش تتكلم على حقهم ! توة مدولنا المشعل و أحنا تفكلنا المشعل من يدينا و فكوه كمشة فروخ جهلة بلبازة !! إلا من رحم ربي بالطبيعة ! الثورة الي مازالت متواصلة ! موش باش تنجح كان ما تولدش ثورة عقول ! ثورة فكر ! ثورة علم ! الثورة راو موش مريول تشيغيفارا و درابو تونس ! الثورة ثقافة و مادام أحنا ما صنعناش ثقافة الثورة و خلينا كمشة اللبازة هاذم يرتعوا فيها والله لا باش تقوملنا قايمة !
سامحوني قلبي معبي ! و كلامي موجه للجماعة القدم إلي بالحق تكلموا وقت الكلمة كانت من ذهب !
الغوغائية الي موجودة توة ! يا نحاربوها ! يا رانا باش نضيعوا الكل و تونس تمشي بين عينينا !

قناة نقمة !!

تتفكروها هاذي ؟ وقت قلتها برشة ضحكوا عليا ! هاكم طحتو فيه توة ! كان إلتزمتوا بالحملة نهارتها راو توة نسمة تنش في الذبان ! و راو اللوكال متاعها ولى حانوت لبلابي ! تستاهلوا
هاو آش قلت وقتها و هوكا رابط كل نشرية و شوفوا التاريخ !! و الله كلوا مالشعب ! بفلوسكم تكفر فيكم و في عقل داركم !!
__________________________________________
قناة نسمة قاعدة تخرب في الثورة و قاعدة تساهم في إجهاضها ! بون كيما يقولوا قص الراس تنشف العروق ، المرة هذه المقولة طلعت غالطة خاطر إذا تقتل لعروق يطيح الراس ، و العروق متاع القناة هذه ، هي التمويلات الي قاعدة تاخو فيهم بالإشهار ... أحنا نقصو العروق ! نطلقو حملة كبيرة لمقاطعة أي منتوج ( بالطبيعة كان نجمو نستغناو عليه ) أي منتوج يعمل إشهار في القناة هاذي ، الشركات تولي تخاف على رواحها و تقص التمويلات على القناة هذه ، الطريقة هاذي تهديد و كهو خاطر ما نتصورش فمة شركة مستعدة تتعرض لحملة مقاطعة ، خاصة في الوضع الحساس هذا ! و الكورة تقعد بيديهم لا إقتصاد يركد و لا والو ! بيناتنا حاجة كهو : تعمل إشهار في نسمة نقاطعوك و إنت دليلك ملك !
بالطريقة هاذي القناة موش باش تفلس بالطبيعة خاطر عندها تمويلات من أطراف أخرى في شكل هبات لكن باش نمارسو ضغط عليها ! هذا حل مالحلول باش نصرفڨو قناة الشهيلي تيفي في الصميم !
كان موافق على الفكرة أنشرها :
_________________________________________
http://www.facebook.com/photo.php?fbid=145142748891588&set=a.132702866802243.27025.132306710175192&type=3&permPage=1
__________________________

_______________

دراسة شافية حول حملة : سأقاطع أي شركة تقوم بالإشهار في قناة نسمة !

أولا : ماهو الهدف من الحملة ؟
=> الهدف من هذه الحملة هو الضغط على قناة نسمة حتى تغير من خطها التحريري الذي أثبتت التجربة و إستطلاعات الرأي عبر شبكة الفايسبوك أنه لا يخدم أهداف الثورة و أنه منحاز للحكومة على حساب الشعب .
ثانيا : ألن تأثر هذه الطريقة على الإقتصاد الوطني ؟
=> هذه الحملة ترتكز على أسلوب المساومة و فرض سياسة الأمر الواقع ، فالشركات غايتها الأساسية هي الربح المادي و لن تضحي هذه الشركات بإسمها و بمرابيحها فقط للإشهار في هذه القناة ، فالغرض الأساسي من الإشهار هو زيادة الربح المادي و في حال تبنينا هذه الحملة سيصبح تأثير الإشهار سلبيا و ستستعى هذه الشركات لإنقاذ إسمها التجاري و ذلك بمقاطعة الإشهار في قناة نسمة لذا لا خوف من هذه الحملة على إقتصادنا الوطني !
ثالثا : ألن تتأثر شركات الإشهار من هذه الحملة ؟
=> ميدان الإشهار في تونس خاضع للسيطرة التامة لشركة قروي أند قروي المالكة لأكبر نسبة من أسهم قناة نسمة تيفي و بالتالي ستتأثر الشركة مالكة القناة فقط بهذه الحملة و بذلك نكون قد ضربنا عصفورين بحجر واحد .
رابعا : و لكن كيف ستأخذ هذه الحملة صدى وطنيا ؟
=> هذه مهمة كل واحد منا ، فبنشر رابط هذه الحملة مع شرح تام لكل أسباب و نتائج هذه الحملة و ذلك حتى لا تشوه هذه الحملة و تكون واضحة لكل المشاركين فيها .
خامسا : ماهي نتائج هذه الحملة ؟
=> النتائج ستكون ملموسة على المدى القريب ، فقناة نسمة تيفي هي أيضا شركة تجارية غايتها الربح المالي و لن تضحي بمداخيلها من أجل أجندات خاصة و لذا ستقوم هذه القناة مرغمة بمراجعة خطها التحريري حتى تعيد الثقة فيها و تعيد الإشهار و تزيد من مرابيحها !

_________________________________________
http://www.facebook.com/photo.php?fbid=145154228890440&set=a.132702866802243.27025.132306710175192&type=3&permPage=1
_________________________________________


يا جماعة فمة برشة شككو في نجاح الحملة الي أطلقناها على قناة نسمة و هانا باش نزيدو نفسرو :
الإشهار كيفاش يخدم باهي قبل كل شيء القناة الي باش تعمل الإشهار تقصد شركة متاع إحصائيات باش تعرف نسبة المشاهدة متاع برامجها و وقتاش وقت الذروة متاع المشاهدة متاعها و الفئة الي تشاهد فيها و بالطبيعة كلو مربوط ببعضو يعني مثلا ذروة المشاهدة بالنسبة للأطفال هي وقت يعديو الصور المتحركة في الصباح يعني وقتها موش باش يعديو إشهار للمقرونة ، بالعكس يعديو إشهار للشكلاطة و الحلوى و اللعب !
و بالطبيعة نسبة المشاهدة هي الي باش تحدد سعر الدقيقة متاع الإشهار !
باهي ، وقت الحملة متاعنا تكبر ، بالطبيعة الشركات الي عاملة إشهار باش تطالب القناة إنها تعمل ميز آ جور للإحصائيات باش تحدد السوم الجديد وقتها باش يقل السوم خاطر الإإحصائيات باش تقول الي نسبة المشاهدة قلت ، يعني حتى كان فمة شركة مازالت تحب تتحدى الحملة كيف شركات الإتصالات الي تعرف الي المقاطعة ما تفيدش معاها باش تقلل من سعر الإشهار و هكة يقل التمويل على القناة !
وقت القناة تواصل على نفس الخط التحريري و تتحدى الحملة هاذي ، يعني نجمت تواصل في ظل نقص التمويل ، هنا يتدخلو رجل القانون الشرفاء و يقدمو قضية فيها لأنها باز باش تكون حصلت على تمويلات من أطراف تحب تتحكم في المشهد الإعلامي و تحب القناة هاذي تواصل على نفس الخط التحريري و هنا دوسي باش يجبد دوسي و برشة حقائق باش تتكشف ! أهمها مصدر المال السياسي !
شوفو هالحملة قداش باش تعاونا

_________________________________________
http://www.facebook.com/photo.php?fbid=145161675556362&set=a.132702866802243.27025.132306710175192&type=3&permPage=1

حين توصف إذاعة قرطاج بالثورجية

حين تصبح صفحة إذاعة قرطاج صفحة ثورجية فأعلم أن من يتهمنا هو أحد ثورجي 15 جانفي !
تاريخ تأسيس صفحة إذاعة قرطاج : أوت 2010
قدماء الفايسبوك السياسي في تونس ، لا أتحدث عن رواد صفحات الهشك بشك و كرسي الإعتراف و أكسيون فيريتي ، يعلمون جيدا أن الصفحات السياسية في تونس قبل 17 ديسمبر كانت قليلة و كان أبرزها:
صفحة تونس
صفحة إذاعة قالو
صفحة إذاعة قرطاج
صفحة ما عندي ما نقلك
صفحة نهار على عمار
ــــــــ
كانت هذه أهم الصفحات السياسية المستقلة التي كانت تنشر خفايا السياسة في تونس و تنشر أخبار المعارضة و الأحزاب و تقاوم الحجب و حملات التمديد و المناشدات ، في حين كانت كل الصفحات ( إلا من رحم ربي ) مهتمة بآخر أخبار الرياضة و الفن .
كانت جلها صفحات مرح و لعب "أكسيون فيريتي إفتراضي" و "كرسي إعتراف " أو صفحات ذات عقلية داكنة تسوق لعقلية المؤامرة و تكتفي بنشر أفلام وثائقية عن الماسونية خدرت عقول الشباب و جعلتهم سجناء تلك العقلية
ــــــــ
صفحتنا ، لا تسعى لإدعاء البطولة ولكن فقط للتوضيح ، الامشرفان المؤسسان لإذاعة قرطاج كانا مشرفين بصفحة إذاعة قالو ، ووقع إختلاف بينهما و بين المشرف المنشئ للصفحة المذكورة إبان أحداث بن ڨردان 2010 ، حيث كانا من المشجعين على التحريض على الإنتفاضة ضد النظام و فضحه ، حيث كانت أحداث بن ڨردان حينها مرشحة لتكون بذرة ثورة شبيهة كالتي إنطلقت من سيدي بوزيد بعد ذلك ، في حين كان المشرف المؤسس للصفحة حينها مع التروي و عدم شحن المشاعر ، ففضلنا الإنسحاب و أسسنا هذه الصفحة " إذاعة قرطاج في في أوت 2010 ، و كانت أول نشرية نشرناها :
اللهم إجعلنا أعداء ا للتجمع و التجمعيين ما عشنا !!
ثم بعد ذلك قدنا حملة لمناهضة التطبيع بمناسبة إقتراب ذكرى حمام الشط و أعدنا طرح موضوع إعلان تجريم التطبيع و التعامل مع أي حامل للجنسية الإسرائلية ، و قدنا حملة ضد فرنسا ، نطالبها فيها بالتعويض و الإعتراف عن إحتلال تونس ! وطبعا كانت باقي الصفحات حينها منشغلة بقضية بسايكو آم و سوسن معالج ! في تلك الفترة إندلعت شرارة الثورة يوم 17 ديسمبر في سيدي بوزيد و التي لم تكن حينها قد أصبحت ثورة ! إنخرطنا في القضية منذ يمها الأول و عرفنا بقضية البوعزيزي و حولنا وجهة الإحتجاجات من " المطالبة بحق البوعزيزي " إلى "المطالبة بالتشغيل" ثم " المطالبة بالتنمة العادلة " بين الجهات ، ثم المطالبة بـ"محاسبة كل الفاسدين" فـ"المطالبة برحيل بن علي" .
قدنا المعركة في أولها ، صحبة الصفحات السالف ذكرها عدى صفحة " إذاعة قالو" التي إختارت الحياد ! ثم إنضمت باقي الصفحات و أنشأت صفحات جديدة لن أقول أنها ركبت الأحداث ولكن ، سايرتها !!
ـــــــــــــــــــــــــــــــــــ
هذا كان ردا على ما طرح في الصورة وأما في ما يخص ما وعدت به بفضح و رفع قضية في كل من يحرض على الفتنة و الذي إستخفــت به مشرفة الصفحة التي نشرت الصورة ، ضنا منها أني لن أتعرف عليها ، لن أرفع قضية لأنها لم تحرض و لكن سألمح لشخصيتها حتى تصلها الرسالة واضحة :
تدرس علوم صحافة ، تقطن في أحد الأحياء الراقية بتونس العاصمة ، والدها تجمعي سابق و يشتغل إطارا بشركة الغاز و الكهرباء

في خصوص الترخيص لحزب التحرير

مع إحترامي الكبير لحزب التحرير ، فأنا ضد منحه ترخيصا للنشاط :

أولا : من منطلق مدني :
حزب التحرير لا يعترف بالدولة المدنية و لا يعترف بالقوانين الوضعية إذن لا يحق له طلب ترخيص ( فعل مدني ) للنشاط الحزبي ( فعل مدني ) و المشاركة في الحياة السياسية ( فعل مدني ) في إطار دولة مدنية !

ثانيا : من منطلق مبدئي :
حزب التحرير حزب مبدئي و هذا ما أحترمه فيه ، حزب راديكالي في موقفه في شتى المجالات ، متشبع بأيديولوجيته و بأفكاره و محاولة طلبه للتأشيرة للعمل السياسي في إطار مدني في حين أنه لا يعترف بالمدنية ، هو تنازل و إلتفاف على الخاصية التي تميزه عن باقي الحركات الإسلامية الأخرى حول العالم : المبدئية

ثالثا من منطلق ديمقراطي :
لا ديمقراطية مع أعداء الديمقراطية هذه هي القاعدة الأولى في الدميقراطية ، كيف نرخص تحت مسمى الديمقراطية لحزب لا يعترف بالديمقراطية المدنية و يكفرها بل و يسعى لإستبدالها بنظام آخر يراه أنسب من الديمقراطية ، و لذا فعلى الديمقراطية أن تحمي نفسها حتى و لو كان ذلك بأساسليب قد تنعد فيما بعد بالديكتاتورية !
ـــــــــــــــــــــ
ملاحظة :
معارضتي للترخيص لحزب التحرير لا ترتكز لأي قاعدة أيديولوجية أو لأية أحكام مسبقة ، فأنا مطلع على أفكار حزب التحرير و لا أعتبرها متطرفة كما أني لست ممن يصدق بأن حزب التحرير ميال للعنف لأنه الحزب الوحيد الذي يسعى للصراع الفكري لا المادي !
معارضتي للترخيص لحزب التحرير لا تتعدى الأسباب السالف ذكرها
و لكن من سيستغرب تعاطفي الفكري مع حزب التحرير أدعوه للتعرف على الحزب من الداخل و من خلال كتاباته لا من حديث العامة و الغوغاء
إختلافي مع حزب التحرير ينبع من نقطة واحدة : لم يحن الوقت بعد لما يطرحه الحزب من أفكار

رد على بايلاحسكو

ها بايلاسكو ! شنوة بابا ؟ ضربتك البطالة صبحت تمخور وحدك ؟ توة ولينا جهلة و مزمرين في مخاخنا ؟
توة ولينا ناس جاهلة و نمارسوا في الدمغجة ؟
موش كنت تسترزق من صفحاتنا ؟ شوية تحليلآت من هنا ، شوية أخبار من هنا، شوية تفريك من هنا ، لصق هذا في هذا و أعمل إيميسيون بور دوروا و إنت بانيها على ظهر الشعب ؟؟
باهي بابا بالنسبة للبيبيلكاسيون هاكي ، ممكن خاطر البطالة عملت فيك ، و طوالت عليك ، و عينيك ولات محوقة من السهريات و التخمام ، ظاهرلي ما شفتش كلمتين :

أولا : تفريكة : يعني الصفحة مجعولة كان للتفريك ، و ظاهرلي مادام مستانس تسرق منها باز راك تعرف شنوة عقلية الصفحة هاكي ، و شنوة الخط التحريري متاعها

ثانيا : حداثجية : و هنا لازمنا ناقفوا و نفهموك ، خاطر أثبتت إلي إنت و حسب نظرية داروين إلي لابسلها مريول ، إنت مازلت واحل في المرحلة الأولى من التطور ، باهي بابا ، الحداثجيّة (على وزن فعالجّية) ، يعني المتاجرين بالحداثة ، يعني الراكبين على مفهوم الحداثة ، إلي متخلف كل من لا يعترف بمعناه الصحيح و لا يسعى له، الحداثجية بابا هوما إلي قضيتهم الأولى و الأخيرة في تونس هي :
ـ الفصل الأول في الدستور لا ينص على أن تونس دولة دينها الإسلام : بل تحترم العقيدة و لك في حزب الأحرار مثالا إلي فيه حميدة بن جمعة
ـ أن اللهجة التونسية ليست عربية بل خليطا بين المالطية و الفرنسية ، و هذا عرفك نبيل القروي
ـ أن 80% من التوانسة لا يصومون رمضان و 10% يصومونه و يذمرون منه و هاكا الفازات هاكم ، رجاء بن سلامة
ـ التساوي في الميراث بين الرجل و المرأة ، و تعديل مجلة الأحوال الشخصية المقدسة التي لا تمس
( هاني موش باش نحكي على القرآن ماو حسب الصديق زميلك في نسمة ماعادش مقدس من هاكا العالم )

حاصيلو، هاذم هوما الحداثجية ، بابا أبا جهلوت ، عقاب عمارنا ولينا نقريو فيك ، آما باز موش عبيط لها الدرجة إنت ، قآعد تستعبط

ثالثا : ثقافيا و عقائديا : مآنيش باش نكسر راسي و نفهمهالك هاذي ، آما ماو حسب بعض الحداثجية ( بيان سير كان فهمت المعنى و ماعادش تخلط بين حداثة و حداثجية )، قتلك عاد حسب بعض الحداثجية :
التوانسة مسلمين ثقافيا ل عقائديا ، يعني هكا الفازات متاع يحلفو ب والله ، و يقولو تبارك الله ، و يعيدو و يرمضنو عالفازة ... قال شنوة عادات و تقاليد ! تعني كيف قلت هكة ، باش ما يبدى حد يهز و ينفض ، و باش نقطع الثنية قدام غوغاء و شعبوية الفايسبوك ، ياخي إلي صار كونوا واحد رمى قصبة في الماء و عمرها دود أبيض ، فيبالي باش يخرج حوت ورقة روايال ، حصلت فيها كعبة بومقص أكحل !!

الي مهبلني في الحكاية الكل إنو أي واحد كان حال بلوغ أيام بن علي ولا مسمي روحوا بلوغور و يدعي النضالية و يحل في فموا الناتن و يقللك "لم أنتظر 14 جانفي" !
ياخي فاش كنت تحكي في البلوغ متاعك قبل باش تجيبهالنا توة لجعب شرارة ؟ تي ماو كنت تجرب في الكلي أورانج و تجرب في البورتابلووات ؟ ولا آنا غالط ؟ توة جايبها مناضل و هاكا الفازات ؟؟
تحب تثبت في تاريخ " الفرخ " إلي كتبك الكلمتين هاذم و تحشم على روحك ؟
ـ شوف تاريخ صفحة إذاعة قرطاج : مشرف مؤسس فيها ، نعرف شعورك توة ههههه

الكلمتين هاذم جاو ردا على هيثم بايلحسكو متاع نسمة و هذا الرابط
http://www.facebook.com/photo.php?fbid=238019282924627&set=a.155919721134584.33031.152033644856525&type=1&ref=nf

الصراع الفكري ... كيف يكون ؟

نوعية الخطاب تحدَّد من منطلق موقع المخاطِب و موقع المخاطَب :
1) خطاب عمودي أطرافه مخاطِب و مخاطَب :
إيجابياته :
إحتفاظ المخاطِب بعلو فكره و تعمقه في نقاش الأصل لا الفرع من الشئ ، و بالتالي فسح مجال لمزيد البحث و التعمق في تحليل الفكرة و إثرائها
سلبياته :
ـ إنعدام جسر الخطابة بين المخاطِب و المخاطَب و بالتالي ضياع القصد من الخطاب و عدم الوصول للغاية منه
ـ إبتعاد المخاطِب صعودا و المخاطَب نزولا في الإجتهاد الفكري و بالتالي خلق فجوة تواصل بينهما و إنعدام الإستمرارية الفكرية عبر الأجيال و زوال الفكر بزوال المفكر الأصل و إنعدام الناقل
2) خطاب أفقي في مستوى المخاطِب أطرافه مخاطِب و مخاطَب :

خلق جسر الخطابة بين المخاطِب و المخاطَب و بالتالي إتيان القصد من الخطاب و الوصول للغاية منه
ـ إقتراب المخاطِب نزولا و المخاطَب صعودا لا يتعدى مستوى المخاطِب في الإجتهاد الفكري و بالتالي ملء فجوة التواصل بينهما و ضمان الإستمرارية الفكرية عبر الأجيال وبالتالي عدم زوال الفكر بزوال المفكر الأصل و إنعدام الناقل
سلبياته :
فقدان المخاطِب لعلو فكره و تعمقه في نقاش الفرع لا الأصل من الشئ ، و بالتالي غلق المجال أمام مزيد البحث و التعمق في تحليل الفكرة و إثرائها و إنشغال الطرفين لنقاش الجزء و الفصل من الكل و بالتالي ضياع فكر الكل و الأصل


2) خطاب أفقي في مستوى المخاطَب أطرافه مخاطِب و مخاطَب :
هو خطاب نظري بحت لا يمكن إدراكه ! لعدم تكافئ الطرفين فكريا و بالتالي إنعدام لغة التواصل و هذا هو ما يطرح إشكالا في صياغة الصراع الفكري و هو ما سيجعله منحصرا لدى فئة ( النخبة ) دون الأخرى !

لكن ماذا لو إعتمد الصراع الفكري على مفهوم الطبقية الفكرية ؟
ماذا لو صيغ الصراع بشكل هرمي مقسم لمستوايات ؟

لو أخذت هرما و قسمته مستويات ، لوجدت أن كل مستوى له شكل شبه منحرف ثلاثي الأبعاد و له 4 وجوه إن إستثنينا القاعدتين ، و له 8 أركان ، 4 أركان متصلة بالقاعدة الصغرى و 4 أركان بالقاعدة الكبرى !

إن إعتبرنا أن :
رأس الهرم يمثل نخبة النخبة و قاعدته تمثل أدنى العامة فكرا .
كل مستوى يمثل شريحة من العامة لها مستوى معين من الفكر.
كل ركن يمثل ركنا من أركان الصراع الفكري الأربع ( عقيدة ، إقتصاد ، إجتماع ، سياسة )
إرتفاع كل شبه منحرف هو الفارق الفكري بين الأفراد المنتمية لنفس المستوى

سنجد أن كل مجموعة لها نفس المستوى الفكري تتصارع فيما بينها في نفس المستوى ( تعمقا في الفكر ) و في نفس المجال ( أركان الصراع الفكري الأربعة ) ، كما سنجد أن الصراع ينقسم في المستوى الواحد لعدد لا متناه من المستويات تحده صعودا و نزولا قاعدة فاصلة بين المستوى الأعلى و المستوى الأدنى فمن إستوفى مستواه فله أن يرتفع لقاعدة المستوى الموالي و يلتحم بقاعدته
و تبقى علاقة المستوى الأعلى بالمستوى الأدنى منه مباشرة مكفولة للقاعدة الدنيا ( القاعدة الكبرى ) و هي التي ستضمن تواصل الفكر من مستوى لمستوى أدنى مباشرة
في آخر مراحل الصراع ستصبح كل الأركان مجتمعة في ركن واحد و هي رأس الهرم و بالتالي لن تفصل العقيدة عن السياسة عن المجتمع عن الإقتصاد و ستصبح كلها " كلا " إما أن نقبله أو نرفضه !

يبقى السؤال المطروح : من أين يبدأ الصراع في مستوى النخبة أو مستوى العامة ! و هل يجب أن تتزامن الصراعات الفكرية بين كل المستويات أم يكون ذلك مرحليا ...؟

الإستحمار الفايسبوكي

الأدمين : النهضة تسعى لتجزأة الشريعة و إتيان بعضها دون البعد الآخر !!
الفان 1 : يا أدمين إشهار براس أمك !
الفان 2 : يا أدمين بدل الموضوع يهديك ، أحكيلنا على المرزوقي كيفاش تلق مرتو !!
الفان3 : يا أدمين براس أمك شبيك تهز و تنفض ؟ كم أنت لول !!!

الأدمين : يبلوكي الفان الأول ، يجاوب الفان الثاني ، إلتزم بالموضوع يهديك هذا موش موضوعنا توة ، يجاوب الفان الثالث ، لو طلبت حججا لمكنتك منها !!

الفان1 يرجع بكونت آخر : يا أدمين يا موش راجل ، بلوكيتني !!!
الفان2 : هذه الديمقراطية متاعك ؟؟ ولا خاطر إنت تحب المرزوقي ما نحكيوش عليه ؟
الفان 3 : لا لا نعرفك آش باش تقلي و خليهم عندك الحجج متاعك !! النهضة عقدتكم يا كلاب فرانسا !!

الأدمين يتبلانتا و يتنهد تنهيدة كبيرة و يمشي يحكي مع صاحبتو دقيقتين يرجع للباج مرة أخرى :

الفان 1 : ها تيييييييييت يا ولد التيييييييييييييت ها تييييييييييييييت !!!
الفان2 : الأدمين عميل لحزب المرزوقي ، قتلوا أحكيلنا على التلاق متاع المرزوقي هرب
فان3 : هاهاها أيا وينك عاد ؟؟ ولا كيف كشفتك تخلص من فرانسا سكتت !! هيا بلوكيني عاد !!

و فجأة !! يدخل فان4 : يا أدمين كيفاش بربي النهضة تجزأ الشريعة تي هو الرسول صلى الله عليه و سلم بدى الدعوة تدريجيا !!
الأدمين : يا فان4 : الرسول صلى الله عليه و سلم بدى الدعوة في مجتمع كافر !! موش في مجتمع مسلم ! و تجزأة الشريعة لن تضرنا نحن بل ستضر الأجيال القادمة التي ستعتبر سلفها و تقتدي بنا معتبرة الجزء المطبق من الشريعة هو الشريعة كاملة !! و النهضة بسعيها لتطبيق الشريعة كاملة و إقرارها مثلا بمنع تعدد الزوجات سقطت في الفخ و كانت مثلا لقوله تعالى " لا تحرموا طيبات ما أحل الله لكم و لا تعتدوا " و قوله " أتؤمنون ببعض الكتاب و تكفرون ببعض "
الفان1 : يا أدمين يا تيييييييييييييييييت يا ولد التييييييييييييييييت
الفان2 : هاها يا أدمين كم أنت لول ! ياخي المرزوقي كيف طلق مرتو حب يشد الرئاسة ؟ ههههه
الفان3 : يا أدمين يا صهيوني يا عميل فرانسا !!!
الفان 4 : يا أدمين تختزل في الشريعة في تعدد الزوجات ؟ راو الشريعة مفهوم كامل و أعم برشة !!
و راو تعدد الزوجات موش فرض و زيد فمة برشة شروط أهمها العدل باش تنجم تعرس بـ 4
فان5 : الله لا تربحكم يا خوامجية ! باش تدخلوا البلاد في حيط

الأدمين : يا فان 4 : قلت أنني أستشهد بمثال ، نعرف إلي الشريعة أعم من تعدد الزوجات و لكن خصصت حتى تمر الفكرة ! باهي هاني باش نعمم منو هكة باش تفهمني !
تعدد الزوجات ليس فرضا و لكنه حق و حلال لكل مسلم ، و الشروط التعجيزية لا تلزم إلا من عجز عنها و العدل في ما تملك لا في ما لا تملك ، يعني ليس شرطا تعجيزيا إتيان العدل ، و بإقرار النهضة بمنع تعدد الزوجات ، هي تجرم طيبات ما أحل الله !
و للتعميم الأمثلة : كثيرة ، عدم تجريم التعامل باربى ، عدم تجريم تجارة و شرب الخمر ، عدم إتيان حدود الله ، الحكم "بغغغغغغير" ما أنزل الله بإعترافها بالقوانين الوضعية إلخ إلخ إلخ

فان1 و فان2 و فان3 و فان 4 و فان5 بسوت واحد : يا أدمين يا بهيم !! "بغير" ما تتكتبش هكاك ! برة إتعلم إكتب "بغير" و بعد إرجع أحكي على "الإسلام" !!! والله النهضة هبلتكم

الأدمين بينو و بين روحو حتى آنا مع شكون نكسر في راسي بففففف يمشي يرجع يحكي مع صاحبتو

بعد 5 دقائق :
الفان 1: يا أدمين يا تيييييييييييييت يا بن تيييييييييييييييييت وينك شبيك هربت !! هاها نهضة عقدتكم
فان 2 : هاهاه يا عميل الإمبريالية يا عميل المرزوقي !!! وينك شبيك هربت !! هاها نهضة عقدتكم
فان3 : يا كلب يا بهيم وينك شبيك هربت !! هاها نهضة عقدتكم
فان 4 : هاهاهاهاهها أدمين وينك شبيك هربت !! هاها كي موش قد نقاش ما عادش تناقش
فان 5 : يا أدمين يا خوانجي ، يا فان يا خوانجية ! الله لا تربحكم يا عملاء قطر !
____________________________
دجو إلي ألمه و أسفو عميقان إي نعم عميقان !!
هاو فاش نعاني كل يوم

غريب أمرك يا شعبي

غريب أمر من يتهم الآخر بالإرهاب فقط لأنه ملتح
غريب أمر من ينعت الآخر باللوطي فقط لأنه لا يحمل نفس أيديولوجيته
غريب أمر من يتهم الآخر بالتخلف و الرجعية فقط لأنه إختار نمطا معينا من اللباس
غريب من ينعت الآخر بالزاني فقط لأنه إختار نمطا معينا من اللباس
غريب أمر من يدعي الدفاع عن الهوية و مناهضة الثقافات الدخيلة مستعملا لغة أجنبية
غريب أمر من يدعي الحداثة و التقدم في حين أنه خطابه رجعي يسعى لإعادتنا إلى وضع ما قبل الثورة
غريب أمر من يدعي النضالية ضد الديكتاتورية فقط لأنه سجن في عهدها لدفاعه عن أيديولوجيته الخاصة
غريب أمر من يدعي راديكاليته في مناهضة الديكتاتورية في حين أنه أول من شارك في إنتخابات في ظلها
غريب أمر من كان أكبر همومه قبل الثورة إنتصار جمعيته الرياضية في الدربي و أصبح بعدها متعصبا لأيديوليجيته
غريب أمر من كان يشرعن حكم الديكتاتورية و يناشدها البقاء في فضائيته الخاصة و أصبح بين ليلة و ضحاها مناضلا ضدها دون حياء أو خجل
غريب أمر من كان مختبأ كالجرذ في الخارج و عاد ليشتم من آثر البقاء في سنوات الجمر
غريب أمر من يدعي الديمقراطية في حين أنه أول من نعت الشعب بالجاهل حين إختار ممثليه بكل ديمقراطية
غريب أمر من كان معتكفا في معبده يتعبد و يتضرع في حين كان أول المتضررين من الديكتاتورية و أصبح بعد زوالها بطلا مقاوما صنديدا محاربا للديكتاتورية محرما للديمقراطية
غريب أمر من كان يكتب ليشكر و يعدد إنجازات السابع و أنقلب في ليلة و ضحاها إلى معدد لمساوئها
غريب أمرك يا شعبي ....

الطحين ... فلسفة حياة

وقت الجبالي قال خلافة راشدة سادسة و إشارات ربانية و هات من هاكا اللاوي :
النهضاويون : في زمن العجائب : مجرد ذكر كلمة خلافة في تونس عيبا !!
التحريريون : نعتبرها توبة سياسية و لكن على النهضة أن تأصل لهذه الفكرة في أدبياتها
البقية : إزدواجية خطاب : قبل الإنتخابات إصرار على تبني النهج المدني الديمقراطي ، بعد الإنتخابات تبني خطاب متضارب 180 درجة مع الطرح المدني الديمقراطي
صفحات الطحين النهضاوي : الشعب لم يرتقي بعد لمستوى يخوله فهم معنى كلمة حمادي الجبالي ، حمادي الجبالي لم يقصد خلافة و لكن قصد .... ( تفلسيــــــــــــــــــــــــف و هزان و نفضان و إنتي سيبوزي تخرج بعد تقول والله مسكين هاكا المغبون الجبالي فهمتو بالغالط )
ـــــــــــــــــــــــــــــــ
بعد وصف سمير ديلو لإستعمال كلمة خلافة راشدة سادسة بالإختيار الغير موفق :
النهضاويون : قلنالكم إلي النهضة قوية برجالها ! قلوا خلافة قلوا !! النهضة يا معذبتهم !! ( الكلمة العجيبة متاعهم : النهضة يا معذبتهم تستعمل وقت ما يلقاو ما يقولوا )
التحريريون سيخرجون ليقولوا : راهنا على أنها توبة سياسية و لكننا أخطأنا على النهضة أن تأصل لفكرها حتى نفهم أدبياتها !
البقية : إزدواجية خطاب و تأرجح واضح في الطرح بين الرجعي و الحداثي ( لازم يدزوا كلمة حداثة سينون ما يتساماوش حكاو )
صفحات الطحين النهضاوي : هناك ضغوطات تمارس على النهضة حتى تتراجع عن الدعوة للخلافة و سمير ديلو لمح للموضوع و الكرة الآن في ملعبنا حتى ندعم النهضة، قلنالكم الشعب لم يرتقي بعد لمستوى يخوله فهم معنى كلمة سمير ديلو و حمادي الجبالي ، حمادي الجبالي لم يقصد خلافة و لكن قصد .... ( تفلسيــــــــــــــــــــــــف و هزان و نفضان و إنتي سيبوزي تخرج بعد تقول والله مسكين هاكا المغبون الجبالي و هاكا سمير ديلو فهمتهم بالغالط لازم مزيد دعم حركة النهضة )

النقاش البيزنطي

حرية المرأة متأصلة في تونس و لا تنجم لا نهضة و لا سلفيين يفكوها و كيف كيف ما تحتاجش لا نساء ديمقراطيات و لا القطب باش يدافع عليها !!
القضية هاذي موش مطروحة للنقاش في تونس !! و كل من يطرحها للنقاش يعتبر إنسان رجعي !!
قدامنا دستور باش نعملوه و قدامنا حكومة لتوة ما تشكلت و بدات تخدم، قدامنا رسم التوجهات الإقتصادية للدولة ، و قدامنا إصلاح المنظومة التربوية و الجامعية ، قدامنا إصلاح الإدارة ، قدامنا مقاومة الفساد و الرشوة و المحسوبية ، قدامنا تطهير القضاء و المنظومة الأمنية و إصلاحهم ، قدامنا محاسبة قتلة الشهداء ، قدامنا إسترجاع الأموال المنهوبة ، قدامنا العمل الديبلوماسي الضخم لتسلم المطلوبين الهاربين ، قدامنا التعويض للشهداء و الجرحى و قدامنا أهم مشكل منه إنطلقت الثورة : البطالة ...
يعني مجرد طرح مشك آخر جديد يعتبر "فو ديبا" و باش يخلينا طول عمارنا ناقشو فيه !
كيف كيف موضوع الهوية ، لازم نفهموا إنو الهوية موش ثابتة و بطبيعته متحركة ؛ الهوية فكرة ، فممارسة فتبني !!
يعني من عهد الديناصورات ناس تناقش في الهوية و ما وصلتش لحل ! موش سي الجبالي و لا سي حمة الهمامي باش يحلوه هالمشكل هذا اليوم !!
خلينا ناقشوا ما أهم و قت نحققوا إلي بيه الفايدة و نصبحوا بطالة ما عدناش قضايا مطروحة للنقاش تو نجبوهم مالأرشيف و نفركوا الرمانة !!!

هنا إعتصام باردو

يوم 07/12/2011 مشيت لباردو ، مشيت مندس ، لأني على حسب الفكرة الأولية إلي ماخذها ، طبعا مالفايسبوك ، على مطالب الإعتصام خلاتني ناخذ موقف محايد ، دونك مشيت باش نزيد نتأكد و إلي شفته ، خلاني نزيد نتأكد إنو الإعتصام هذا لازم الواحد يقكون محايد تجاهه ، لا يعاديه و لا يسانده ، علاش ؟
باهي أول ما مشيت نلقى تجمع متاع عباد ما يفوتش الـ100 شخص ، جهة فيها ما يقارب 80 شخص ، جهة فيها ما يقارب الـ20 ، و يفصل بيناتهم الكياس ، دونك أول حاجة جات فيبالي هي إلي هاكا التصويرة متاع الشعب منقسم و درا شنوة و إلي دارت برشة في الفايسبوك عرفت السبب متاعها ، الناس مقسومة لضفتين لأنو الساحة صغيرة و المعتصمين ناصبين خيامهم تحت السور متاع مبنى مجلس النواب ، دخلت للضفة إلي فيها أكثر عباد ، لعبت عيني نلقاش شكون نعرفه ، خاصة من جماعة القصبة 2 لأننا نعرفوا بعضنا بالڨدا و عشرة بيناتنا ، شفت زوز كهو ، و ما نتفكرش أساميهم ! دونك كملت نمشي القدام و نلعب في عيني ، لاحظت حاجة :
الناس الموجودين في الضفة هاذي ، ما تنجمش تنسبهم لتيار سياسي أو أيديولوجي معين من شكلهم ، نزيد نوضح ، يعني مخلطين بين ملتحين، و محجبات و ڨوش أنارشيستية ( ماو زادة من لبستهم تعرفهم ) و شباب موجود بدافع الفضول ( من وجوههم و عينيهم يظهروا ) و نساء كبار ستيل النساء الديمقراطيات و من كل لون يا كريمة ، و آنا سارح في الوجوه و سمعت واحد يصيح على الجماعة إلي واقفين مالضفة الأخرى : موش كان تفكوا عليكم من هالرويق و تجيو معانا هنا تقولوا كلمة خيرلكم ؟ هزيت عيني نلقى في الضفة الأخرى واحد ملتحي و لابس لسبة عادية يعني لا قميص و لا و والوا ، هاز شعار نسيت بالضبط آش فيه آما محتواه داعم لحق المتنقبات في الدراسة ! و قاعد يضحك و يستهزأ من الناس إلي مقابلينو ، دورت عيني و بديت نقرى في الشعارات !
موش باش نطول عليكم: على كل لون يا كريمة ، إلي يطالب بالتشغيل و إلي يطالب بإنهاء الإنقسام و إلي يطالب بالديمقراطية و إلي يطالب بالفصل بين السلطات و إلي يطالب بحماية حقوق المرأة ... حاصيلو ما فهمت شيء !
هل الناس هاذم عاملين إعتصام يتبنى مطالب موحدة ولا إلي يڨلڨ في دارهم يكتب شعار و يجي !
كل ما نقدم شوية نلقى حلقة متاع نقاش فيها شكون جايبها فاهم كل شيء و عندو معلومات مسربة آما يحكي إنطلاقا منها و ما ينجمش يقولها ، و فيهم شكون يحكي بهداوة و فيهم شكون جايبها فيصل قاسم و ينسق في الحوار فيهم شكون جيست ماد وجهه يحب يفهم و فيهم شكون جابد بورتابلوه و يصور !!
ناس داعمة للحكومة و ناس معارضة الحكومة ، ناس داعمة للنواب الموجودين في المجلس و ناس تخون فيهم و تتهم فيهم بالعمالة ، ناس تدافع على نزاهة نتائج الإنتخابات و ناس تقول راو فمة أحزاب وصلت بالعشرين دينار و الكسكروتات و بفلوس دول الخليج و لا فرانسا و لا أمريكا و هات من هاكا اللاوي ...
وين تدور تلقى نقاش ... ساعات يكون نخبوي و ساعات يكون شعبوي ... ساعات تلقى واحد جايب ما عنده ، يرجع عليه إلي مقابلو بجواب يفشل تڨول صب عليه سطل ماء بارد ... حاصيلو ناس الكل تغلي و حتى الحاكم عاجبتو الحكاية هاو مرة يمد وجهو من وراء الباريار يسمع و ما يحكيش و ساعات تتعدى طفلة تشوشله أفكاروا ينسى النقاش و يقعد يتبع فيها بعينوا ...
بعد ممكن سويعة ملي وصلت آنا ، جاو برشة صحفيين ، ممكن ما فقتش بيهم آنا مالأول آما وقت هزيت عيني نلقى برشة كاميراوات و صحفيين يحكيو مع المعتصمين ، بون الحاجة الباهية في هذا إنو الإعلام ركز مع أصحاب القضايا الإجتماعية إلي مساكن ديما ماشين في العفس ، و حكى معاهم و صورهم و هوما يوصلوا في مشاكلهم ...
حاصيلو ، صورت زوز تصاور عجبوني متاع المطالب إلي موش باش تتشاف ، و هزيت روحي لمحطة الميترو و قصدت ربي ...
صدقوني قعدت مبهم عديت قرابة ساعتين في الإعتصام نحاول نفهم : علاش معتصمين ؟ ما فهمت شئ !!!
ممكن الحاجة الوحيدة إلي فهمتها إنو فمة ناس بالحق عندها مطالب إجتماعية مستعجلة و مشاو في العفس ، تاجرولهم بالقضايا متاعهم أيام الثورة و أيام الإعتصامات قصبة 1 و 2 و أيام الحملة الإنتخابية و بعد تنساو !!
و فمة ناس غايرة على ثورتها بدرجة إنها حتى في ظل وجود سلطة شرعية منتخبة في البلاد باش تبني و تأسس لتونس جديدة موش متهنين عليها ، كيف الأم إلي توصل في ولدها للمطار مسافر لأول مرة باش يقرى و يرجع بشهائده كان تلقى تركبوا في الطيارة و تتهنى عليه ، و فمة ناس فاتهم الڨطار متاع الإعتصامات و التشيڨيفارية و حبوا يستدركوا إلي فاتهم فـلقاو إعتصام باردو فرصة ...
لكن ديما يقعد الإعتصام هذا عرض من عوارض مخاض الديمقراطية !يعني حالة عادية في ظل أي ديمقراطية ناشئة !! عادي يعني ! ما فمة شيء يخوف بل بالعكس ، ندعوا التوانسة الكل يشاركوا في النقاشات إلي موجودة فيه لأنه بخلاف ما يدعيه البعض إنو إعتصام متاع يسار ! لا هو إعتسام متاع بطالة ( يعني الناس إلي تبات فيه بطالة تطالب بالتشغيل ) و الناس إلي تحظر فيه من شتى التيارات السياسية !! ممكن اليسار برشة لأنه اليمين مقاطع الإعتصام هذا و لكن هو مكان للنقاش في الشأن العام أكثر منه إعتصام

إلى النواب الذين قاطعوا إنتخابات رئيس الجمهورية

إلى النواب الذين قاطعوا إنتخابات رئيس الجمهورية سواء عبر الترشيح أو عبر التصويت : 
لم توافقوا على القانون التنظيمي المؤقت للسلط ، بالأحرى لم توافقوا على محدودية السلط الممنوحة لمنصب رئيس الجمهورية ؟
لم ترضوا أن تشاركوا في تلك "المهزلة" و لم تريدوا أن تأخذوا دورا في تلك "المسرحية" التي كانت تعرض أمام الشعب ؟
لم ترضوا أن تشرعنوا إنتخابات مدلسة معروفة نتائجها قبل إجرائها ؟
شكر الله سعيكم و وطنيتكم و ولائكم للشعب و وفائكم لتطلعاته و آماله ! 
و لكن عذرا لم أفهم بعض النقاط :
هل يعني هذا أنكم حين شاركتم في الإنتخابات في عهد بن علي كنتم موافقين على السلط التي كان يحتكرها منصب رئيس الجمهورية ؟ هل يعني هذا أنكم حين شاركتم في الإنتخابات في عهد بن علي لم تكن الأخيرة في نظركم "مهزلة" أو "مسرحية" ؟ هل يعني هذا أنكم حين شاركتم في الانتخابات في عهد بن علي كنتم تعتبرونها إنتخابات نزيهة قد تفوزون فيها على حساب الحزب الحاكم حينها ؟
يا ممثلي القطب الحداثي : هل أنكم بمشاركتكم في برلمان بن علي المنحل عبر حركة التجديد كنتم تمثلون صوت الشعب و إرادته ؟ ألم تكونوا بذلك مشاركين في المهزلة و المسرحية ؟
يا ممثلي هزب المبادرة : هل أنكم بمشاركتكم في آخر حكومات بن علي و توليكم لإحدى الحقائب السيادية فيها عبر مؤسس حزبكم الذي منع من الترشح لإنتخابات المجلس التأسيسي لأنه كان أحد المناشدين و المشاركين في النظام البائد ـ هل أنكم ـ كنتم تجسدون إرادة الشعب و تطلعاته ؟ هل كنتم بذلك تعارضون إستمرار النظام البائد ؟ ألم تكونوا بذلك تشاركون بل تدعمون و تساهمون في إخراج المسرحية الهزلية لتعرض أمام الشعب ؟
يا ممثلي الحزب الديمقراطي التقدمي ، هل أنكم بمساندتكم لبن علي في أخر أيام إحتضاره يوم 13 جانفي حين كان الشعب يواجه الرصاص بصدر عار و كانت الأمهات ترثوا أبنائها ، هل كنتم بذلك تجسدون إرادة الشعب ؟ هل كنتم بذلك أوفياء لصوت الشعب ؟ هل كنتم حينها تكشفون و تفضحون خيوط المسرحية و المهزلة التي كانت تعرض أمام الشعب ؟ هل أنكم بإصراركم المشاركة في حكومتي الغنوشي التجمعيتين الأولى و الثانية و إصراركم لمعارضة مطالب الثوار في القصبة 1 و القصبة 2 ، هل كنتم بذلك تمثلون صوت الشعب ؟ هل كنتم بذلك أوفياء للثورة و الوطن ؟ هل أنكم بتعبيركم عن حزنكم الشديد لحل حزب التجمع الدستوري اللاديمقراطي الغير مأسوف عليه كنتم بذلك أوفياء لصوت الشعب رافضين شرعنة الديكتاتورية و المهزلة و المسرحية ؟ ألم يهتف الشعب " يسقت حزب الدسترو يسقط جلاد الشعب" حينها ؟ 
يا ممثلي حزب آفاق تونس !! ما تاريخكم حتى تتهموا مناضلي أيام الجمر بالسعي نحو ديكتاتورية جديدة ؟ أين كنتم حين كانوس يسجنون و يعذبونو ينكل بهم ؟ سأتفهم أن حزبكم لم يكن موجودا حينها ! أذكروا لي إسما واحدا من قياداتكم أو حتى قواعدكم كان في مواجهة الديكتاتورية و واجه النظام النوفمبري أيام الجمر ؟
3 ممثلين فقط في المجلس التأسيسي شاركوا في إنتخاب رئيس الجمهورية و صوتوا بـ"لا" !! أضنهم نواب حزب العمال الشيوعي التونسي و حتى إن لم يكونوا كذا !! فلكم مني كل الإحترام لأنكم فهمتم المعنى الحقيقي للمعارضة !!

حومتي

نعيش في حومة في كل دار فيها فمة شكون شاد حبس قبل ، زطلة ، نطرة، سرقة ، إنتماء ، بيعان شراب ...
كلو يمشي ، كل دار فيها قصة ، بين دار المربوط دار المربوط لاخر تلقى دار مربوط ...
حومتي تخضع للتوقيت الموسمي ، في الشتاء بطالة في القهاوي ملوحين ، و في الصيف لقاطة رزق بين البرط و البحر و المعامل و المرمة ، و الشينوات !
باش نمشي من حومتي لوسط البلاد ، ناخذ تاكسي على خاطر حومتي بالنسبة للشركة متاع النقل تابعة دزاير ، و ما تقولوش ناخذ تاكسي معناتها راني كرزة ، لا بالعكس التاكسي من و إلى حومتي ناخذها بالبلاصة 450 فرنك البلاصة !
في حومتي القاعدة متاع الزطلة " أسترها تسترك " ما تمشيش ، تبنك دجين حذى حانوت بوحميد ، تشوف الشعب يكونسومي ورقة و كريستال أكثر مالخبز و الحليب !
في حومتي كيف تسهر في القهوة ، يقعد حذاك واحد ما تعرفوش ، درجين و يويلي صاحبك ، يضحك معاك ضحكة نظيفة و يعاشرك في سويعة و يمشي و من غدوة ما عادش تراه ، شكونوا الله أعلم ، ممكن بوليس ، ممكن مربوط مسيب جديد ، ممكن من حومة أخرى عندوا دوانة مع واحد مالحومة جاي يفض فيها ! ما يهمكش خاطر ماعادش باش تراه !
في حومتي ، كيف نبداو ساهرين في نفس الطاولة ، بجنبي شكون يفتل في جونتة تحت الكابيش و ما تفيقش بيه ، في جنبي لاخر شكون يلحم زطول و دواء قدام عينيك و ما تفيقش بيه ، مقابلني في نفس الطاولة شكون لحيته تكتف جمل و صلاته ما يفلتهاش كل آذان يخبي عندي كابيسان متاعه يصلي و يرجع يكمل قعدته ، في نفس الطاولة معانا شكون يبيع و يشري بورطابلوات حلال و موش حلال ، و في نفس الطاولة زادة شكون تحته حديد موش مشلق ، يستنى في واحد باش يعطيه حقه من دوانة قديمة ...
تتعدى مرا و أحنا قاعدين ، الي يبيع زطول يقلك نقص مالكلام الزايد ، خالتك فلانة متعدية ، تتعدى طفلة قدامنا واحد يقول : شوف ملة زبور يضربو إلي تحته حديد بخف على راسو و يقلو : نقص نيك هاكي أخت فلان ...
في حومتي ، وقت الي واحد يتكتلوا عليه و يضربوه و هو لا حول و لا قوة ! يتسمى تحقر !! و الحڨرة عندنا في الحومة عيب موش فخرة ! و المحڨور في حومتنا عنده فتوى متاع شارع ! تقول نصرة المحڨور واجب على كل ذي صحة أبدان !!
في حومتنا ! البناي سلفي جهادي و النجار دبوزة البيرة ما تفارقش شفايفه و إلي يعمل البلار واحد كان رئيس شعبة سابق و الدهان واحد زوالي جاي نازح ! و إلي باش يبني داره ينصحه البناي بعد بالنجار الفلاني و النجار الفلاني ينصحه بالبلارجي و الفلتاني و إنت ديما ماشي ...
في حومتنا أيام الثورة ما خرج حد يضرب بالحجر في الحاكم ، قضية ما تهمهمش خاطر ديجا حومتي ما تتبع تونس كان بمعمل الڨاز و لا الدرابو إلي معلقينه فوق الشعبة ! آما حومتي خرجت تحرق في المراكز وقت واحد مالحومة زوالي بو عايلة موش مبرنشي مع الثورة تضرب بكرطوشة ! الحاكم ما باتش ليلتها في الحومة ! لا في دايارهم و لا في مراكزهم !!
في الحومة عندنا قهوة تلمنا الكل ، مولاها من أصحاب السوابق العدلية ، معروف ناس ملاح ، نهار 15 جانفي قام قالوله بن علي هرب ! و ما فماش قانون ، مش جاب سلعة متاع بني ، حاز قطعة أرض ! و ما جاء نهار 20 إلا الدالة متاع القهوة مصبوبة ! ولاد الحومة ليل نهار يبنيو معاه ! و خرجت القهوة !! 
لمت ولاد الحومة !! 
ولاد الحومة ، وقت تضرب واحد منهم في حومة أخرى ، و إلي تضرب سلفي مشى يطل على أخته ، ياخي شدوه جماعة ضربوه خاطره هو قبل ضرب واحد بوليس سياسي ...
ولاد الحومة ما ركزوش مع شكون ضرب شكون ... التكريز الفارغ لا ! 
كراهب تعمل في التعبأة العامة ! إسيزي ، أو آم ، موتورات !!
جماعة اللحية تعبي من شيرة و زبراطة الحومة من شيرة !!
ما لوج حد في أصل الحكاية !! جمعة كاملة مواجهات مع جماعة الحومة الأخرى !! إلا ما جات فرقة مالعاصمة باش تفضت الحكاية !!! ولاد الحومة على بعضهم يغيروا و كيف تمس واحد منهم تقول عليك مسيتهم الكل ! ما يلوج حد في حومتي على شكون متدين و شكون زبراط ! خاطر بعد يكمل المتدين يصلي و الزبراط يتزبرط ... باش يتقابلوا الكلهم في قهوة الحومة ! القهوة إلي بناوها هوما بإيديهم و وقت جاء الجيش باش يكسر البناء العشوائي متاع أيام الثورة الحومة الكل بكبيرها بصغيرها وقفتلهم !!
حومتي ... تجي في جرزونة ... آما آش خص كان جيت نحكي على حومتي الكبيرة تونس